10-Mar-2023

ସୋନପୁର(ମନୋରଂଜନ ତ୍ରିପାଠୀ)- ଜୁନିଅର ରେଡକ୍ରସ କାର୍ଯ୍ୟକ୍ରମ ସ୍ୱାସ୍ଥ୍ୟ, ସେବା ଓ ବିଶ୍ୱ ବନ୍ଧୁତା ଉପରେ ପର୍ଯ୍ୟବେସିତ । ବିଦ୍ୟାଳୟ ସ୍ତରୀୟ ଛାତ୍ରଛାତ୍ରୀମାନେ ଏଥିରେ ସାମିଲ ହୋଇ ରେଡକ୍ରସର ସପ୍ତନୀତି, ପ୍ରାଥମିକ ଚିକିତ୍ସା, ପ୍ରାକୃତିକ ବିପର୍ଯ୍ୟୟ, ରକ୍ତଦାନ ଅନ୍ଦୋଳନ, ପରିବେଶ ସୁରକ୍ଷା, ଜଳବାୟୁ ପରିବର୍ତ୍ତନ, ସ୍ୱାସ୍ଥ୍ୟ ସଚେତନତା ଆଦି ବିଷୟରେ ଜ୍ଞାନ ଆହରଣ କରିଥାନ୍ତି ।  ସ୍କୁଲରୁ ଆରମ୍ଭ ହୋଇ ଜିଲ୍ଲା , ରାଜ୍ୟ ଓ ଆନ୍ତଃରାଜ୍ୟ ସ୍ତରରେ ଏହି ବିଷୟରେ ଜୁନିଅର ଛାତ୍ରଛାତ୍ରୀ ମାନଙ୍କୁ ତାଲିମ ଦିଆଯାଇଥାଏ । ଇତି ମଧ୍ୟରେ ତିନିଦିନ ବ୍ୟାପୀ ସୁବର୍ଣ୍ଣପୁରର ୧୬ତମ ଜିଲ୍ଲା ସ୍ତରୀୟ ଜୁନିଅର ରେଡକ୍ରସ ଶିକ୍ଷା ଓ ତାଲିମ ଶବିରି ସୋନପୁର ବାଳିକ ଉଚ୍ଚ ବିଦ୍ୟାଳୟ ଠାରେ ସମ୍ପନ୍ନ ହୋଇଯାଇଛି । ଉଦ୍‌ଯାପନୀ ଦିବସରେ ପ୍ରାୟ ୪୫୦ ଜଣ  ଜୁନିଅର ଛାତ୍ରଛାତ୍ରୀ ଏବଂ ପରାମର୍ଶଦାତା ମାନେ ବିଭିନ୍ନ ପ୍ଲାକାର୍ଡ ପ୍ରଦର୍ଶନ ପୂର୍ବକ ସ୍ଲୋଗନ ମାଧ୍ୟମରେ  ସୋନପୁର ସହରରେ

ଆୟୋଜିତ ହୋଇଥିବା ଶାନ୍ତି ଶୋଭାଯାତ୍ରାରେ ଜନସାଧାରଣଙ୍କ ପାଖରେ  ରେଡକ୍ରସର  ବାର୍ତ୍ତା ପହଂଚାଇ ମାନବୀୟ କାର୍ଯ୍ୟକ୍ରମର ଶୋଭା ବଢାଇବାକୁ ଉଦ୍ୟମ କରିଛନ୍ତି । ସମସ୍ତ ନାଗରିକ ରେଡକ୍ରସର ମାନବିକତା ମନ୍ତ୍ରକୁ ଉପଲବଧିକରି ସାମାଜିକ ସେବା ପ୍ରଦାନ କରିବାକୁ ଆଗେଇ ଆସିଲେ ମାନବିକତାର ଜୟ ଲାଭ ହେବ ବୋଲି  ଏହି ଶିବିରରେ ଯୋଗଦାନ କରିଥିବା ଅତିଥି ବୃନ୍ଦ ମତ ରଖିଛନ୍ତି । ସୁବର୍ଣ୍ଣପୁର ଜିଲ୍ଲା ଶିକ୍ଷା ଅଧିକାରୀ ଲକ୍ଷ୍ଣଣ ଭୋଇଙ୍କ ଅଧ୍ୟକ୍ଷତାରେ ଆୟୋଜିତ ହୋଇଥିବା ଉଦ୍‌ଘାଟନୀ ସଭାରେ ମୁଖ୍ୟଅତିଥି ଭାବରେ ଏଡିଏମଓ ଡା. ରମେଶ ସ୍ୱାଇଁ,  ମୁଖ୍ୟବକ୍ତା ଭାବରେ ପୂର୍ବତନ ରାଜ୍ୟ ଜୁନିଅର ରେଡକ୍ରସ ଅଫିସର ଧର୍ମ ସିଂ ମିଶ୍ର, ସମ୍ମାନୀତ ଅତିଥି ଭାବରେ ଏଡିଇଓ ତଥା ଜିଲ୍ଲା ଜୁନିଅର ରେଡକ୍ରସ ସଂପାଦକ ଡା. ରାଧାକାନ୍ତ ଗଡତିଆ, ଏଡିଇଓ ତଥା ସୋନପୁର ବାଳିକା ବିଦ୍ୟାଳୟର ପ୍ରଧାନଶିକ୍ଷୟିତ୍ରୀ ମଞ୍ଜୁଲତା ଭୋଇ, ଭାଇସ ଚେୟାରମ୍ୟାନ ଗତିକୃଷ୍ଣ ମିଶ୍ର ପ୍ରମୁଖ ମଂଚାସୀନ ଥିଲେ ।

