10-Feb-2023

ବଲାଙ୍ଗିର /ତୁରେକେଲା(ମଳୟ ମିଶ୍ର) କିଛିଦିନ ତଳେ ଲୋକଙ୍କ ଅଭିଯୋଗର ଆଧାରରେ ତୁରେକେଲା ସେବାଶ୍ରମସ୍କୁଲ୍ ର କେତେକ ଅନିୟମିତତା ସମ୍ପର୍କରେ 'ପ୍ରେରଣା'ରେ ଏକ ଖବର ପରିବେଷିତ ହୋଇଥିଲା । ଏଥିମଧ୍ୟରେ ଉକ୍ତ ସ୍କୁଲ୍ ଓ ହଷ୍ଟେଲରେ ସେଠାରେ ଦୀର୍ଘବର୍ଷ ଧରି ଅବସ୍ଥାପିତା ପୂର୍ବତନ ପ୍ରଧାନସେବିକା ସପରିବାର ଘର ପରି ରହିଥିବା , ଜିଲ୍ଲାରେ ପ୍ରଧାନସେବକମାନେ ରହିବାସ୍ଥଳେ ସେଇ ସ୍କୁଲରେ ପୂର୍ବରୁ ଥିବା ଜଣେ ସିସିଏ ବା ଅସ୍ଥାୟୀ ରାନ୍ଧୁଣିଆ ପଦୋନ୍ନତି ପରେ ଶିକ୍ଷକ ହେବାପରେ ତାଙ୍କୁ ଭାରପ୍ରାପ୍ତ ପ୍ରଧାନସେବକ ଭାବେ ସେଇଠି ପୁଣି ଅବସ୍ଥାପିତ କରାଯାଇଥିବା ଓ ସେ ସେଠାରେ ରାତ୍ରରହଣୀ ନକରି ପଡୋଶୀ ଖପ୍ରାଖୋଲ ବ୍ଲକ୍ ର ସାହାଜପାଣି ଗ୍ରାମସ୍ଥିତ ତାଙ୍କ ଘରକୁ ପଳାଉଥିବା ଓ ସ୍ଥାନୀୟ ଜଣେ କୁକୁଟାକାଟି ବିକିବାର ଦୋକାନୀଥିବା ସ୍କୁଲ୍ କମିଟିର ସଭାପତି ମଦପିଇ ରାତିରେ ମଧ୍ୟ ବାଳିକାହଷ୍ଟେଲକୁ ପଶୁଥିବା ଇତ୍ୟାଦି ଅନିୟମିତତା ସମ୍ପର୍କରେ ଜନାଭିଯୋଗ ଖବର ପ୍ରକାଶ ପାଇଥିଲା । ତେବେ

ଏହି ଖବର ପ୍ରକାଶିତ ହେଲାପରେ ଉକ୍ତ ସଭାପତି ଓ ଜଣେଅଧେ ଗ୍ରାମବାସୀ ଉକ୍ତ ଖବରର ଅଭିଯୋଗକୁ ଫୋନ୍ କରି ଖଣ୍ଡନ କରିଥିଲେ । ତେବେ ବିଭାଗୀୟ ଜିଲ୍ଲା ଅଧିକାରୀ ବା ବଲାଙ୍ଗୀର ଡିଡବ୍ଲୁ ଓ ଏହି ପ୍ରକାଶିତ ଖବରର ପ୍ରଭାତ ସ୍ବରୂପ ସ୍କୁଲ୍ ଓ ହଷ୍ଟେଲ ପରିସରରୁ ଉକ୍ତ ପୂର୍ବତନ ଅବସରପ୍ରାପ୍ତ ପ୍ରଧାନସେବିକାଙ୍କୁ ହଟାଇ ଦେଲେ । କିନ୍ତୁ ଉକ୍ତ ଆପତ୍ତିଜନକ କାର୍ଯ୍ୟକଳାପକୁ ପ୍ରୋତ୍ସାହନ ଦେଉଥିବା ତଥା କର୍ତ୍ତବ୍ୟରେ ଉପରୋକ୍ତ ଗୁରୁତର ଦାୟିତ୍ୱହୀନତା କରୁଥିବା ସତ୍ତ୍ବେ ଉକ୍ତ ଭାରପ୍ରାପ୍ତ ପ୍ରଧାନସେବକଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନଥିବାରୁ ସେ ଉପର ଅଧିକାରୀଙ୍କୁ ମାଲ୍ ପାଣି ଦେଇ ଖସିଯାଇଥିବା ବିଭାଗରେ ଚର୍ଚ୍ଚାର ବିଷୟ ପାଲଟିଛି । ଏଣୁ ଏପରି ଅଭିଯୋଗ ତଦନ୍ତସାପେକ୍ଷ ବୋଲି ମତପ୍ରକାଶ ପାଇଛି ।