10-Dec-2022

ବଲାଙ୍ଗୀର ଜିଲ୍ଲା ସିନ୍ଧେକେଲା ଥାନା ଅଭ୍ୟର୍ଥନା କକ୍ଷରେ ଆମ ପୋଲିସ ସମିତି ବୈଠକ ଅନୁଷ୍ଠିତ ହୋଇ ଯାଇଛି । ସିନ୍ଧେକେଲା ଥାନା ଜିଲ୍ଲା ସଦର ମହକୁମାରୁ ଶହେ କିଲୋମିଟର ଦୁର ପଡୁଥିବାରୁ ଜିଲ୍ଲା ଅଧିକାରୀ ମାନଙ୍କ ପାଦ ଏଠି କାଁ ଭାଁ ପଡିଥାଏ। ସିନ୍ଧେକେଲା ବଲାଙ୍ଗୀର, କଳାହାଣ୍ଡି ଓ ନୁଆପଡା ଜିଲ୍ଲାର ସିମାନ୍ତରେ ଅବସ୍ଥିତ ଥିବାରୁ ଏହି ଥାନାର ଗୁରୁତ୍ବ ବେଶ ମହତ୍ବପୂର୍ଣ୍ଣ। କିନ୍ତୁ ସବୁ ନିର୍ଭର କରେ ଏଠାରେ ନିଯୁକ୍ତି ପାଇଥିବା ଥାନା ଅଧିକାରୀଙ୍କ ଉପରେ । ପୋଲିସ ପ୍ରଶାସନ ଓ ସାଧାରଣ ଲୋକଙ୍କ ମଧ୍ଯରେ ସମନ୍ବୟ ରକ୍ଷାକରିବା, ପୋଲିସ ପ୍ରତି ଲୋକଙ୍କ ବିଶ୍ୱାସ ବଢାଇବା ତଥା ପୋଲିସ ଥାନା ଅଞ୍ଚଳରେ ହେଉଥିବା ବିଭିନ୍ନ ସମସ୍ୟା ବିଷୟରେ ଖୋଲାଖୋଲି ଆଲୋଚନା କରି ସମସ୍ୟାର ସମାଧାନ କରିବା କିମ୍ବା ସମସ୍ୟା ବିଷୟରେ ଉଚ୍ଚ ଅଧିକାରିଙ୍କ ଦୃଷ୍ଟି ଆକର୍ଷଣ କରିବା ପାଇଁ ସରକାର ସମସ୍ତ ଥାନାରେ ଆମ ପୋଲିସ ସମିତି ବୈଠକ ଅନୁଷ୍ଠିତ କରିବା ପାଇଁ ନିର୍ଦ୍ଦେଶ ଦେଇଥିଲେ। କିନ୍ତୁ ସିନ୍ଧେକେଲା ରେ ଆଇଆଇସି ଭାବେ ପଞ୍ଚାନନ ନାଏକ ଯୋଗ ଦେବାପରେ ଆଉ ଆମ ପୋଲିସ ସମିତି ବୈଠକ ଡାକିଲେ ନାହିଁ ତାଙ୍କ ପରେ ଆସିଥିବା ଆଇଆଇସି ଆଲୋକ ବେହେରା ମଧ୍ଯ କୌଣସି ବୈଠକ ଡାକିଲେ ନାହିଁ । ଫଳରେ ଜନସାଧାରଣ ଓ ପୋଲିସ ପ୍ରଶାସନ ମଧ୍ଯରେ ଦୁରତା ବଢିବାରେ ଲାଗିଲା ଓ ଶେଷରେ ଆଇଆଇସି ଆଲୋକ ବେହେରା ଭିଜିଲାନ୍ସ ହାବୁଡରେ ପଡି ଏବେ ଜେଲ ହାଜତରେ। ତାଙ୍କ ସ୍ଥାନରେ ମଙ୍ଗଳବାର ନୁତନ ଆଇଆଇସି ଭାବେ ଯୋଗ ଦେଇଛନ୍ତି ବି ରୁଦ୍ରିଆ ଓ ସେ ଏହି ବୈଠକ ପୁଣି ଦୁଇ ବର୍ଷ ପରେ ଆରମ୍ଭ କରିଛନ୍ତି । ଏଥିରେ ସିନ୍ଧେକେଲା ଥାନା ଅଞ୍ଚଳର ବହୁ ବିଶିଷ୍ଟ ବ୍ୟକ୍ତି ଯୋଗ ଦେଇ ଅଞ୍ଚଳରେ ଦେଖା ଦେଇଥିବା ଟ୍ରାଫିକ ସମସ୍ୟା, ପୋଲିସ ଷ୍ଟେସନ କୁ କୌଣସି ବିଷୟରେ ଅଭିଯୋଗ କରିବାକୁ ଆସିଲେ ଘଣ୍ଟା ଘଣ୍ଟା ଅପେକ୍ଷା କରୁଥିବା ଯୋଗୁଁ ଅଞ୍ଚଳର ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଥିବା ବିଷୟରେ ଅବଗତ କରିଥିଲେ। ଏହା ଜାଣିବା ପରେ ଆଇଆଇସି ମୁଁ ଆସିବା ପରେ  ସାଧାରଣ ଲୋକ ତଥା ଥାନାକୁ ଆସୁଥିବା ଯେ କୌଣସି ଅଭିଯୋଗ କାରୀଙ୍କ ବସିବା ବ୍ୟବସ୍ଥା, ପାଣୀ ଓ ଚା ବ୍ୟବସ୍ଥା ଶୀଘ୍ର ଆରମ୍ଭ କରାଯାଉଛି। ଏବଂ ଅଭିଯୋଗ କାରୀ ଆସିଲେ ଅଭିଯୋଗ ଶୁଣିବା ଓ କାର୍ଯ୍ୟକାରୀ କରାଯିବା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯିବ ବୋଳି ଆଶ୍ବାସନା ଦେଇଥିଲେ । ଆଗକୁ ବିଭିନ୍ନ ପଞ୍ଚାୟତ ମୁଖ୍ୟାଳୟର ମାନଙ୍କରେ ଆମ ପୋଲିସ ସମିତି ବୈଠକ କରାଯିବ ଓ ଗୁଣିଗାରେଡି କୁ ନେଇ ଲୋକଙ୍କୁ

ସଚେତନ କରାଯିବ। ପରେ ଆଜିକାଳି ହେଉଥିବା ବିଭିନ୍ନ ଠକେଇ ପ୍ରତି ସାବଧାନ ରହିବା ତଥା ବିଭିନ୍ନ ଉପାୟରେ ଚୋରୀ ହେଉଥିବା ଏକ ଡେମୋ ଦେଖାଇଥିଲେ। ଗୁରୁତ୍ବପୂର୍ଣ୍ଣ କଥାହେଲା କିଛିବର୍ଷ ତଳେ ଥିବା ରଞ୍ଜନ ବରିହା, ଅନନ୍ତ ପ୍ରଧାନ ଭଲି ଦୁଇଜଣ ଥାନାଧିକାରିଙ୍କ କାର୍ଯ୍ୟଶୈଳୀ ଉପରେ ଉପସ୍ଥିତ ସମସ୍ତ ସଭ୍ଯ ଭୂରିଭୂରି ପ୍ରଶଂସା କରିଥିଲେ । ଅନ୍ୟମାନଙ୍କ ମଧ୍ଯରେ ଏସଆଇ ଜୟଶଙ୍କର ଆଚାର୍ଯ୍ଯ, ସିନ୍ଧେକେଲା ବଣିକସଂଘ ସଭାପତି ସୁବାଶ ଜୈନ, ପୂର୍ବ ସଭାପତି ସରୋଜ ଜୈନ, ସରପଞ୍ଚ ନରେଶ ଅଗ୍ରୱାଲ, ସମିତିସଭ୍ଯ ଭୋଲାନାଥ ବେହେରା , ବଲାଙ୍ଗୀର ଜିଲ୍ଲା ବିଜେପି ସାଧାରଣ ସମ୍ପାଦକ ମୁକେଶ ଜୈନ, ସମ୍ପାଦକ ଅନିଲ ନାଏକ, ସାମ୍ବାଦିକ ଅନିଲ କୁମାର ତ୍ରିପାଠୀ, ପୂର୍ବ ଜିଲ୍ଲାପରିଷଦ ସଦସ୍ଯ ସଞ୍ଜୀବ ସାହୁ , ଯୁବନେତା ଯୁବରାଜ ବାଗ, ଝଲପ ସରପଞ୍ଚଙ୍କ ପ୍ରତିନିଧି ଗୋବିନ୍ଦ ପୁଟେଲ, ଅର୍ସାତୁଲା ସରପଞ୍ଚଙ୍କ ପ୍ରତିନିଧି ଟଙ୍କଧର ପୁଟେଲ , କୁରସୁଡ ସରପଞ୍ଚ ଙ୍କ ପ୍ରତିନିଧି ନିମାଇଁ ଚରଣ ବେହେରା , ଗଣ୍ଡା ବେହେରା , ଜ୍ୟୋତି ସାହୁ , କୁନା ବାମିଡି , ସିନ୍ଧେକେଲା ଫରେଷ୍ଟର,ଫରେଷ୍ଟ ଗାର୍ଡ କିର୍ତ୍ତିଚନ୍ଦ୍ର ସୁଆର, ଆରଆଇ ଦୁଲ୍ଲବ ନାଏକ, ଗନ୍ଧର୍ଲା ଆରଆଇ ଏଲନ ବେହେରା   ଙ୍କ ସହ ଅନେକ ବ୍ୟକ୍ତିବିଶେଷ ଉପସ୍ଥିତ ଥିଲେ ।