14-Jan-2023

ବଲାଙ୍ଗିର(ପ୍ରେରଣା ଖୀବର)-ବଲାଙ୍ଗୀର ଜିଲ୍ଲାରେ ବ୍ଲକଗୁଡିକୁ ସରକାରୀ ଅନୁଦାନ ଆବଣ୍ଟନ ପ୍ରସଙ୍ଗରେ ଗତ ଦୁଇଦିନ ହେଲା ଚର୍ଚ୍ଚା ଯୋରଧରିଛି । ମୁଖ୍ୟତଃ ଏହି ପ୍ରସଙ୍ଗରେ କଣ୍ଟାବାଞ୍ଜି ବିଧାୟକ ସନ୍ତୋଷସିଂ ସାଲୁଜା ଓ ଜିଲ୍ଲାପାଳ ମୁହାଁମୁହିଁ ହେବା ଘଟଣାକୁ ଆଲୋଚନା ବେଶି ଚାଲିଛି । ତେବେ ଏଭିତରେ ଆଉ ଏକ ଘଟଣା ନଜରକୁ ଆସିଛି । ବଲାଙ୍ଗୀର ବିଧାୟକ ତଥା କଂଗ୍ରେସ ବିଧାୟକଦଳନେତା ନରସିଂହ ମିଶ୍ର ଖୋଲାମଞ୍ଚରେ ଜିଲ୍ଲାପାଳଙ୍କୁ ପ୍ରଶଂସା କରିବା ସହିତ ହକି ଉଦଘାଟନୀ ଉତ୍ସବଦିନ ଉଭୟେ ଉଭୟଙ୍କୁ କେକ ଖୁଆଉଥିବା ନଜରକୁ ଆସିଛନ୍ତି । ସୋସିଆଲ ମିଡିଆରେ ଏହି ଫଟୋ ଭାଇରାଲ ହେବାରେ ଲାଗିଛି । ଜିଲ୍ଲାରେ ବିରୋଧି କଂଗ୍ରେସଦଳର ଦୁଇଜଣ ବିଧାୟକ ଥିବା ବେଳେ ଜଣେ ଜିଲ୍ଲାପାଳଙ୍କୁ ଖୁସି ହୋଇ ସବୁକାମ ଠିକରେ ହେଉଥିବା ଭାଷଣ ଦେଉଥିବା ବେଳେ ଆଉ ଜଣେ ଜିଲଳ୍ପାଳ ମନୋପଲି କରି ଲୋକପ୍ରତିନିଧିଙ୍କୁ ଅଣଦେଖା କରୁଥିବା ଅଭିଯୋଗ ଉଠାଇ ଜିଲ୍ଲାପରିଷଦ ବୈଠକରେ ତୁମ୍ବିତୁଫାନ କରିଛନ୍ତି । ଜିଲ୍ଲାରେ ଏହି ଘଟଣାକୁ ନେଇ ରାନୀତି ସରଗରମ ହୋଇଥିବା ବେଳେ ବିଧାୟକଦଳର ନେତାଥିବା ନରସିଂହ କିନ୍ତୁ ନୀରବ ରହିଛନ୍ତି ।

ଏପର୍ଯ୍ୟନ୍ତ ତାଙ୍କର ପ୍ରତିକ୍ରୀୟା ଆସି ପାରିନାହିଁ । ଫଳରେ ଲୋକଙ୍କ ମଧ୍ୟରେ ଚର୍ଚ୍ଚା କଂଗ୍ରେସରେ କହିଁ ଖୂସି କହିଁ ଗମ୍ । ଜିଲ୍ଲାରେ ବଡଚର୍ଚ୍ଚା ଯେ,ବଲାଙ୍ଗୀର ଜିଲ୍ଲାରେ ୫ଟି ବିଧାନସଭା କ୍ଷେତ୍ର ମଧ୍ୟରୁ ବଲାଙ୍ଗୀର ସଦର ଓ କଣ୍ଟାବାଞ୍ଜିରେ କଂଗ୍ରେସଦଳ ଜିଣିଛି । ବଲାଙ୍ଗୀରରୁ ନରସିଂହ ମିଶ୍ର ବିଧାୟକ ଥିବା ବେଳେ କଣ୍ଟାବାଞ୍ଜିରୁ ସନ୍ତୋଷ ସିଂ ସାଲୁଜା ରହିଛନ୍ତି । କିନ୍ତୁ ଉଭୟଙ୍କ ମଧ୍ୟରେ ତାଳମେଳ ରହୁନାହିଁ । ପ୍ରଶାସନିକ ଅଧିକାରୀମାନେ ନରସିଂହଙ୍କୁ କୁଆଡେ ଗୁରୁତ୍ୱ ଦେଉଥିବା ବେଳେ ସନ୍ତୋଷସିଂ ସାଲୁଜାଙ୍କୁ ସେତେଟା ଗୁରୁତ୍ୱ ଦେଉନାହାଁନ୍ତି । ନରସିଂହ ଅନେକଗୁଡିଏ ବିବାଦୀୟ ପ୍ରସଙ୍ଗରେ ସରକାରୀ ଦଳ ସହିତ ଭିତିରି ବୁଝାମଣା କରୁଥିବା ତାଙ୍କ ନିଜଦଳରୁ ଅଭିଯୋଗ ହୋଇଥିଲା । ସେଥିପାଇଁ କୁଆଡେ ଉପର ମହଲରୁ ପ୍ରଶାସନକୁ ନିର୍ଦ୍ଦେଶ ରହିଛି ନରସିଂହଙ୍କୁ ଗୁରୁତ୍ୱ ଦେବାକୁ ବୋଲି ଆଲୋଚନା ହେଉଛି । ବିଧାୟକ-ଜିଲ୍ଲାପାଳ ମୁହାମୁହିଁ ପ୍ରସଙ୍ଗରେ ସେଥିପାଇଁ ଜିଲ୍ଲାପାଳଙ୍କ ବିରୁଦ୍ଧରେ ନରସିଂହ ପଦଟିଏ କହୁନାହାଁନ୍ତି । ଜିଲ୍ଲାପାଳଙ୍କ ସପକ୍ଷରେ ସରକାରୀ କର୍ମଚାରୀସଂଘମାନେ ଆଗାଇ ଆସିଥିବା ବେଳେ କୁକୁସିଂ ଲୋକଙ୍କୁ ନେଇ ବ୍ଲକ ଓ ଜିଲ୍ଲାପାଳ କାର୍ଯ୍ୟାଳୟ ଘେରାଉ କରିବାକୁ ଅଣ୍ଟା ଭିଡିଛନ୍ତି । କିନ୍ତୁ ଏପର୍ଯ୍ୟନ୍ତ କଂଗ୍ରେସଦଳ ବିଧାୟକଙ୍କ ସପକ୍ଷରେ ମୁହଁ ଖୋଲିନାହାଁନ୍ତି । ଫଳରେ ଦଳୀୟ ଅଭିମୁଖ୍ୟକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି ।