06-Jan-2023

ବଲାଙ୍ଗୀର(ପ୍ରେରଣା ଖବର)-ସଂପ୍ରତି ଗାଁ ଗାଁରେ ଲୋକଙ୍କ ମଧ୍ୟରେ ମତଭେଦ ଦେଖାଦେଉଛି । ସେମାନଙ୍କ ମଧ୍ୟରେ ମନାନ୍ତର ଓ ମତାନ୍ତର ରହି ଗାଁମାନଙ୍କରେ ଅଶାନ୍ତି ଦେଖାଦେଉଛି । କିନ୍ତୁ ବଲାଙ୍ଗୀର ସଦରବ୍ଲକ ଅନ୍ତର୍ଗତ ଜନକପୁର ଗାଁ ଏକ ନିଆରା ଗାଁ ପାଲଟିଛି । ଦୀର୍ଘବର୍ଷ ହେଲା ଏହି ଗାଁରେ ଗ୍ରାମର ସମସ୍ତେ ମିଳିତ ଭାବରେ ପୁଷପୁନି ତିହାରକୁ ପାଳନ କରିଆସୁଛନ୍ତି । ଆଜି “ଛେରଛେର ବୁଢୀ ଛେରଛେରା” ଡାକରେ ଗାଁ କମ୍ପିଉଠୁଥିଲା । ବାଦ୍ୟର ତାଳେ ତାଳେ ନାଚଗୀତ,ଭୋଜିଭାତର ଆସର ଜମିଥିଲା । ଗାଁର ଗଉଁତିଆ ପରିବାର ଗ୍ରାମବାସୀଙ୍କୁ ନେଇ ପୁଷପୁନିକୁ ଧୁମଧାମରେ ପାଳନ କରିଛନ୍ତି । ଗାଁରେ ମୋଟ ୮୦ଟି ପରିବାର ରହୁଥିବା ବେଳେ ସମସ୍ତେ ଏହି ତିହାରକୁ ମିଳିତ ଭାବରେ ଆବାଳ ବୃଦ୍ଧବନିତା ପାଳନ କରୁଛନ୍ତି । ପୁଷପୁନି ଏକ କୃଷିଭିତ୍ତିକ ପର୍ବ । ଗ୍ରାମର ପ୍ରାୟଲୋକ କୃଷିଜୀବୀ ଅଛନ୍ତି । ଏହି ଗାଁରେ ପୂର୍ବରୁ କୃଷକନେତା ସ୍ୱର୍ଗତ ଡ.ସୁଧିରକୁମାର ପରିଚ୍ଛା ଗ୍ରାମବାସୀଙ୍କୁ ସମ୍ମିଳିତ କରି ପୁଷପୁନିକୁ ଧୂମଧାମରେ ପାଳନ କରୁଥିଲେ । ଗତବର୍ଷ ତାଙ୍କର ଦେହାନ୍ତ ହୋଇଗଲା ପରେ ତାଙ୍କ ସାନଭାଇ ସୌମେନ୍ଦ୍ର ପରିଚ୍ଛା(ଚଗଲା)ଙ୍କ ନେତୃତ୍ୱରେ ଏବର୍ଷ ପୁଷପୁନି ପାଳିତ ହୋଇଛି । ପୁଷପୁନି ଦିନ

