15-Jan-2023

ବିନିକା(ହିମାଂଶୁ ଶେଖର ପଟେଲ), ପାକ୍ଷିକ କୋସଲୀ ପତ୍ରିକା ଜୁଏହୁଲାର ୧୩ତମ ବାର୍ଷିକ ଉତ୍ସବ ବିନିକା ଚନ୍ଦମା ହୋଟେଲ ଠାରେ ଅନୁଷ୍ଠିତ ହୋଇଥିଲା । କ୍ଷୀରସାଗର ବିଭାରଙ୍କ ସଂଯୋଜନାରେ ଅନୁଷ୍ଠିତ ଏହି ଉତ୍ସବରେ ମୁଖ୍ୟ ଅତିଥି ଭାବରେ ପଦ୍ମଶ୍ରୀ ଜିତେନ୍ଦ୍ର ହରିପାଲ, ସମ୍ମାନିତ ଅତିଥି ଭାବରେ ଜୁଏହୁଲାର ମୁଖ୍ୟ ସଂପାଦକ ନିହାଲ ସିଂ, ବିନିକା ଥାନା ଆଇଆଇସି ରବିନ୍ଦ୍ର ସାହୁ, ବିନିକା ନିୟନ୍ତ୍ରିତ ବଜାର କମିଟିର ଅଧ୍ୟକ୍ଷ ଉଦିତ ବାବୁ, ଡିଇଓ ଶାନ୍ତନୁ କୁମ୍ଭକାର ଉପଦେଷ୍ଟା ଫଗନୁ କୁମ୍ଭାର ଓ ମୁଖ୍ୟବକ୍ତା ଭାବରେ ସାପ୍ତାହିକ ପ୍ରେରଣାର ସଂପାଦକ ରଘୁ ନନ୍ଦନ ସିଂହ ମଂଚାସୀନ ରହି ନିଜର ଅଭିଭାଷଣ ପ୍ରଦାନ କରିଥିଲେ । ସଭା ପ୍ରାରମ୍ଭରେ ଅତିଥି ମାନେ ଡ଼. ବାବା ସାହେବ ଆମ୍ବେଦକରଙ୍କ ଫଟୋଚିତ୍ରରେ ମାଲ୍ୟାର୍ପଣ କରି ସଭାକୁ ଉଦ୍‌ଘାଟନ କରିଥିଲେ । ବାବା ସାହେବଙ୍କ ଆଦର୍ଶ ଓ ସମ୍ବିଧାନର ନିୟମକୁ ପାଳନ କରିବା ଆମ ସମସ୍ତଙ୍କ ଧ୍ୟେୟ ହେବା ଉଚିତ ବୋଲି ବକ୍ତା ମାନେ କହିଥିଲେ ।

ପତ୍ରିକାର ସଂପାଦକ ଅରକ୍ଷିତ ମହାନନ୍ଦ ସଂପାଦକୀୟ ବିବରଣୀ ପାଠ କରିବା ସହ ଖବରକାଗଜର ପ୍ରଚାରପ୍ରସାର ପାଇଁ ସମସ୍ତଙ୍କ ସହଯୋଗ କାମନା କରିଥିଲେ । ଏହି ଅବସରରେ ବିନିକା ର ମହାନଦୀ ଯୁବ ସଂଗଠନ ସମେତ ନାରାୟଣ ଲୁହା, ଠଣସୁନ୍ଦର ଭେଶ୍ରା, ସାନ୍ତନୁ କୁମ୍ଭକାର,  ଙ୍କୁ ଅଙ୍ଗବସ୍ତ୍ର ଓ ମାନପତ୍ର ପ୍ରଦାନପୂର୍ବକ ସମ୍ବର୍ଦ୍ଧିତ କରାଯାଇଥିଲା । ନିକଟରେ ନେସନାଲ ଫେଲୋସିପ୍ ପାଇଥିବା ଅରକ୍ଷିତ ମହାନନ୍ଦ ଓ ଫଗନୁ ମହାନନ୍ଦଙ୍କୁ ନାଗରିକ ସମ୍ବର୍ଦ୍ଧନା ଜ୍ଞାପନ କରିଥିଲେ । ଶେଷରେ ରାମଗୋପାଲ ବାଗ ଧନ୍ୟବାଦ ଅର୍ପଣ କରିଥିଲେ ।  ଏହି ସମାରୋହରେ ବିନିକା ଓ ସୋନପୁର ଅଂଚଳର ବହୁ କବି, ବୁଦ୍ଧିଜୀବୀ ଓ ସାମ୍ବାଦିକ ଯୋଗ ଦେଇଥିଲେ ।