28-Jan-2023

ମଧ୍ୟପ୍ରଦେଶ: ଆଜି ସକାଳେ ମଧ୍ୟପ୍ରଦେଶର ମୁରୈନା ନିକଟରେ ଦୁର୍ଘଟଣାଗ୍ରସ୍ତ ହୋଇଥିବା ଭାରତୀୟ ବାୟୁସେନାର ଦୁଇଟି ଲଢୁଆ ବିମାନର କିଛି ଅଂଶ ୧୦୦ କିଲୋମିଟର୍‌ ଦୂର ରାଜସ୍ଥାନର ଭରତପୁରରେ ପଡ଼ିଥିବା ଚିହ୍ନଟ କରାଯାଇଛି।

ଏହା ଗୋଟାଏ ପୃଥକ୍‌ ବିମାନ ଦୁର୍ଘଟଣା ବୋଲି ଭରତପୁର ଜିଲ୍ଲାପାଳ ଆଲୋକ ରଞ୍ଜନ ପ୍ରଥମେ ସୂଚନା ଦେଇଥିଲେ। କିନ୍ତୁ, ତାହା ମଧ୍ୟପ୍ରଦେଶରେ ଦୁର୍ଘଟଣାଗ୍ରସ୍ତ ସୁଖୋଇ-୩୦ ଓ ମିରେଜ୍‌ ୨୦୦୦ ଲଢୁଆ ବିମାନରୁ କୌଣସି ଗୋଟିକର ଭଗ୍ନାଂଶ ବୋଲି ପରେ ସୁନିଶ୍ଚିତ କରି କହିଛନ୍ତି।
ଜିଲ୍ଲାପାଳ ଆଲୋକ ରଞ୍ଜନ କହିଛନ୍ତି, ବିମାନ ଦୁର୍ଘଟଣାସ୍ଥଳରେ ପ୍ରଶାସନିକ ଅଧିକାରୀ ଓ ପୁଲିସ ଉପସ୍ଥିତ ଅଛନ୍ତି ଏବଂ ଉଦ୍ଧାର କାର୍ଯ୍ୟ ଚାଲିଛି।
ଗଣମାଧ୍ୟମକୁ ଭରତପୁର ପୁଲିସ ସୁରିଣ୍ଟେଣ୍ଡେଣ୍ଟ୍‌ ଶ୍ୟାମ ସିଂହ କହିଥିଲେ, ସହରର ଉଚୈନ୍‌ ଅଞ୍ଚଳର ଗୋଟାଏ ଖୋଲା ପଡ଼ିଆରେ ଗୋଟାଏ ବିମାନ ଦୁର୍ଘଟଣାଗ୍ରସ୍ତ ହୋଇଛି। କିନ୍ତୁ, ଆକାଶରୁ ଖସିବା ବେଳେ ଏତେ ଜୋର୍‌ରେ ନିଆଁ ଜଳୁଥିଲା ଯେ, ଏହା ହେଲିକପ୍ଟର୍‌ କି, ବିମାନ କହିବା ସମ୍ଭବପର ନୁହେଁ।
ଉଲ୍ଲେଖଯୋଗ୍ୟ, ତାଲିମ ଅଭ୍ୟାସ ନିମନ୍ତେ ଉପରୋକ୍ତ ବିମାନ ଗୋଆଲିୟର୍‌ସ୍ଥିତ ମହାରାଜପୁର ବିମାନଘାଟିରୁ ଉଡ଼ାଣ ଆରମ୍ଭ କରିଥିଲା।
ଭାରତୀୟ ବାୟୁସେନ କରିଥିବା ଟୁଇଟ୍‌ ଅନୁସାରେ, ଆଜି ସକାଳେ ଗୋଆଲିୟର୍‌ ନିକଟରେ ବାୟୁସେନାର ଦୁଇଟି ବିମାନ ଦୁର୍ଘଟଣାଗ୍ରସ୍ତ ହୋଇଛି। ବିମାନ ଦୁଇଟି ନିୟମିତ ତାଲିମ ଅଭିଯାନରେ ଉଡ଼ାଣ ଆରମ୍ଭ କରିଥିଲେ। ଏଥିରେ ଥିବା ୩ଜଣ ପାଇଲଟ୍‌ଙ୍କ ମଧ୍ୟରୁ ଜଣେ ସାଙ୍ଘାତିକ ଆହତ ହୋଇଛନ୍ତି। ଦୁର୍ଘଟଣାର କାରଣ ଜାଣିବା ଲାଗି ‘କୋର୍ଟ ଅଫ୍‌ ଇନ୍‌କ୍ବାରି’ ଆଦେଶ ଦିଆଯାଇଛି।
ମୁରୈନା ପୁଲିସ ସୁପରିଣ୍ଟେଣ୍ଡେଣ୍ଟ୍‌ କହିଛନ୍ତି ଯେ, ଗୋଟିଏ ବିମାନରେ ଦୁଇଟି ପାଇଲଟ୍‌ ଥିବା ବେଳେ ଅନ୍ୟ ବିମାନରେ ଜଣେ ପାଇଲଟ୍‌ ଥିଲେ। ଦୁଇଜଣଙ୍କୁ ନିରାପଦ ଅବସ୍ଥାରେ ଉଦ୍ଧାର କରାଯାଇଥିବା ବ‌େଳେ ତୃତୀୟଜଣଙ୍କର ଶବ ଉଦ୍ଧାର କରାଯାଇଛି। ଲଢୁଆ ବିମାନର କେତେକଖଣ୍ଡ ଭଗ୍ନାଂଶ ରାଜସ୍ଥାନର ଭରତପୁରରେ ପଡ଼ିଛି।

(ଦୀପକ ଷଡଙ୍ଗୀ ଙ୍କ ରିପୋର୍ଟ)