08-Dec-2020

ବୌଦ୍ଧ(ମନୋରଞ୍ଜନ ମିଶ୍ର)-ଆସନ୍ତା ଜାନୁୟାରୀ ୨ ତାରିଖ ଅର୍ଥାତ ବୌଦ୍ଧ ଜିଲ୍ଲା ପ୍ରତିଷ୍ଠା ଦିବସ ଅବସରରେ ଜିଲ୍ଲା ସଂଗ୍ରହାଳୟର ଶୁଭାରମ୍ଭ କରାଯିବ ବୋଲି ଜିଲ୍ଲାପାଳ ତଥା ଜିଲ୍ଲା ସଂସ୍କୃତି ବିଭାଗ ଅଧ୍ୟକ୍ଷ ଲଲାଟେନ୍ଦୁ ମିଶ୍ର ଘୋଷଣା କରିଛନ୍ତି । ବୌଦ୍ଧର ପୂର୍ବରୁ ଥିବା କଚେରୀ କୌଠରୀରେ ଏହି ସଂଗ୍ରହାଳୟ ଆରମ୍ଭ କରାଯାଇଛି । ଏହି ସଂଗ୍ରହାଳୟର ରୂପରେଖ ଓ ଜିନିଷ ସଂଗ୍ରହ ସଂକ୍ରାନ୍ତରେ ମତ ରଖିବା ପାଇଁ ବୌଦ୍ଧ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଏକ ବୈଠକ ସ୍ଥାନୀୟ ସାର୍କିଟ ହାଉସ ଠାରେ ଅନୁଷ୍ଠିତ ହୋଇଥିଲା । ଏଥିରେ ବିଧାୟକ ପ୍ରଦୀପ କୁମାର ଅମାତ ଯୋଗ ଦେଇ ସଂଗ୍ରହାଳୟକୁ ପ୍ରାଚୀନ କୀର୍ତ୍ତିରାଜିର ଏକ ସଂଗ୍ରହାଳୟ କରିବା ପାଇଁ ସମସ୍ତଙ୍କ ସହଯୋଗ କାମନା କରିଥିଲେ । ସଂଗ୍ରହାଳୟରେ ପ୍ରଚୀନ କଳା, ଲୋକବାଦ୍ୟ, ବ୍ୟବହୃତ ଜନିଷ, କୀର୍ତ୍ତିରାଜି ଫଟୋଚିତ, ରାଜଦରବାରରେ ବ୍ୟବହୃତ ଜିନିଷ, ପ୍ରାଚୀନ ମୂର୍ତ୍ତି, ପୁସ୍ତକ, ମୂଦ୍ରା ଭଳି ଅନେକ ଲୁକ୍କାୟିତ ଜିନିଷ ଓ ବିଲୀନ ହେବାକୁ ଯାଉଥିବା ଜିନିଷ ଗୁଡିକ ସ୍ଥାନୀତ କରାଯିବ ବୋଲି ଜିଲ୍ଲାପାଳ ବୈଠକରେ ସୂଚନା ଦେଇଥିଲେ । ଚଳିତ ବର୍ଷ କୋଭିଡ କଟକଣା ଯୋଗୁଁ ସରକାର ଜିଲ୍ଲା ମହୋତ୍ସବ ପାଇଁ ଅନୁମତି ଦେଉନଥିବା ଯୋଗୁଁ ଅନ୍ୟାନ୍ୟ କାର୍ଯ୍ୟକ୍ରମ ସହ ଜିଲ୍ଲା ସଂଗ୍ରହାଳୟର ଶୁଭାରମ୍ଭ ମୁଖ୍ୟମନ୍ତ୍ରୀଙ୍କ କରକମଳରେ କରାଯିବାର ପ୍ରଚେଷ୍ଟା କରାଯାଉଛି ବୋଲି ଜିଲ୍ଲାପାଳ ସୂଚନା ଦେଇଥିଲେ ।