28-Feb-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ) କିଛିବର୍ଷ ତଳେ ବଲାଙ୍ଗୀର ଜିଲ୍ଲାର କେତେକ ଆଦିବାସୀ ବିଭାଗର ଆବାସିକ ସେବାଶ୍ରମସ୍କୁଲ୍ ବା ଆଶ୍ରମସ୍କୁଲରେ ହଷ୍ଟେଲରେ ରହୁଥିବା ଛାତ୍ରୀଙ୍କ ଅବୈଧ ଗର୍ଭବତୀ ହୋଇଥିବା ଘଟଣା ଚହଳ ପକାଇଥିବା ପରେ ସଂପ୍ରତି ସେହିଭଳି ଏକ ଘଟଣା ଲୋକଲୋଚନକୁ ଆସିବାରୁ ଚାଞ୍ଚଲ୍ଯ ସୃଷ୍ଟି କରିଛି ।  ଗତକାଲି ସମ୍ପୃକ୍ତା ନବମଶ୍ରେଣୀର ଛାତ୍ରୀଜଣକର ଅବୈଧ ଗର୍ଭପାତ ଉଦ୍ୟମ ଯୋଗୁଁ ଜୀବନ ସଂକଟାପର୍ଣ ହୋଇପଡିବାରୁ ତାକୁ ବାଧ୍ୟହୋଇ ଭୀମଭୋଇ ମେଡିକାଲ କଲେଜର ହାସପାତାଳରେ ଭର୍ତ୍ତି କରାଯାଇଛି । ତେବେ ଏହି କାଣ୍ଡକାରଖାନା ଜିଲ୍ଲାରେ ଚର୍ଚ୍ଚାର ବିଷୟ ହୋଇପଡିଥିବା ବେଳେ ଫୋନ୍ ବନ୍ଦ ହେବା ସହ ଅଫିସ୍ ରେ ଅନୁପସ୍ଥିତ ରହିବା କାରଣରୁ  ସ୍କୁଲ୍ ର ପ୍ରଧାନସେବକ ଓ ଡିଡବ୍ଲୁଓଙ୍କ ସହ ଯୋଗାଯୋଗ ସମ୍ଭବ ହୋଇପାରୁନାହିଁ । ଅଭିଯୋଗ ଅନୁଯାୟୀ , ଘଟଣାଟିକୁ ଚପାଇ ଭିନ୍ନମୋଡ ଦିଆଯିବାକୁ ଉଦ୍ୟମ ହେଉଛି ।   ବିଶ୍ବସ୍ତ ସୂତ୍ରରୁ ସଦରଥାନା ଅଞ୍ଚଳର ଚୂଡାପାଲି ଆଶ୍ରମସ୍କୁଲରେ ଏହା ଘଟିଥିବା ପ୍ରକାଶ ।

ତେବେ ଏଥରେ ସେହି ସ୍କୁଲ୍ ହଷ୍ଟେଲର ଜଣେ ଯୁବଛାତ୍ର ଜଡିତ ଥିବା କୁହାଯାଉଥିବାବେଳେ ଛାତ୍ରୀଙ୍କ ଠାରୁ ତାଙ୍କ ଗ୍ରାମର ଜଣେ ଯୁବକଙ୍କୁ ଏଥିରେ ଦାୟୀ ସଜାଇ ଦିଆଯାଇ ଘଟଣାଟିକୁ ଭିନ୍ନମୋଡ ଦିଆଯାଇଥିବା ଅଭିଯୋଗରୁ ପ୍ରକାଶ  ।  ଏଥିରେ ଉକ୍ତ ହଷ୍ଟେଲର ମେଟ୍ରନ୍ , ଅନ୍ୟାନ୍ୟ ଶିକ୍ଷକ / ଶିକ୍ଷୟିତ୍ରୀ , ପ୍ରଧାନସେବକ ଓ ଖୋଦ୍ ଜିଲ୍ଲା କଲ୍ୟାଣ ଅଧିକାରୀ ଭଲଭାବରେ ଅବଗତ ଥାଇ ସେମାନଙ୍କ ସମ୍ପୂର୍ଣ୍ଣ ଜ୍ଞାତସାରରେ ଏଭଳି ଭିନ୍ନମୋଡ ରଚନା କରାଯାଇଥିବା ପ୍ରକାଶ ।

ଏ ସମ୍ପର୍କରେ ପୁଲିସ୍ ପୋସ୍କୋ ଆଇନବଳରେ ଏକ ମାମଲା ଋଜୁ କରି ତଦନ୍ତ କରୁଥିବା ବଲାଙ୍ଗୀର ଏସଡିପିଓ ତୋଫାନ୍ ବାଗ କହିଥିବା ଗଣମାଧ୍ୟମରେ ପ୍ରକାଶ ପାଇଥିଲାବେଳେ , ପ୍ରକୃତ ଦୋଷୀ ଛାତ୍ରକୁ ଖସାଇ ଦିଆଯିବାକୁ ଏହା ଏକ ଷଡଯନ୍ତ୍ର ବୋଲି ସ୍ଥାନୀୟ ଲୋକଙ୍କ ଅଭିଯୋଗ ଓ ଚର୍ଚ୍ଚାରୁ ପ୍ରକାଶ । 

