06-Mar-2023

ସୁବର୍ଣ୍ଣପୁର ଜିଲ୍ଲାର ଚତୁର୍ଥ ଦେଶଫାଲ ଲୋକ ମହୋତ୍ସବ  ୨୦୨୩ ର ଦ୍ବୀତିୟ ସାଂସ୍କୃତିକ ସଂଧ୍ୟାରେ ଲୋକାରଣ୍ୟ ହୋଇ ପଡିଥିଲା ମହୋତ୍ସବ ପଡିଆ  । ସାଂସ୍କୃତିକ ସଂଧ୍ୟାର  ନିମନ୍ତ୍ରୀତ ମୁଖ୍ୟ ଅତିଥି ରାଜ୍ୟ ଇସ୍ପାତ ଖଣି ଓ ପୂର୍ତ୍ତ ବିଭାଗ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ, ପୂର୍ବତନ ମନ୍ତ୍ରୀ ପଦ୍ମନାଭ ବେହେରା, ଓ ଅନ୍ୟ ଅତିଥି ମାନଙ୍କ ସାଂସ୍କୃତିକ ବାର୍ତ୍ତା ପ୍ରଦାନ ପରେ ଆରମ୍ଭ ହୋଇଥିଲା ନାଚଗୀତର ଆସର  l ଏ ଅଞ୍ଚଳର ଅନେକ ପ୍ରତିଭା  ବିଶିଷ୍ଟ ବ୍ୟକ୍ତି ବିଶେଷଙ୍କୁ ମନ୍ତ୍ରୀଙ୍କ ଦ୍ୱାରା ସମ୍ବର୍ଦ୍ଧିତ କରାଯାଇଥିଲା l ସ୍ଥାନୀୟ କଣ୍ଠଶିଳ୍ପୀଙ୍କ ଭଜନରୁ ଆରମ୍ଭ ହୋଇଥିଲା ସାଂସ୍କୃତିକ କାର୍ଯ୍ୟକ୍ରମ  ।ପରେ ପରେ ପଶ୍ଚିମ ଓଡିଶାର ବିଭିନ୍ନ ଜିଲ୍ଲାରୁ ଆସିଥିବା କଳାକାରମାନେ ଲୋକନୃତ୍ୟ ପରିବେଷଣ କରିଥିଲେ।ରସରକେଲି ,ଡାଲଖାଇ ,ମାଏଲାଜଡ, ଚୁଟକୁଚୁଟା ,ବଜାଶାଲ ଆଦି ଲୋକନୃତ୍ୟରେ ଦୁଲୁକି ଉଠିଥିଲା ଦେଶଫାଲ ମହୋତ୍ସବର ମୁକ୍ତ ମଂଚ  ।ମହାନଦୀ କୂଳରେ ଧର୍ମଶାଳା ଠାରେ ବର୍ଣ୍ଣାଢ୍ୟ ପରିବେଶ ଭିତରେ ଆୟୋଜିତ ଏହି ଦେଶଫାଲ  ମହୋତ୍ସବର ଦ୍ଵିତୀୟ ସାଂସ୍କୃତିକ ସନ୍ଧ୍ୟାରେ ସ୍ଥାନୀୟ ସାଂସ୍କୃତିକ ଅନୁଷ୍ଠାନ ଗୁଡିକର କଳାକାରମାନେ ନିଜ ନିଜର ଲୋକ ନୃତ୍ୟ ପରିବେଷଣ କରିବାର ସୁଯୋଗ

ପାଇଥିଲେ । ସ୍ଥାନୀୟ କଳାକାରଙ୍କ ଲୋକ ନୃତ୍ୟ ପରିବେଷଣରେ  ଦର୍ଶକଙ୍କ ଭିତରେ ବେଶ କୌତୁହଳ ସୃଷ୍ଟି ହେବା ସହିତ କରତାଳିରେ ଉଛୁଳି ପଡିଥିଲା ମହୋତ୍ସବ ପଡିଆ  । ସେହିପରି  ଗଞ୍ଜାମର ଯୋଡି ଶଙ୍ଖ ,ସୁନ୍ଦରଗଡ଼ର ଆଦିବାସୀ ଲୋକ ନୃତ୍ୟ,ଗଂଜାମ ରଣପାର ଲୋକ ନୃତ୍ୟ ସାଙ୍ଗକୁ ବରଗଡ଼ ବିନ୍ଦୁ ଦଳର ହାସ୍ୟରସ ଭିତିକ ଅଭିନୟ , ପ୍ରସିଦ୍ଧ ପଏଁରୀର ସମ୍ବଲପୁରୀ ଲୋକ ନୃତ୍ୟ ଆଦି ପରିବେଷଣ କରାଯାଇଥିଲା । ଲୋକେ ସାଂସ୍କୃତିକ କାର୍ଯ୍ୟକ୍ରମର ଭରପୁର ମଜା ନେବା ସହିତ ଆଞ୍ଚଳିକ ଉନ୍ନୟନ ପ୍ରଦର୍ଶନୀ ଓ  ମେଳାରେ ବି ବେଶ ଭିଡ ଜମିଥିବା ଦେଖିବାକୁ ମିଳିଥିଲା  ।ବିଳମ୍ବିତ ରାତିଯାଏଁ ଲୋକେ ଗୀତ ନାଚ ଆସରର  ମଜା ନେଇଥିଲେ l