06-Jan-2023

ବଲାଙ୍ଗିର (ପ୍ରେରଣା ଖବର) ଏଫ୍ଆଇଏଚ୍ ହକି ବିଶ୍ବକପ୍ ଉପଲକ୍ଷେ ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲାସ୍ତରୀୟ ବିଭିନ୍ନ କ୍ରିଡ଼ା  ପ୍ରତିଯୋଗିତା ସମୁହ ଉଭୟ ବାଳକ ଓ ବାଳିକା ବିଭାଗରେ ଅନୁଷ୍ଠିତ ହୋଇଯାଇ ଅଛି। ଗାନ୍ଧୀ ଷ୍ଟାଡ଼ିୟମ ବଲାଙ୍ଗିର ଠାରେ ଅନୁଷ୍ଠିତ ଫୁଟବଲ ପ୍ରତିଯୋଗିତାରେ ପ୍ରଥମ ଦିନରେ ବାଳିକା ବିଭାଗରେ ଟିଟିଲାଗଡ଼ ବ୍ଲକ ଦଳ ୨-୧ ଗୋଲ୍ ରେ ପୁଇନ୍ତଳା ବ୍ଲକ ଟିମ୍ କୁ ପରାସ୍ତ କରି ଚାମ୍ପିୟାନ ହୋଇଥିବା ବେଳେ ଦ୍ବିତୀୟ ଦିନରେ ବାଳକ ବିଭାଗରେ ବଙ୍ଗୋମୁଣ୍ଡା ବ୍ଳକ ବଲାଙ୍ଗିର ବ୍ଲକ୍ କୁ ପରାସ୍ତ କରି ଚମ୍ପିୟାନ ହୋଇଥିଲେ। ସେହିପରି ରାଜେନ୍ଦ୍ର ନାରାୟଣ ସିଂହଦେଓ କ୍ରୀଡ଼ା ପ୍ରାଙ୍ଗଣରେ ଅନୁଷ୍ଠିତ ଖୋଖୋ ପ୍ରତିଯୋଗିତାରେ ବାଳିକା ବିଭାଗରେ ମୁରିବାହାଲ ଦଳ ପୁଇନ୍ତଳା ଦଳକୁ ପରାସ୍ତ କରି ଚାମ୍ପିୟନ ହୋଇଥିବା ବେଳେ ବାଳକ ବିଭାଗରେ ମୁରିବାହାଲ ଦଳ  ପୁଇନ୍ତଳା ଦଳକୁ ହରାଇ ଚମ୍ପିୟାନ୍ ହୋଇଥିଲା। 
ଉଭୟ ପ୍ରତିଯୋଗିତାକୁ ଜିଲ୍ଲା ଶାରୀରିକ ଶିକ୍ଷା ନିରିକ୍ଷକ ଶ୍ରୀ ଅନ୍ତର୍ଯ୍ୟାମି ବିଶ୍ବାଳ ଉଦଘାଟନ କରିଥିବା ବେଳେ ଫାଇନାଲ ଖେଳରେ ଅତିରିକ୍ତ ମୁଖ୍ୟ ଉନ୍ନୟନ ଅଧିକାରୀ, ଜିଲ୍ଲା ପରିଷଦ, ବଲାଙ୍ଗିର ଅଧିକାରୀ ଶ୍ରୀଯୁକ୍ତ ଗୁଣନିଧି ନାଏକ ଯୋଗଦେଇ ଖେଳାଳିମାନଙ୍କୁ ଉତ୍ସାହିତ କରିଥିଲେ।  ଉଭୟ ପ୍ରତିଯୋଗିତାଟିକୁ ଜିଲ୍ଲା କ୍ରୀଡ଼ା ଅଧିକାରୀ ଶ୍ରୀ ପରାସର ବାଗ ଏବଂ ସହକାରୀ ଜିଲ୍ଲାପାଳ ଶ୍ରୀ ଆଦିତ୍ଯ ଦଳବେହେରାଙ୍କ ପ୍ରତକ୍ଷ୍ଯ ତତ୍ତ୍ବାବଧାନ ରେ ଅନୁଷ୍ଠିତ ହୋଇଥିଲା,  ଏଥିରେ ଜିଲ୍ଲାର ବିଭିନ୍ନ ସ୍କୁଲର ଶାରୀରିକ ଶିକ୍ଷା ଶିକ୍ଷକ ମାନେ ଶ୍ରୀଯୁକ୍ତ ନରସିଂହ ସ୍ବାମୀ ନାଇଡୁଙ୍କ ନିର୍ଦେଶରେ ଖେଳ ପରିଚାଳନାରେ ସହଯୋଗ କରିଥିଲେ। ଏହି ପ୍ରତିଯୋଗିତାର ସମସ୍ତ ବିଜେତା ଓ ଉପବିଜେତା ଦଳ ମାନଙ୍କୁ ଆସନ୍ତା ଜିଲ୍ଲା ଲୋକ ମହୋତ୍ସବ ସମୟରେ ପୁରସ୍କାର ଦେଇ ସମ୍ମାନିତ କରାଯିବ।