ଆହୁରି ମଧ୍ୟ , ଓଡିଶାର ସରକାରୀସ୍କୁଲ୍ ଗୁଡିକରେ ଛାତ୍ରଛାତ୍ରୀଙ୍କ ଡ୍ରପ୍ ଆଉଟ୍ ସଂଖ୍ୟା ସର୍ବାଧିକ ବୋଲି ଚଳିତ ବିଧାନସଭା ଖବରରୁ ପ୍ରକାଶ ପାଇଥିବାବେଳେ , ଆଦିବାସୀ ଅଞ୍ଚଳର ଓ ଆଦିବାସୀବିଭାଗୀୟ ଆବାହିକ ସ୍କୁଲ୍ ରେ ମିଥ୍ୟା ଉପସ୍ଥାନ ପକାଯାଇ ମେସ୍ ଖର୍ଚ୍ଚରୁ ନିୟମିତ ବାଟମାରଣା ଅବ୍ୟାହତ ରହିଛି । ଏଭଳି ଦୁର୍ନୀତିରୁ ଡିଡବ୍ଲୁଓଙ୍କ ହାତଚିକ୍ଣଣ ହେଉଥିବାରୁ ସେ ଜିଲ୍ଲାର ସ୍କୁଲ୍ ଓ ହଷ୍ଟେଲରେ ଚାଲୁଥିବା ଅନିୟମିତତା ଓ ଏଭଳି କେଳେଙ୍କାରୀକୁ ନଜରଅନ୍ଦାଜ୍ କରିଆସୁଥିବା ପୂର୍ବରୁ ଅଭିଯୋଗ ପ୍ରକାଶ ପାଇ ଆସୁଛି । ଏଣୁ ଏହି ଘଟଣାର ଗୁରୁତ୍ବକୁ ଅନୁଭବ କରି ସରକାର ଏହାର ଏକ ନିରପେକ୍ଷ ଉଚ୍ଚସ୍ତରୀୟ ତଦନ୍ତ କରିବାକୁ ଲୋକେ ଦାବି କରିଛନ୍ତି । ଜିଲ୍ଲା କଲ୍ୟାଣ ଅଧିକାରୀ ଅଲେଖ ବିଶ୍ବାଳ ଓ ତାଙ୍କ ଦପ୍ତରର କେତେକ ପୁରୁଣାମୂଷାଙ୍କ ସମେତ ଜିଲ୍ଲାର ବିଭିନ୍ନ ସେବାଶ୍ରମସ୍କୁଲ୍ , ଆଶ୍ରମସ୍କୁଲ , ଆଦିବାସୀକଲେଜ ଓ ହଷ୍ଟେଲର ଛାତ୍ରଛାତ୍ରୀଙ୍କ ଦାୟିତ୍ୱରେ ରହିଥିବା ମେଟ୍ରନ୍ ବା କର୍ମଚାରୀଙ୍କ ଆଚରଣ ଓ କାର୍ଯ୍ୟକଳାପ ପ୍ରତି ତୀକ୍ଷ୍ଣନଜର ରଖିବାକୁ ଦାବି ହେଉଛି । ବଲାଙ୍ଗୀରଜିଲ୍ଲାର ଆଦିବାସୀହଷ୍ଟେଲର ଏହି ଯୌନକେଳେଙ୍କାରୀ ସହିତ ସମସ୍ତ ଛାତ୍ରଛାତ୍ରୀଙ୍କ ସୁରକ୍ଷା ପ୍ରତି ସରକାର ସଚେତନ ରହିବାକୁ ବିରୋଧୀଦଳଗୁଡିକ ବିଧାନସଭାରେ ଉଠାବା ଉଚିତ୍ ବୋଲି ଜନମତ ପ୍ରକାଶ ପାଇଛି ।
 ଅନୁସନ୍ଧାନରୁ ପ୍ରକାଶ ଯେ , ଉକ୍ତ ନବମଶ୍ରେଣୀର ଛାତ୍ରୀଟି ପାଟଣାଗଡ ବ୍ଲକ୍ ର ମାୟାବର୍ହା ଗ୍ରାମର ଓ ଅଟକ ଯୁବକ ଜଣକ ମଧ୍ୟ ସେହି ଗ୍ରାମର । ତେବେ ଗତ ୨୧ ତାରିଖରେ ଜଣେ ବାହାରର ଯୁବକ ଉକ୍ତ ହଷ୍ଟେଲ ଭିତରକୁ ପଶି ଜଣେ ଛାତ୍ରକୁ ଲୁହାଚେନ୍ ରେ ପିଟିଥିବା ଓ ଏସମ୍ପର୍କରେ ଥାନାରେ ମଧ୍ୟ ସ୍କୁଲ୍ ପକ୍ଷରୁ ଏକ ଏତଲା ଦିଆଯାଇଥିବା ଜଣାଯାଇଛି । ତେବେ ଉକ୍ତ ଘଟଣା ସହିତ ଏହି ଯୌନକେଳେଙ୍କାରୀର ସମ୍ପର୍କ ରହିଛି କି ନାହିଁ , ଅନୁସନ୍ଧାନ ସାପେକ୍ଷ ।