23-Jun-2023

ବଲାଙ୍ଗିର//  ରାଜ୍ୟରେ ଠିକାନିଯୁକ୍ତି ଉଚ୍ଛେଦ କରାଯାଇ କାର୍ଯ୍ୟରତ ଆଉଟସୋର୍ସିଂ କର୍ମଚାରୀଙ୍କୁ ନୀୟମିତ କରିବା ଦାବିରେ ଆଜି ଓଡିଶା ସରକାରୀ ଆଉଟସୋର୍ସିଂ କର୍ମଚାରୀ ମହାସଂଘ ପକ୍ଷରୁ ବଲାଙ୍ଗୀର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯିବା ସହିତ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କୁ ଏକ ୧୧ଦଫା ସମ୍ମଳିତ ଦାବିପତ୍ର ପ୍ରଦାନ କରାଯାଇଛି ।  ସ୍ଥାନୀୟ ଯାଦବ ଭବନଠାରୁ ଶହଶହ ସଂଖ୍ୟାରେ ଆଉଟସୋର୍ସି କର୍ମଚାରୀ ଏକ ଶୋଭାଯାତ୍ରାରେ ଆସି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ବଲାଙ୍ଗୀର ଜିଲ୍ଲାସଂଘର ସଭାପତି ରାଜେଶ ଝାଙ୍କରଙ୍କ ନେତୃତ୍ୱରେ ହୋଇଥିବା ଏହି ବିକ୍ଷୋଭରେ ଜିଲ୍ଲା ମହାସଂଘର ଉପଦେଷ୍ଟା ହେମନ୍ତ ପଣ୍ଡା ଯୋଗଦେଇ ନବୀନ ପଟ୍ଟନାୟକ ଗତବର୍ଷ ଦେଇଥିବା ପ୍ରତିଶୃତି ପୂରଣ କରିବାରେ ବିଫଳ ହୋଇଛନ୍ତି ଓ ଠିକାକର୍ମଚାରୀଙ୍କୁ ପ୍ରତାରିତ କରିଛନ୍ତି ବୋଲି ଅଭିଯୋଗ ଉଠାଇଛନ୍ତି । ସେ କହିଛନ୍ତି ଯେ,ଓଡିଶା ସରକାର ରାଜ୍ୟକୁ ଅର୍ଥନୈତିକସ୍ତରରେ ସ୍ୱାବଲମ୍ବି କରାଇ ନବୀନ ପଟ୍ଟନାୟକ ଦେଶର ନମ୍ବର ୧ ମୁଖ୍ୟମନ୍ତ୍ରୀ ହୋଇଛନ୍ତି । କିନ୍ତୁ ରାଜ୍ୟର ବ୍ଲକଠାରୁ ଆରମ୍ଭକରି ସଚିବାଲୟ ପର୍ଯ୍ୟନ୍ତ କାମକରୁଥିବା ଆଉଟସୋର୍ସିଂ କର୍ମଚାରୀଙ୍କ ସମସ୍ୟା ପ୍ରତି ଆଖିବୁଜିଦେଇଛନ୍ତି । ରାଜ୍ୟର ପ୍ରଗତିରେ ଆଉଟସୋର୍ସି କର୍ମଚାରୀଙ୍କ ଯଥେଷ୍ଟ ଭୂମିକା ରହିଛି । ଅଲ୍ପଦରମାରେ କର୍ମଚାରୀମାନେ କାମ କରି ମଧ୍ୟ ରାଜ୍ୟର ସ୍ୱାର୍ଥପାଇଁ ଦିନରାତି ଖଟୁଛନ୍ତି । ରାଜ୍ୟର ଉଚ୍ଚଶିକ୍ଷିତ ଯୁବକ/ଯୁବତୀ ବହୁବର୍ଷ ହେଲା କାମ କରୁଥିବା ବେଳେ ହାଇକୋର୍ଟଙ୍କ ନିର୍ଦ୍ଦେଶ ସତ୍ୱେ ରାଜ୍ୟସରକାର ଏମାନଙ୍କୁ ନୀୟମିତ କରୁନାହାଁନ୍ତି । ସବୁଠୁ ବିଡମ୍ବନାର ବିଷୟ ହେଲା ମୁଖ୍ୟମନ୍ତ୍ରୀ ନିଜେ ଠିକାନିଯୁକ୍ତିକୁ ଉଚ୍ଛେଦ କରିଥିବା ବିଷୟରେ ଘୋଷଣା କରିଥିଲେ ହେଁ ଏପର୍ଯ୍ୟନ୍ତ ତାହା କାର୍ଯ୍ୟକାରୀ ହୋଇନାହିଁ । ଫଳରେ ରାଜ୍ୟର ଉଚ୍ଚଶିକ୍ଷିତ କର୍ମଚାରୀ ସରକାରଙ୍କ ଦ୍ୱାରା ପ୍ରତାରିତ ହୋଇଥିବା ଅଭିଯୋଗ ହୋଇଛି । ତେଣୁ ସରକାର ଆଉ ପ୍ରତାରିତ ନକରି ଠିକାକର୍ମଚାରୀଙ୍କୁ ତୁରନ୍ତ ନୀୟମିତ କରାଇବା,ସଂପୂର୍ଣ୍ଣ ନୀୟମିତ ହେବା ପର୍ଯ୍ୟନ୍ତ ଠିକାକର୍ମଚାରୀଙ୍କ ଦରମାକୁ ୩୦ହଜାର ଟଙ୍କାକୁ ବୃଦ୍ଧି କରିବା,ପ୍ରତିବର୍ଷ ଦରମାରେ ୧୦% ବୃଦ୍ଧି କରିବା,କର୍ମଚାରୀମାନଙ୍କର ବୀମା,ଇଏସଆଇ ପ୍ରିମିୟମକୁ ସିଧାସଳଖ ଡିଡିଓମାନେ ଡିପୋଜିତ କରିବା,୬ବର୍ଷରୁ ଅଧିକ ସମୟ କାମକରିଥିବା କର୍ମଚାରୀ କୌଣସି କାରଣରୁ ଅକ୍ଷମ ହେଲେ ତାଙ୍କୁ ୬ଲକ୍ଷ ଟଙ୍କା ଓ ମୃତ୍ୟୁହେଲେ ୧୦ଲକ୍ଷ ଟଙ୍କାର ସହାୟତା ପ୍ରଦାନ କରାଯିବା,ମୃତକର୍ମଚାରୀଙ୍କ ପରିବାରବର୍ଗ ମଧ୍ୟରୁ ଜଣକୁ ଚାକିରିପ୍ରଦାନ ଓ ମହିଳାକର୍ମଚାରୀମାନଙ୍କୁ ଚାକିରିକାଳରେ ଦୁଇଥର ମେଟରନାଲ ଲିଭ ଦେବାକୁ ଦାବି କରାଯାଇଛି । ଯଦି ସରକାର ଆସନ୍ତା ଜୁନ ୩୦ତାରିଖ ମଧ୍ୟରେ ଏହି ଦାବିଗୁଡିକ ଉପରେ ବିଚାର କରି ପଦକ୍ଷେପ ନନେଲେ ଆସନ୍ତା ଜୁଲାଇ ୧ ତାରିଖରୁ ନବୀନ ନିବାସ ଘେରାଉ କରାଯିବ ବୋଲି ମହାସଂଘ କହିଛି । ଏହି ବିକ୍ଷୋଭରେ ଉପସଭାପତି ଦିଲିପ ସାହୁ,ସଂପାଦକ ଚଞ୍ଚଳ ମିଶ୍ର,କୋଷାଧ୍ୟକ୍ଷ ସତ୍ୟାନନ୍ଦ ସେଠ,ସଂଗଠନ ସଂପାଦକ ଆଶୁତୋଷ ବେହେରା,କାର୍ଯ୍ୟକାରୀ କମିଟିର ନୀରୋଜ ମିଶ୍ର ପ୍ରମୁଖଙ୍କ ସହିତ ବ୍ଲକଅଞ୍ଚଳରୁ ଆସିଥିବା ଶତାଧିକ ଠିକା କର୍ମଚାରୀ ସାମିଲଥିଲେ ।