05-Jan-2023

ପାଟଣାଗଡ଼ (ପୂର୍ଣ୍ଣ ଶଶୀ ଶେଖର ରାଓ) ବଲାଙ୍ଗିର ଜିଲ୍ଲା ଖପ୍ରାଖୋଲ ବ୍ଲକ ସ୍ଥାନୀୟ ହାଇସ୍କୁଲ ମିନି ଷ୍ଟାଡିୟମ ଠାରେ ବ୍ଲକ ସ୍ତରୀୟ ଲୋକ ଉତ୍ସବ ଗୁରୁବାର ଉଦ୍ଘାଟିତ ହୋଇଯାଇଛି । ଏହି ଅବସରରେ ପ୍ରଥମେ ହରିଶଙ୍କର ମନ୍ଦିର ଠାରୁ ଏକ ମଶାଲ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ମଶାଲ ଶୋଭାଯାତ୍ରା ରେ ବ୍ଲକ୍ ପ୍ରଶାସନ ଓ ସ୍ବେଚ୍ଛାସେବୀ ମାନେ ସାମିଲ ହୋଇଥିଲେ। ମଶାଲ ଯାତ୍ରୀ ଦଳ ଙ୍କୁ ଥାନା ଛକ ରେ

ଭବ୍ୟ ସ୍ଵାଗତ କରାଯିବା ସହ ଇଷ୍ଟ ଦେବୀ ମା ଡୁମରତଲେନ ଙ୍କ ଠାରେ ପୂଜା ଅର୍ଚ୍ଚନା କରି  ଲୋକ ବାଦ୍ୟ ର ତାଳେ ତାଲେ ଅତିଥି ଙ୍କ ସହ କଳାକାର ମାନେ ଏକ ସାଂସ୍କୃତିକ ଶୋଭାଯାତ୍ରା ରେ ମିନି ଷ୍ଟାଡିୟମ ଠାରେ ପହଞ୍ଚି ଥିଲେ। ଏହି ଅବସରରେ ଆୟୋଜିତ ଉଦଘାଟନୀ ଉତ୍ସବରେ ବ୍ଲକ ଅଧ୍ୟକ୍ଷା ନିରୁପମା ପଟେଲ ଅଧ୍ୟକ୍ଷତା କରିଥିବା ବେଳେ ମୁଖ୍ୟ ଅତିଥି ରୂପେ ବଲାଙ୍ଗିର ଲୋକ ସଭା ସାଂସଦ ସଙ୍ଗିତ କୁମାରୀ ସିଂଦେଓ , ମୁଖ୍ୟ ବକ୍ତା ରୂପେ ରାଜ୍ୟ ସଭା ସାଂସଦ ନିରଞ୍ଜନ ବିଶି,  ସମ୍ମାନିତ ଅତିଥି ରୂପେ ଜିଲ୍ଲା ପାରିଷଦ ଉପାଧ୍ୟକ୍ଷା  ମିଥିଳା ମାଝୀ , ଜିଲ୍ଲା ପରିଷଦ ସଦସ୍ୟା  ସଂଯୁକ୍ତା ମେହେର, ପ୍ରମିଳା ପାଥର ପ୍ରମୁଖ ଯୋଗଦେଇ ପଶ୍ଚିମ ଓଡ଼ିଶା ର ଲୋକ ସଂସ୍କୃତି ଏବଂ ଲୋକ କଳା ଉପରେ ଆଲୋକ ପାତ କରିବା ସହ

ଲୋକ ଉତ୍ସବ ର ସମ୍ପର୍କରେ  କହିଥିଲେ। ଉଦଘାଟନୀ ଆରମ୍ଭ ରୁ ଗୋଷ୍ଠୀ ଉନ୍ନୟନ ଅଧିକାରୀ ରଶ୍ମୀରଂଜନ ରାଉତ ସ୍ବାଗତ ଅଭିଭାଷଣ ପ୍ରଦାନ କରିଥିଲେ। ଉଦଘାଟନୀ ଉତ୍ସବ କୁ  ଇଂରାଜୀ ଅଧ୍ୟାପକ ବଳଭଦ୍ର ଦାସ ପରିଚାଳନା କରିଥିବା ବେଳେ ବ୍ଲକ ଉପାଧ୍ୟକ୍ଷ ସୁଖୀରାମ ସାଣ୍ଡ ଧନ୍ୟବାଦ୍ ଅର୍ପଣ କରିଥିଲେ । ଉଦଘାଟନୀ ପରେ ପ୍ରତି ଯୋଗୀଙ୍କ ଦ୍ଵାରା ବିଭିନ୍ନ ଲୋକ ନୃତ୍ୟ , ଲୋକ ବାଦ୍ୟ , ଲୋକ ସଙ୍ଗୀତ  ପରିବେଷିତ ହୋଇଥିଲା। କରମା , କଳଙ୍ଗା ଦଣ୍ଡା ନାଚ, ଆଦିବାସୀ ଦଣ୍ଡା,ଦଣ୍ଡ ନୃତ୍ୟ , ଖଞ୍ଜଣି ବାଦ୍ୟ , ସଂଚାର , ଦାସ କାଠିଆ , ଘୁଡକା , ହାଲିଆ ଗୀତ, ସମ୍ବଲପୁରୀ ନୃତ୍ୟ  ପରିବେଷିତ ହୋଇଥିଲା। କଲାକାରଙ୍କ ନାଚ ଗୀତ ରେ ଦର୍ଶକ ଝୁମିଥିଲେ । ସଂସ୍କୁତିକ ମଞ୍ଚକୁ ସୁଶୀଲ ପୋଡ଼ ଓ ମୁଗ୍ଧା ଦାଶ ପରିଚାଳନା କରିଥିବା ବେଳେ ବିଚାରକ ରୂପେ  ଉପଖଣ୍ଡ ମଙ୍ଗଳ ଅଧିକାରୀ ଦୀପ୍ତିମନ୍ତ ଭୋଇ,ହରିବୋଲ ପୋଡ଼, ମନୋଜ ବାଗ, ହରେକୃଷ୍ଣ ବାରିକ  ପ୍ରମୁଖ ଯୋଗଦେଇଥିଲେ। ଖବର ଲେଖା ହେବା ବେଳ ଯାଏ ପ୍ରତିଯୋଗିତା ଚାଲିଥିଲା।