06-Mar-2023

ବୀରମହାରାଜପୁର, (ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଚମ୍ପାମାଲ ପଞ୍ଚାୟତ ଅନ୍ତର୍ଗତ ଚମ୍ପାପୁର ଗାଁ'ର ବିଶ୍ଵାମିତ୍ର ବାରିକ ଓ କୁନ୍ତିଙ୍କ ୩ ଝିଅ ଓ ଏକମାତ୍ର ପୁଅ ଶୁଭେନ୍ଦୁ (୨୩)। ଶୁଭେନ୍ଦୁ ଅନେକ ଦିନ ହେଲା କୈାଣସି ଅଜଣା ରୋଗରେ ପୀଡିତ ହୋଇ ଯନ୍ତ୍ରଣାରେ ଛଟପଟ ହେଉଛନ୍ତି। ତାଙ୍କୁ ବୀରମହାରାଜପୁର ଡାକ୍ତରଖାନା, ସୋନପୁର ମୁଖ୍ୟ ଡାକ୍ତରଖାନା ପରେ ବୁର୍ଲା ଭିମସାରରେ ଭର୍ତ୍ତି କରିଥିଲେ। ସେଠାରେ ତାଙ୍କର ରୋଗ  ଭଲ ନହେବାରୁ ଡାକ୍ତର କଟକ ବଡ ମେଡିକାଲକୁ ଉନ୍ନତ ଚିକିତ୍ସା ପାଇଁ ପରାମର୍ଶ ଦେଇଥିଲେ। ପରିବାର ଲୋକେ ବିଭିନ୍ନ ଡାକ୍ତରଖାନାକୁ ନେଇ ପୁଅର ଚିକିତ୍ସା ଖର୍ଚ୍ଚ କରି ସର୍ବସ୍ବାନ୍ତ ହୋଇଛନ୍ତି। ହେଲେ ତାଙ୍କ ପାଖରେ କିଛି ଟଙ୍କା ପାଇସା ନଥିବାରୁ ପୁଅକୁ ଉଚ୍ଚ ଚିକିତ୍ସା ପାଇଁ ନେଇପାରୁ ନାହାନ୍ତି। ରୋଗଗ୍ରସ୍ତ ପୁଅର ଅଣ୍ଟାରୁ ତଳକୁ କାମ କରୁନି। ସେ ଖାଇବା, ପିଇବା ସହ ଝାଡାପରିସ୍ରା ସବୁ ଖଟ ଉପରେ କରୁଛନ୍ତି।ପରିବାରର ଆର୍ଥିକ ଅବସ୍ଥା ଦୁର୍ବଳ ଥିବାରୁ ତାଙ୍କୁ ଉଚ୍ଚ ଚିକିତ୍ସା ପାଇଁ ନେଇପାରୁନଥିବା ଆକ୍ରାନ୍ତଙ୍କ ବାପା ବିଶ୍ଵାମିତ୍ର ପ୍ରକାଶ କରିଛନ୍ତି। ପରିବାରଟି ନିହାତି ଗରିବ ହୋଇଥିବା ବେଳେ ପୁଅର ଉଚ୍ଚ ଚିକିତ୍ସା କରାଯିବା ମା'ବାପ ପକ୍ଷେ ସମ୍ଭବପର

ନୁହେଁ। ପରିବାରର ଆୟର କହିଲେ ବିଶ୍ଵାମିତ୍ର ଦେଇଥିବା ସେଲୁନ।‌ଶ୍ରୀ ବାରିକ ସେଲୁନରୁ ଯାହା ଆୟ କରନ୍ତି ସେଥିରେ ଦୁଇ ଝିଅଙ୍କ ପାଠପଢ଼ା ସହ ପୁଅର ଔଷଧ ବାବଦକୁ ଖର୍ଚ୍ଚ ହେଉଛି। ସାହି ପୋଡିସାଙ୍କ ଠାରୁ ଧାର କରଜ କରି ପରିବାର ପୋଷଣ କରୁଥିବା ସେ କହିଛନ୍ତି। ଗୋଟିଏ ପଟେ ପୁଅ ଚିକିତ୍ସା, ଅନ୍ୟପଟେ ଦୁଇ ଝିଅ ବାହାଘର ଚିନ୍ତା, ଏଭଳି ସ୍ଥିତିରେ ଉଭୟ ମା'ବାପ ଚିନ୍ତାରେ‌ ଭାଙ୍ଗି ପଡିଛନ୍ତି। ପୁଅର ଚିକିତ୍ସା ଓ ସରକାରୀ ସହାୟତା ପାଇଁ ପ୍ରଶାସନକୁ ପରିବାର ଲୋକେ ଗଣମାଧ୍ୟମ ଜରିଆରେ କୋହଭରା କଣ୍ଠରେ କୁହାରି କରିଛନ୍ତି। ଏନେଇ ଜିଲ୍ଲା ପ୍ରଶାସନ  ଯନ୍ତ୍ରଣାରେ ଛଟପଟ ହେଉଥିଲା ଶୁଭେନ୍ଦୁଙ୍କୁ ଉଚ୍ଚ ଚିକିତ୍ସା ଯୋଗାଇଦେବା ପାଇଁ ଦାବି ହୁଏ।