ପଶ୍ଚିମଓଡିଶାର ଘରେ ଘରେ ପିଠାମଣ୍ଡା କରାଯାଇ ଏହି ପର୍ବକୁ ପାଳନ କରାଯାଇଥାଏ । କିନ୍ତୁ ଜନକପୁର ଗାଁରେ ଗାଁର ମହିଳାମାନେ ଗତକାଲିଠୁ ମିଳିତ ଭାବରେ ଚାଉଳରେ ଚୁନାକରି ତାକୁ ପୁରଦେଇ ମଣ୍ଡା ତିଆରି କରିଥିଲେ । ଆଜି ଠିକ ୧୧ଟା ବେଳେ ଗ୍ରାମର କଳାକାରମାନେ ଢୋଲ,ନିସାନ,ତାସା ଧରି ବାଦ୍ୟବଜାଇ ଛେରଛେରା ମାଗିଥିଲେ । ସେମାନେ ଗ୍ରାମର ପ୍ରତ୍ୟେକଘରକୁ ପହଞ୍ଚି ଛେରଛେରା ମାଗିଥିଲେ । ଗ୍ରାମବାସୀ ଖୁସିରେ ତାଙ୍କୁ ମଣ୍ଡା,ପିଠା,ଚାଉଳ,ଟଙ୍କା ଦେଉଥିଲେ । ଗ୍ରାମୀଣ ସଂସ୍କୃତିକୁ ଆଜି ମଧ୍ୟ ଏହି ଗାଁ ବଞ୍ଚାଇ ରଖିଛି । ଏହି ତିହାର ଆମକୁ ଏକତ୍ରୀତ କରୁଛି ଓ ସମସ୍ତେ ସମସ୍ତଙ୍କ ସୁଖଦୁଃଖରେ ସହଭାଗୀ ହୋଇପାରୁଛୁ ବୋଲି ଆୟୋଜକ ସୌମେନ୍ଦ୍ର ପରିଚ୍ଛା(ଚଗଲା) କହିଛନ୍ତି । କେବଳ ପୁଷପୁନି ନୁହେଁ ଗାଁରେ ନୁଆଖାଇ,ଛାଡଖାଇ,କାଦୋଯାତ୍ରା ଇତ୍ୟାଦିରେ ମଧ୍ୟ ଗ୍ରାମବାସୀ ମିଳିତ ଭାବରେ ପାଳନ କରୁଛନ୍ତି । ଆଜି ଗ୍ରାମର ମହିଳାମାନେ ପର୍ଲାରେ ମଣ୍ଡାପିଠା ବୋହି ଭୋଜିସ୍ଥଳକୁ ଆଣିଥିଲେ । ପ୍ରଥମେ ମହିଳା ଓ ଶିଶୁମାନେ ଭୋଜିରେ ବସିଥିଲେ । ସେମାନେ ଖାଇସାରିଲା ପରେ ପୁରୁଷମାନେ ଖାଇଥିଲେ । ମୋଟ ୪୦୦ ଲୋକରୁ ଅଧିକ ଏଠାରେ ସମ୍ମିଳିତ ହୋଇଥିଲେ । ମହିଳାଙ୍କୁ ଏଠାରେ ପ୍ରାଧାନ୍ୟ ମିଳୁଥିବା ଲକ୍ଷ୍ୟ କରାଯାଇଥିଲା । ସବୁଧର୍ମ,ସବୁଜାତି ମିଳିତ ଭାବରେ ଭୋଜି ଖାଇଥିଲେ । ଭୋଜିରେ ଖାସିମାଂସ,ମାଛଭଜା,ଭାତ,ଡାଲି,ଟମାଟୋ ଖଟାରେ ଆପ୍ୟାୟିତ କରାଯାଇଥିଲା । ଗାଁର ସମସ୍ତେ ଉତ୍ସାହର ସହିତ ପର୍ବଟିକୁ ପାଳନ କରିଥିଲେ । ଗ୍ରାମମାନଙ୍କରେ ଲୋକଙ୍କ ମଧ୍ୟରେ ସମନ୍ୱୟର ଅଭାବ ରହୁଥିବା ବେଳେ ଏହି ଗାଁ ସେହି ସବୁ ସମସ୍ୟାରୁ ଦୂରେଇ ରହି ଏକ ଭାତୃତ୍ୱଭାବ ପ୍ରଦର୍ଶନ କରି ଏକ ଉଦାହରଣ ପାଲଟିଛନ୍ତି ।