04-Feb-2023

ଲୋଇସିଂହା, (ବିନୋଦ କୁମାର ଦୀପ) ଲୋଇସିଂହା ମହାବିଦ୍ୟାଳୟର ଯୁବ ରେଡ଼କ୍ରସ ତରଫରୁ ଲୋଇସିଂହା ମହାବିଦ୍ୟାଳୟରେ ଜିଲ୍ଲାସ୍ତରୀୟ ଯୁବ ରେଡ଼କ୍ରସ ଶିବିର ଉଦଘାଟିତ ହୋଇଯାଇଛି l ୩ ଦିନ ଧରି ହେବାକୁ ଯାଉଥିବା ଏହି ଶିବିରରେ ବଲାଙ୍ଗୀର ଜିଲ୍ଲାରୁ ପ୍ରାୟ 40 ରୁ ଉର୍ଦ୍ଧ କଲେଜର ଯୁବ ରେଡ଼କ୍ରସ ସ୍ୱଚ୍ଛାସେବୀ ମାନେ ଅଂଶଗ୍ରହଣ କରିଛନ୍ତି l ଲୋଇସିଂହା ବିଧାୟକ ଡ଼ ମୁକେଶ ମହାଲିଙ୍ଗ ମୁଖ୍ୟଅତିଥି ଭାବେ ଯୋଗଦେଇ ଏହି ଶିବିରକୁ ଉଦଘାଟନ କରିଥିଲେ l

କଲେଜ ଅଧ୍ୟକ୍ଷ ଶ୍ରୀ ଗୋବିନ୍ଦ ଚନ୍ଦ୍ର ସାହୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ଉଦ୍ଘାଟନୀ ସଭାରେ ଯୁବ ରେଡ଼କ୍ରସ ବଲାଙ୍ଗୀର ଜିଲ୍ଲା ସଂଯୋଜକ ଡ଼. ଦୈତାରୀ ପୂଜାରୀ ଯୁବ ସମାଜ ପାଇଁ ରେଡ଼କ୍ରସର ଭୂମିକା ସମ୍ପର୍କରେ ଆଲୋଚନା କରିଥିଲେ l ଅନ୍ୟ ମାନଙ୍କ ମଧ୍ୟରେ ଶ୍ରୀ ଅମୃତ ସିଂ ବରିହା, ଶ୍ରୀ ରାଜେନ୍ଦ୍ର ମହାରଣା, ମନୋଜ କୁମାର ମିଶ୍ର ପ୍ରମୁଖ ଯୁବ ରେଡ଼କ୍ରସ ଆଲୋଚନା ଚକ୍ରରେ ସକ୍ରିୟ ଅଂଶଗ୍ରହଣ କରିଥିଲେ l ଯୁବ ରେଡ଼କ୍ରସର କାଉନ୍ସିଲର ଅଧ୍ୟାପକ ମାନସ କୁମାର  ସ୍ୱାଗତ ସମ୍ଭlଷଣ ଦେଇଥିବା ବେଳେ ଅନ୍ୟତମ କାଉନ୍ସିଲର ଅଧ୍ୟାପକ ହିମାଂଶୁ ମହାକୁର ଧନ୍ୟବାଦ ଅର୍ପଣ କରିଥିଲେ l କଲେଜର ଅଧ୍ୟାପକ/ଅଧ୍ୟାପିକା ତଥା ଅନ୍ୟାନ୍ୟ ସହକର୍ମୀ ଉପସ୍ଥିତ ରହି ଉକ୍ତ କାର୍ଯ୍ୟକ୍ରମରେ ସହଯୋଗ କରିଥିଲେ l