28-Nov-2022

ବୌଦ୍ଧ(ଦୁର୍ଯ୍ଯୋଧନ ବିଶି) - ଗତ ଦୁଇଦିନ ଧରି ସ୍ଥାନୀୟ କଚେରୀ ଖେଳ ପଡିଆଠାରେ ଅନୁଷ୍ଠିତ ହୋଇଥିବା ସେଣ୍ଟ୍ ଜାଭିୟର୍ସ ପବ୍ଲିକ ସ୍କୁଲର ବାର୍ଷିକ କ୍ରୀଡା ଶନିବାର ଉଦଯାପିତ ହୋଇଯାଇଛି । ଉଦ୍‌ଯାପନୀ ଉତ୍ସବରେ ମୁଖ୍ୟଅତିଥି ଭାବେ ଅତିରିକ୍ତ ଜିଲ୍ଲାପାଳ ଶ୍ରୀମତୀ ବବିତାରାଣୀ ଦଳବେହେରା ଯୋଗଦେଇଥିବାବେଳେ ସମ୍ମାନୀତ ଅତିଥି ଭାବେ ଜିଲ୍ଲା ସୂଚନା ଓ ଲୋକସଂପର୍କ ଅଧିକାରୀ ରୀତାକାନ୍ତି ବଳିୟାରସିଂ ଯୋଗ ଦେଇଥିଲେ । ବିଦ୍ୟାଳୟର ଅଧ୍ୟକ୍ଷା ଶ୍ରୀମତୀ ସସ୍ମିତା

ସେନାପତିଙ୍କ ଅଧ୍ୟକ୍ଷତାରେ ଅନୁଷ୍ଠିତ ପୁରସ୍କାର ବିତରଣୀ ଉତ୍ସବରେ ମୁଖ୍ୟଅତିଥି ଶ୍ରୀମତୀ ଦଳବେହେରା କ୍ରୀଡା ପ୍ରତି ଆଗ୍ରହ ରଖିବାକୁ ସମସ୍ତ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ । ଉତ୍ତମ ସ୍ୱାସ୍ଥ୍ୟ ପାଇଁ ଆମ ଜୀବନରେ କ୍ରୀଡାର ମହତ୍ତ୍ୱପୂର୍ଣ୍ଣ ଭୁମିକା ରହିଛି । ସ୍ୱାସ୍ଥ୍ୟ ହିଁ ସଂପଦ କହିବା ସହ ସ୍ୱାସ୍ଥ୍ୟ ଭଲ ଥିଲେ ଆମକୁ ସବୁକାମ କରିବାକୁ ଇଚ୍ଛା ହୁଏ ଯଦି ଆମ ସ୍ୱାସ୍ଥ୍ୟ ଠିକ୍ ରହିବ ନାହିଁ ତାହାଲେ ଆମକୁ କୌଣସି କାମ କରିବାକୁ ଭଲ ଲାଗିବ ନାହିଁ । ତେଣୁ ପିଲାମାନଙ୍କୁ ଭଲ ପାଠ ପଢିବା ସହିତ ନିଜ ସ୍ୱାସ୍ଥ୍ୟ ଠିକ୍ ରଖିବାକୁ ନିୟମିତ ବ୍ୟାୟାମ, ଯୋଗ କରିବାକୁ ପରାମର୍ଶ ଦେଇଥିଲେ । ଡିଆଇପିଆରଓ ସୁଶ୍ରୀ ବଳିୟାରସିଂ କ୍ରୀଡାରେ ଅଂଶଗ୍ରହଣ କରିଥିବା ସମସ୍ତ ଛାତ୍ରଛାତ୍ରୀଙ୍କୁ ଉତ୍ସାହିତ କରିବାସହ କୃତି ପ୍ରତିଯୋଗୀଙ୍କୁ ଧନ୍ୟବାଦ ଦେଇଥିଲେ । ଦୁଇଦିନ ଧରି ଅନୁଷ୍ଠିତ ହୋଇଥିବା ଇନ ଆଉଟ, ପଟାଟୋ ସ୍ପୁନ, ଦୌଡ, ସଟ୍‌ଫୁଟ, ଡିସକସ୍‌, ଲମ୍ବଡିଆଁ, ଉଚ୍ଚଡିଆଁ, ମ୍ୟୁଜିକ ଚେୟାର ଆଦି ବିଭିନ୍ନ ଖେଳରେ ପ୍‌୍ରଥମ, ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରିଥିବା ଓ ଚଂପିଆନ ହୋଇଥିବା ଛାତ୍ରଛାତ୍ରୀଙ୍କୁ ସାର୍ଟିଫିକେଟ ଓ ମେଡାଲ ଦେଇ ଅତିଥିମାନଙ୍କ ଦ୍ୱାରା ପୁରସ୍କୃତ କରାଯାଇଥିଲା । ଏହି

ଅବସରରେ ଅଭିଭାବକ ଓ ଅଭିଭାବିକା ମାନଙ୍କ ମ୍ୟୁଜିକ ଚେୟାର ଖେଳ ଅନୁଷ୍ଠିତ ହୋଇଥିଲା । ଏଥିରେ ପ୍ରଥମ, ଦ୍ୱିତୀୟ, ତୃତୀୟ ସ୍ଥାନ ଅଧିକାର କରିଥିବା ଅଭିଭାବକ ଓ ଅଭିଭାବିକା ମାନଙ୍କୁ ପୁରସ୍କୃତ କରାଯାଇଥିଲା । ଏହାପରେ ମୁଖ୍ୟଅତିଥି ଶ୍ରୀମତୀ ଦଳବେହେରା କ୍ରୀଡାପତାକା ଅଧ୍ୟକ୍ଷାଙ୍କୁ ପ୍ରଦାନ କରି ଖେଳ ଉଦଯାପିତ ହୋଇଥିବା ଘୋଷଣା କରିଥିଲେ । ଏହି କ୍ରୀଡାକୁ ପରିଚାଳନାରେ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟତ୍ରୀ ଓ କର୍ମଚାରୀ ସହଯୋଗ କରିଥିଲେ ।