05-May-2023

ସମ୍ବଲପୁର( ସଂଜୀବ ପାଣିଗ୍ରାହୀ)
 ମହାନ ସାହିତ୍ଯିକ ତଥା ନାଟ୍ୟକାର ନାଟ୍ୟହୀରା ଡ. ମଙ୍ଗଳୁ ଚରଣ ବିଶ୍ୱାଳଙ୍କ ୮୯ତମ ଜୟନ୍ତୀ ଅବସରରେ ସମ୍ବଲପୁରର ଅଗ୍ରଣୀ ସାହିତ୍ୟ ଅନୁଷ୍ଠାନ ଅନ୍ୟା ପକ୍ଷରୁ ଆଜି ସମ୍ବଲପୁରୀ ନାଟ୍ୟ ଦିବସ ପାଳିତ ହୋଇଯାଇଛି। ଡ. ଦ୍ୱାରିକାନାଥ ନାୟକଙ୍କ ଅଧ୍ୟକ୍ଷତାରେ ହୋଟେଲ ଡଲଫିନ୍‌ର ସଭାକକ୍ଷରେ ଆୟୋଜିତ ଏହି ସଭାରେ ଆଲୋଚକ ଭାବରେ ଯୋଗଦେଇ ବରିଷ୍ଠ ନାଟ୍ୟାଭିନେତା ଗବେଷକ ଡ. ଶ୍ୟାମ ସୁନ୍ଦର ଧର ତାଙ୍କ ବକ୍ତବ୍ୟରେ କହିଥିଲେ ଯେ ମଙ୍ଗଳୁ ଚରଣଙ୍କ ନାଟକ ଯୋଗୁଁ ସମ୍ବଲପୁରୀ ସାହିତ୍ୟର ଗାରିମା ବଢି ପାରିଛି। ତାଙ୍କ ନାଟକ ଗୁଡିକ ପ୍ରାୟତଃ ବାସ୍ତବ ଜୀବନର ଭିତ୍ତି ଉପରେ ଆଧାରିତ। ସେଥିପାଇଁ ସେ ଗୁଡିକ ଦର୍ଶକମାନଙ୍କୁ  ଜୀବନ୍ତ ଅନୁଭୂତି ପ୍ରଦାନ କରି ବିପୁଳ ଦର୍ଶକୀୟ ପ୍ରଶଂସା ଲାଭ କରିବାରେ ସକ୍ଷମ ହୋଇପାରିଛି।ସ୍ଥାନୀୟ କଥାକୁ ସାର୍ବଜନୀନ କରିବାରେ ମଙ୍ଗଳୁ ସାହିତ୍ଯ ଅଗ୍ରଣୀ ଭୂମିକା ଗ୍ରହଣ କରୁଥିବା ଦର୍ଶାଇ  ଅନ୍ୟତମ ଆଲୋଚକ ତଥା ମଙ୍ଗଳୁ ଚରଣ ସାହିତ୍ୟ ଗବେଷକ ଡ. ଗୌରିଦାସ ପ୍ରଧାନ ତାଙ୍କ ବକ୍ତବ୍ୟରେ କହିଥିଲେ ଯେ,ତାଙ୍କ ଜୟନ୍ତୀ ଦିନକୁ ସମଗ୍ର ପଶ୍ଚିମ ଓଡିଶାରେ ସମ୍ବଲପୁରୀ ନାଟ୍ୟ ଦିବସ ଭାବରେ ପାଳନ କରାଯିବା ଉଚିତ। ମଙ୍ଗଳୁ ସାହିତ୍ୟର ବିଭିନ୍ନ ଦିଗ ଉପରେ ଆଲୋଚନା କରି ସେ କହିଥିଲେ ଯେ, ବିସ୍ଥାପନ ଉପରେ ସେ ଯେଭଳି ସାହିତ୍ଯ ସୃଷ୍ଟି କରିଛନ୍ତି ତା’ର ପଟାନ୍ତର ନାହିଁ। ସମାଜର