04-Jan-2023

ସମ୍ବଲପୁର(ସଂଜୀବ ପାଣିଗ୍ରାହୀ)
ଜ଼ିଲ୍ଲା ମୁଖ୍ୟ ଚିକିତ୍ସାଳୟରେ ଜଣେ ଫାର୍ମାସିଷ୍ଟ ଅସଦାଚରଣ କରିଥିବା ଅଭିଯୋଗ ହୋଇଛି I ଖବର ଅନୁଯାୟୀ ଜଣେ ନାବାଳିକା ଛାତ୍ରୀଙ୍କୁ ବାନ୍ତି ହେବାରୁ ତାଙ୍କ ବାପା ଜ଼ିଲ୍ଲା ମୁଖ୍ୟ ଚିକିତ୍ସାଳୟ ବହିରବିଭାଗରେ କାର୍ଯ୍ୟରତ ଥିବା ଡାକ୍ତର ସୁଚିତ୍ରା ସାହୁଙ୍କୁ ଦେଖାଇଥିଲେ I ନାବାଳିକାଙ୍କ ସ୍ଵାସ୍ଥ୍ୟ ଯାଞ୍ଚ ପରେ ତାଙ୍କ ବାପା ନିରାମୟ ଔଷଧ ବିତରଣ କେନ୍ଦ୍ରକୁ ଔଷଧ ଆଣିବାକୁ ଯାଇଥିଲେ I ତେବେ ସେଠାରେ ଉପସ୍ଥିତ ଫାର୍ମାସିଷ୍ଟ ବାବୁ ଜଣକ ଡାକ୍ତର ଲେଖିଥିବା ଔଷଧ ନ ଦେଇ ଅନ୍ୟ ଔଷଧ ଦେଇଥିଲେ I ଡାକ୍ତର ଲେଖି ନ ଥିବା ଔଷଧ ଆପଣ କେମିତି ଦେଲେ ବୋଲି ପଚାରିବାରୁ ଫାର୍ମାସିଷ୍ଟ ବାବୁ ଜଣକ ରାଗି ଯାଇ "ଜେନ୍ ଡାକ୍ତର ଉଷୋ ଲେଖିଛେ ତାକେ ପଚାର" ବୋଲି କହି ଡାକ୍ତରଙ୍କୁ ମଧ୍ୟ ଅସଦାଚରଣ କରିବାକୁ ପଛାଇ ନ ଥିଲେ  I ଡାକ୍ତର ସାହୁଙ୍କୁ  ଆସି ଔଷଧ ଦେଖାଇବାରୁ ଏହି ଔଷଧ ମୁଁ ତ ଲେଖି ନାହିଁ ଏହା ଆପଣଙ୍କୁ କିଏ ଦେଲା ବୋଲି କହି ଏହି ଔଷଧ ନ ଥିଲେ ଅନ୍ୟ ଏକ ଔଷଧ ନେବାକୁ ଲିଖିତ ପରାମର୍ଶ ଦେଇଥିଲେ I ତେବେ ପୁନଶ୍ଚ ଔଷଧ ଆଣିବାକୁ ଯିବାରୁ ସମ୍ପୃକ୍ତ ଫାର୍ମାସିଷ୍ଟ ପୂର୍ବରୁ ଦେଇଥିବା ଔଷଧ ହାତରୁ ଟାଣି ନେବା ସହ ଔଷଧ ନାହିଁ ବୋଲି କହି  "ଡାକ୍ତର କ'ଣ ଲେଖିଛନ୍ତି ରୋଗୀ ଜାନ୍ ବାର ଅଧିକାର ନାହିଁ" ବୋଲି କହିଥିଲେ I ଏହି ସମୟରେ  ମୋନାଲିସା ବାରିକ ନାମକ ଜଣେ ମହିଳା ଫାର୍ମାସିଷ୍ଟ ଆସି କଥାକୁ ସମାଧାନ ପାଇଁ ଚେଷ୍ଟା କରିଥିଲେ I ତେବେ ଖବର ନେବାରୁ ଜଣାଯାଇଛି ଯେ ତଥାକଥିତ ଫାର୍ମାସିଷ୍ଟ ବାବୁଙ୍କ ଏଠାରେ ଡ୍ୟୁଟି ନ ଥିଲା I ମାତ୍ର, କେଉଁ ଅଧିକାରରେ ସେ ସେଠାରେ କାହିଁ କେତେ ସମୟରୁ ଡ୍ୟୁଟି କରୁଥିଲେ ତାହା ଡାକ୍ତରଖାନା କର୍ତୃପକ୍ଷଙ୍କୁ ଜଣା I  ଅସଦାଚରଣ କରିଥିବା ନେଇ ଛାତ୍ରୀଙ୍କ ବାପା ଆଜି ଜ଼ିଲ୍ଲା ମୁଖ୍ୟ ଚିକିତ୍ସାଧିକାରୀଙ୍କୁ ଲିଖିତ ଅଭିଯୋଗ କରିବା ସହିତ ଫାର୍ମାସିଷ୍ଟଙ୍କ ବିରୁଦ୍ଧରେ ଦୃଢ କାର୍ଯ୍ୟନୁଷ୍ଠାନ ନେବାକୁ ଦାବି କରିଛନ୍ତି I