ଜିଲ୍ଲା ଜୁନିଅର ରେଡକ୍ରସ ଅଫିସର ରବିଚନ୍ଦ୍ର ପଶାୟତ ସାମଗ୍ରିକ ଭାବେ ଶିବିରର କାର୍ଯ୍ୟକ୍ରମକୁ ପରିଚାଳନା କରିଥିଲେ । ଶିବିରରେ ପ୍ରତ୍ୟହ ସକାଳ ପ୍ରାର୍ଥନା, ଜର୍କ, ସଫେଇ, ରେଡକ୍ରସ ପତାକା ଉତ୍ତୋଳନ, ଫର୍ମାଲ୍ କ୍ଲ୍‌ାସେସ, ବିଭିନ୍ନ କମ୍ଫିଟିସନ, ଇଭିନିଙ୍ଗ ଷ୍ଟ୍ରୋଲ, ରେଡକ୍ରସ ପତାକା ଅବତରଣ, ସୋସିଆଲ ଗେମସ୍‌, ସାଂସ୍କୃତିକ ସଂନ୍ଧ୍ୟାର ରଙ୍ଗାରଙ୍ଗ ଡ୍ୟାନସ୍ ପ୍ରତିଯୋଗିତା ପ୍ରଭୃତି ଆୟୋଜିତ ହୋଇଥିଲା । ଉଦ୍‌ଯାପନୀ ଦିବସରେ ଜିଲ୍ଲା ଜୁନିଅର ରେଡକ୍ରସର ବାର୍ଷିକ ମ୍ୟାଗାଜିନ ଉତ୍ସର୍ଗ ମୁଖ୍ୟଅତିଥି ଜିଲ୍ଲା ଶିକ୍ଷା ଅଧିକାରୀ ଲକ୍ଷ୍ମଣ ଭୋଇଙ୍କ କରକମଳରେ ଉନ୍ମୋଚି ହୋଇଥିଲା । କୃତୀ ଜୁନିଅର ମାନଙ୍କୁ ମେମୋଂଟୋ ଏବଂ ସାର୍ଟିଫିକେଟ ପ୍ରଦାନ କରି ଅତିଥି ବୃନ୍ଦ ପୁରସ୍କୃତ କରିଥିଲେ । ବରିଷ୍ଠ ସାଧନକର୍ମି ଚନ୍ଦ୍ରମଣି ବାଘ ସଭା କାର୍ଯ୍ୟକ୍ରମକୁ ସଂଯୋଜନା କରିଥିବା ବେଳେ ହୃଷୀକେଶ ଡାଙ୍ଗ, ଚନ୍ଦ୍ରଶେଖର ମହାପାତ୍ର,  ତପସ୍ୱିନୀ ଦାଶ , ବିସିସି ନିମାଇ ଚରଣ ମଲ୍ଲୀକ, ଗୋପେଶ ପଣ୍ଡା,ପବିତ୍ର ବାରିକ, ବିଜୟ କୁମାର ପଣ୍ଡା, ବୈକୁଣ୍ଠ ନାୟକ ପ୍ରମୁଖ ସହଯୋଗ କରିଥିଲେ । ସୋନପୁର ବାଳିକା ବିଦ୍ୟାଳୟର ପରାମର୍ଶଦାତ୍ରୀ ପ୍ରଜ୍ଞା ପରିମିତା ମିଶ୍ର ଧନ୍ୟବାଦଅର୍ପଣକରିଥିଲୋ ।