ନିଷ୍ପେଷିତ ଅତ୍ୟାଚାରିତ ଅବହେଳିତ ଗୋଷ୍ଠିର ଜୀବନ ସଂଘର୍ଷ ତଥା ସେମାନଙ୍କ ଦୁଃଖପୂର୍ଣ ଜୀବନଚର୍ଯ୍ୟା ମଙ୍ଗଳୁ ଚରଣଙ୍କ ନାଟକ ଗୁଡିକରେ ଅତି ହୃଦୟସ୍ପର୍ଶି ଭାବରେ ଉପସ୍ଥାପିତ ହୋଇଛି ବୋଲି ମତ ବ୍ୟକ୍ତ କରିବା ସହ ସେ ତାଙ୍କ ବ୍ୟକ୍ତିଗତ ଜୀବନରେ ଜଣେ ଦରଦୀ ଓ ସ୍ନେହୀ ବ୍ୟକ୍ତି ଥିଲେ ବୋଲି ସଭାରେ ଆଲୋଚନା ହୋଇଥିଲା। ପ୍ରକାଶ ଥାଉକି ଏହି ଅବସରରେ ପ୍ରଥମ ସମ୍ବଲପୁରୀ ନାଟକ 'ଗୌତିଆ ବାବୁ’ର ରଚୟିତା ମିଶ୍ର ଭାତୃତୟଙ୍କ ବଂଶଧର ସନ୍ତୋଷ ମିଶ୍ରଙ୍କ ଦ୍ୱାରା ପ୍ରକାଶିତ ମଙ୍ଗଳୁ ଚରଣଙ୍କ ନାଟକ ‘ଦଦରା ଦରପନ୍‌’ର ଲୋକାର୍ପଣ କରାଯାଇଥିଲା। ଅନ୍ୟା ପକ୍ଷରୁ ଶ୍ରୀ ମିଶ୍ରଙ୍କୁ ଏଥି ସକାଶେ ସମ୍ବର୍ଦ୍ଧିତ ମଧ୍ୟ କରାଯାଇଥିଲା।ସୌଭାଗ୍ୟବନ୍ତ ମହାରଣା,ଅଖିଳ ବିଶ୍ବାଳ,ସୁଶୀଲ ପାଣିଗ୍ରାହୀ,ଚିତ୍ରସେନ ମିଶ୍ର ପ୍ରମୁଖ ମଧ୍ୟ ଆଲୋଚନାରେ ଭାଗ ନେଇଥିଲେ।ସଂଗୀତଜ୍ଞ ବିଜୟ କୁମାର ମିଶ୍ର ଦଦରା ଦର୍‌ପନ ଓ ଉଡଲାପତର୍‌ ବୁଡଲା ଡଙ୍ଗା ନାଟକର କିଛି ଗୀତ ପରିବେଷଣ କରିଥିଲେ। ସଭା ପ୍ରାରମ୍ଭରେ ଡ. ସିଦ୍ଧାର୍ଥ ପଣ୍ଡା ଅତିଥିମାନଙ୍କୁ ମଂଚକୁ ଆମନ୍ତ୍ରଣ କରିଥିଲେ। ସଭାରେ ପଣ୍ଡିତ ଲକ୍ଷ୍ମୀନାରାୟଣ ସାଂସ୍କୃତିକ ସଂସଦ,କଖଗ,ଚେତନା ନାଟ୍ୟ ଅନୁଷ୍ଠାନ,ମଂଚନାୟକ,ଶବ୍ଦ ସାଂସ୍କୃତିକ ସଂସଦ,ଜନନାଟ୍ୟ ମଂଚ ଆଦି ନାଟ୍ୟ ଅନୁଷ୍ଠାନର ସଭ୍ୟମାନଙ୍କ ସମେତ ମଙ୍ଗଳୁ ଚରଣଙ୍କ ନାଟକରେ ଅଭିନୟ କରିଥିବା ତଥା ତାଙ୍କ ନାଟକ ସହ ଜଡିତ ଥିବା ବହୁ ନାଟ୍ଯପ୍ରେମି ଉପସ୍ଥିତ ଥିଲେ।