14-Jun-2023

ବଲାଙ୍ଗିର(ପ୍ରେରଣା ଖବର)-ବଲାଙ୍ଗୀର-ସମ୍ବଲପୁର ଜାତୀୟରାଜପଥ-୨୬ରେ ଛୁଇବନ୍ଧ ଛକରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଯାଇଛି । ଏଥିରେ ୨ଶିଶୁ ସମେତ ୫ଜଣ ମୃତ୍ୟୁବରଣ କରିଥିବା ବେଳେ ୨ଜଣ ଗୁରୁତର ଆହତ ହୋଇଛନ୍ତି । ଗତକାଲି ରାତି ୧୦ଟା.୩୦ବେଳେ ବଲାଙ୍ଗୀରକୁ ଫେରୁଥିବା ଏକ କାର ରାସ୍ତାକଡରେ ଛିଡା ହୋଇଥିବା ଟ୍ରକପଛରେ ଧକ୍କା ହେବାରୁ କାରରେ ବସିଥିବା ଆରୋହୀଙ୍କ ମଧ୍ୟରୁ ୫ଜଣ ମୃତ୍ୟୁବରଣ କରିଥିଲେ । ମୃତକମାନେ ବଲାଙ୍ଗୀର ସହରର ଜଗନ୍ନାଥପଡାର ଆତ୍ମଜ ନାଏକ(୨୬) ,ଆତ୍ମଜଙ୍କ ଭଉଣୀ କନ୍ଧପାଲିପଡାର ଇପ୍ସିତା ସାଏ(୨୪),ଇପ୍ସିତାଙ୍କ ଝୀଅ ରୀଆ(୪)ଓ ସଦାଇପାଲି ଗାଁର ଦିପ୍ତିରଂଜନ ସାଏ(୩୪)ଓ ଝିଅ ଶ୍ରନିକା ସାମନ୍ତିନୀ ସାଏ(୫) ବୋଲି ଜଣାପଡିଛି । ଆତ୍ମଜଙ୍କ ମାଆ ଆରତୀ ନାଏକ(୬୫)ଓ ଦିପ୍ତିରଂଜନଙ୍କ ପତ୍ନୀ ରଶ୍ମିତା ସାଏ(୨୫)ଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ପ୍ରଥମେ ଭୀମଭୋଇ ମେଡିକାଲ କଲେଜ ଓ

ପରେ ବୁର୍ଲାକୁ ସ୍ଥାନାନ୍ତର କରାଯାଇଛି । ଏମାନେ ସମସ୍ତେ ଏକ ସ୍ୱିଫ୍ଟ ଡିଜାୟାର କାରରେ ବଲାଙ୍ଗୀରରୁ ଆଗଲପୁର ବ୍ଲକର ଡୁଡୁକା ଗାଁରୁ ଏକ ବାହାଘର କାର୍ଯ୍ୟକ୍ରମ ସାରି ଫେରୁଥିଲେ । ବାଟରେ ବଲାଙ୍ଗୀରକୁ ଆଉ ମାତ୍ର ୫କିଲୋମିଟର ଦୂରଥିବା ବେଳେ ଛୁଇବନ୍ଧ ଛକଠାରେ ରାସ୍ତାକଡାରେ ଛିଡାହୋଇଥିବା ଏକ ଟ୍ରକରେ ପଛପଟୁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ ହିଁଁ ୫ଜଣଙ୍କର ମୃତ୍ୟୁ ହୋଇଯାଇଥିଲା । ଘଟଣାର ଖବରପାଇ ସଦର ଆଇଆଇସି ଶ୍ରୀକାନ୍ତ ସାହୁ ଆହତଙ୍କୁ ଉଦ୍ଧାର କରି ହସପିଟାଲକୁ ଆଣିଥିଲେ । ଅବସ୍ଥା ଗୁରୁତର ଥିବାରୁ ଆହତମାନଙ୍କୁ ବୁର୍ଲାକୁ ସ୍ଥାନାନ୍ତର କରାଯାଇଛି । ଏହି ଘଟଣାପରେ ବଲାଙ୍ଗୀରରେ ଶୋକର ଛାୟା ଖେଳିଯାଇଛି । ଶବ ରଖାଯାଇଥିବା ଭୀମଭୋଇ ମେଡିକାଲ କଲେଜର ଶବବ୍ୟବଚ୍ଛେଦ ଗୃହପାଖରେ ଶହଶହ ସଂଖ୍ୟାରେ ଲୋକ ରୁଣ୍ଡ ହୋଇଥିଲେ । ଅଘରିଆ ସମାଜର କର୍ମକର୍ତ୍ତା ସଭାପତି ଶୁଭ୍ରାଂଶୁ ପଟେଲ,ଦିଗାମ୍ବର ନାଏକ ପ୍ରମୁଖ ପହଞ୍ଚି ଶୋକସନ୍ତପ୍ତ ପରିବାରକୁ ଆଶ୍ୱାସନା ଦେବା ସହିତ ଶବଗୁଡିକର ପୋଷ୍ଟମର୍ଟମ କରାଇଥିଲେ । ମୃତକମାନଙ୍କର ନିଜ ନିଜ ଅଞ୍ଚଳର ଶ୍ମଶାନରେ ଶେଷକୃତ୍ୟ ସମ୍ପନ୍ନ କରାଯାଇଥିଲା । 
           ପ୍ରକାଶ୍ୟ ଯେ,ବଲାଙ୍ଗୀର ସହର ମଧ୍ୟଦେଇ ଦୁଇଟି ଜାତୀୟରାଜପଥ-୨୬ ଓ ୫୭ ଯାଇଛି । ଏହି ରାସ୍ତାଦେଇ ହଜାର ହଜାର ସଂଖ୍ୟାରେ ଭାରିଯାନ ଯାତାୟାତ କରୁଛି । ସହର ମଧ୍ୟରେ ଅନେକ ଦୁର୍ଘଟଣା ହେବାରୁ ରାତି ୧୨ଟା ପରେ ଭାରିଯାନଗୁଡିକୁ ଛଡାଯାଉଛି । ଫଳରେ ସମ୍ବଲପୁର ରୋଡର ମାଧିଆପାଲିରୁ ଛୁଁଇବନ୍ଧ ଛକ ପର୍ଯ୍ୟନ୍ତ ସକାଳ ୬ଟାରୁ ରାତି ୧୨ଟା ପର୍ଯ୍ୟନ୍ତ ଗାଡିଗୁଡିକ ଅଟକି ରହୁଛି । ବଲାଙ୍ଗୀର ସହରରେ ଦୁଇଟି ବାଇପାସ ନିର୍ମାଣ କରିବାକୁ ପ୍ରାୟ ୧୫ବର୍ଷ ହେଲା ଅପେକ୍ଷା କରିବାକୁ ପଡିଛି । ଏବେ ପୂ୍‌ର୍ତ୍ତବିଭାଗ ଓ ଏନଏଚ ବିଭାଗ ଦୁଇଟିଯାକ ବାଇପାସ କାମ ଆରମ୍ଭ କରିଛନ୍ତି । ବାଇପାସ ଅଭାବରୁ ପ୍ରତିମାସରେ ବଡବଡ ଦୁର୍ଘଟଣା ଘଟୁଛି ଓ ଲୋକଙ୍କ ଧନଜୀବନ ନଷ୍ଟ ହେଉଛି ।