16-Feb-2023

ବୀରମହାରାଜପୁର,( ବିନୋଦ ପାଣ୍ଡେ): ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ବ୍ଲକ ଅନ୍ତର୍ଗତ ସୁବଳୟା ସ୍ଥିତ ବାବା ଅବଧୂତ ସାଂସ୍କୃତିକ ସଂଘ ପକ୍ଷରୁ ୯ ଦିନ ବ୍ୟାପି  ବିରାଟ ଧନୁଯାତ୍ରା ମହୋତ୍ସବର ବୁଧବାର ବିଳମ୍ବିତ ରାତିରେ ଉଦଯାପିତ ହୋଇଯାଇଛି ।‌ କଂସଙ୍କ ନଗର ପରିକ୍ରମା କରିବା ସହ  ରାଜ ଦରବାରରେ ରଙ୍ଗ ସଭା ଆୟୋଜନ ହୋଇଥିଲା। କଂସ ମହାରାଜଙ୍କ ଆଦେଶ କ୍ରମେ କମିଟି ସଭାପତି ରାଜେଶ କୁମାର ସେଠୀଙ୍କ ନେତୃତ୍ୱରେ ଅନୁଷ୍ଠିତ ରାଜସଭାରେ ପ୍ରଥମ ପର୍ଯ୍ୟାୟରେ ମୁଖ୍ୟ ଅତିଥି ଭାବେ ପୂର୍ବତନ ଜିଲ୍ଲା ପରିଷଦ ସଭ୍ୟ  ରାଜଗୋପାଲ ପାଣିଗ୍ରାହୀ, ରଘୁବିର ପାଣିଗ୍ରାହୀ, ଉଫୁଲା ସରପଞ୍ଚ ତଥା ସରପଞ୍ଚ ସଂଘର ସଭାପତି ଶ୍ରୀୟା କର୍ମୀ, ସୁବଳୟା ସରପଞ୍ଚ ପ୍ରମୋଦ ପୁରୋହିତ, ମୁର୍ଷୁଣ୍ଢୀ ସରପଞ୍ଚ ତଥା ଆଇନଜୀବୀ ମନୋଜ ସାହୁ , ସମାଜସେବୀ ସପନ ପଧାନ,  ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଦ୍ବିତୀୟ ପର୍ଯ୍ୟାୟରେ ବିଜେପି ନେତା ଇଂ ରଘୁନାଥ ଜଗଦଲା, ପୂର୍ବତନ ଜିଲ୍ଲାପରିଷଦ ଅଧ୍ୟକ୍ଷ ଆନନ୍ଦ‌ ବାରିକ , ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ ନଲନୀ ପଣ୍ଡା, ବିଜେପି ଯୁବନେତା ଶରତ କୁମାର ମିଶ୍ର,  ମହାରାଜା କଂସଙ୍କ ବିଭିନ୍ନ ପ୍ରଶ୍ନର ଉତ୍ତର ରଖିଥିଲେ।  ରାଜକୀୟ ଅତିଥି ମାନଙ୍କ ପାଇଁ ରାଜ ଦରବାରରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହୋଇଥିଲା।   ନାଟ୍ୟ ଅଭିନୟକ୍ରମେ କୃଷ୍ଣ ବଳରାମଙ୍କୁ ନେଇ ଅକ୍ରୃରଙ୍କ ଗୋପପୁର ପ୍ରବେଶ, କୃଷ୍ଣଙ୍କ ନିକଟରେ କଂସର ମହାମନ୍ତ୍ରୀ ଶକ୍ରାଜିତ ଶ୍ରୀକୃଷ୍ଣଙ୍କ ନିକଟରେ ଶରଣାଗତ ଏବଂ ଶେଷକୁ କଂସବଧ ନାଟକ ମଞ୍ଚସ୍ଥ ହେଉଥିଲା। କଂସ ଭୂମିକାରେ ଶୁଶିଲ ମେହେର ନିଖୁଣ ଅଭିନୟ କରି ଦର୍ଶକଙ୍କୁ ବାନ୍ଧି ରଖିଥିଲା। ଶାନ୍ତି ଶୃଙ୍ଖଳା ସହ ବିଳମ୍ବିତ ରାତ୍ରୀ ପର୍ଯ୍ୟନ୍ତ ବହୁ ସଂଖ୍ୟକ ଦର୍ଶକ ମନଭରି ଉପଭୋଗ କରିଥିଲେ। ସୁରକ୍ଷା ଦୃଷ୍ଟିରୁ ସୁବଳୟା ପୋଲିସ ପକ୍ଷରୁ ଗୋଟିଏ ପ୍ଳାଟୁନ ପୋଲିସ ଫୋର୍ସ ମୁତୟନ ହୋଇଥିଲେ। କମିଟିର ସମ୍ପାଦକ ସୁଦାମ ମେହେରଙ୍କ, ବିଶ୍ଵଜିତ ସେଠୀ, ସୁବଳ ମେହେର ସହ କମିଟିର ସମସ୍ତ ସଦସ୍ୟ ଉପସ୍ଥିତ ରହି ସହଯୋଗ କରିଥିଲେ।