07-Dec-2022

ସୁବର୍ଣ୍ଣପୁର ,- କୋଶଲ ରାଜ୍ୟ ଦାବି ନେଇ ପୁଣ୍ୟପୀଠ ହରିଶଙ୍କରରୁ ବାହାରି ଥିବା ପଦଯାତ୍ରା ମଙ୍ଗଳବାର ସନ୍ଧ୍ୟାରେ ସୋନପୁରରେ ପହଞ୍ଚିଥିଲା । ୨୮ ଜଣ ଯୁବକ ବ୍ଲକ ଛକରେ ପହଞ୍ଚିବା ପରେ ସ୍ୱତନ୍ତ୍ର କୋଶଲ ରାଜ୍ୟ ଦାବିରେ କମ୍ପି ଉଠିଥିଲା ସମଗ୍ର ପରିବେଶ ।  ଏଠାରେ କୋଶଲ ସାହିତ୍ୟ-ସଂସ୍କୃତି ପରିଷଦ ପକ୍ଷରୁ ପଦଯାତ୍ରୀଙ୍କୁ ସମ୍ବର୍ଦ୍ଧିତ କରାଯାଇ ଥିଲା । ସୁବର୍ଣ୍ଣା ନାରୀ ଜାଗରଣ କେନ୍ଦ୍ର କାର୍ଯ୍ୟାଳୟଠାରେ ବରିଷ୍ଠ ଆଇନଜୀବୀ ଶ୍ୟାମାଓଁ ପ୍ରସାଦ ମିଶ୍ରଙ୍କ ଅଧ୍ୟକ୍ଷତାରେ ଏକ ସମ୍ବର୍ଦ୍ଧନା ସଭା ଆୟୋଜିତ ହୋଇଥିଲା । ବରିଷ୍ଠ କୋଶଲବାଦୀ ନେତା ତଥା ସାମ୍ବାଦିକ ଗୋରେଖ ନାଥ ସାହୁ କୋଶଲ ଆନ୍ଦୋଳନର ଯାତ୍ରା ନେଇ ତାଙ୍କ ଅନୁଭୂତି ବାଣ୍ଟିଥିଲେ । ପ୍ରଫେସର ମୀନା ମହାରଣାଙ୍କ ଆବେଗଭରା ଉଦ୍‌ବୋଧନ ସମସ୍ତଙ୍କ ଆଖିରେ ଲୁହ ଭରି ଦେଇଥିଲା । ଚଙ୍ଗରିଆ ସରପଞ୍ଚ  ତଥା ବରିଷ୍ଠ କୋଶଲବାଦୀ ନେତା ସୁଶୀଳ କୁମାର ଗୁରୁ, ଆଇନଜୀବୀ ସୁବାସ ଆଚାର୍ଯ୍ୟ, ଯୁବରାଜ ବଘାର ପ୍ରମୁଖଙ୍କ ନେତୃତ୍ୱରେ ୨୮ ଜଣ ଯୁବକ ପଦଯାତ୍ରାରେ ବାହାରିଛନ୍ତି । ଏହି ସମ୍ବର୍ଦ୍ଧନା ସଭାରେ ବେଣୁଧର ପ୍ରଧାନ, ମନୋଜ ବାରିକ, ପ୍ରିୟବ୍ରତ ସାହୁ, ଶ୍ରଦ୍ଧାଞ୍ଜଳି ମିଶ୍ର, ଆରତି ଖମାରୀ, ଶେଷଦେବ ମେହେର, ବିଘ୍ନରାଜ ପଣ୍ଡା, ପଦ୍ମଲୋଚନ ମିଶ୍ର  ପ୍ରମୁଖ ଉପସ୍ଥିତ ଥିଲେ ।  ସମସ୍ତ କୋଶଲ ସପକ୍ଷବାଦୀ ସଂଗଠନକୁ ଏକତ୍ର କରି ଖୁବ୍ ଶୀଘ୍ର ସୋନପୁରରେ ଏକ ବୈଠକ ଅନୁଷ୍ଠିତ ହେବ ବୋଲି ଆଇନଜୀବୀ ଶ୍ୟାମାଓଁ ପ୍ରସାଦ ମିଶ୍ର ଘୋଷଣା  କରିଛନ୍ତି ।  
ତେବେ  ମଙ୍ଗଳବାର ସୋନପୁରରେ ରାତ୍ରୀ  ଯାପନ  ପରେ ବୁଧବାର ସକାଳୁ ପଦଯାତ୍ରୀ ମାନେ ପୁଣି ଭୁବନେଶ୍ବର ଅଭିମୁଖେ ବାହାରିଛନ୍ତି । ବୁଧବାର ପ୍ରାତଃରେ  ତ୍ରିବେଣୀ ସଙ୍ଗମରେ ବୁଡ ପକାଇ ଯାତ୍ରା ସଫଳର କାମନା କରି ବାବା ରାମେଶ୍ବରଙ୍କୁ ଦର୍ଶନ କରିଥିଲେ । ତେଲନଦୀ ବ୍ରିଜ ନିକଟରେ ସହରର ବହୁ ବୁଦ୍ଧିଜୀବୀ ଉପସ୍ଥିତ ରହି ପଦଯାତ୍ରୀଙ୍କୁ ବିଦାୟ ସମ୍ବର୍ଦ୍ଧନା ଜଣାଇଥିଲେ ।