26-Nov-2022

ବଲାଙ୍ଗୀର,- ବଲାଙ୍ଗୀରର ରାଜ୍ୟପାଳ ପୁରସ୍କାରପ୍ରାପ୍ତ ଆଦର୍ଶ ଶିକ୍ଷକ ଗଣେଶ୍ୱର ମହାନ୍ତି (୯୪)ଙ୍କ ଶନିବାର ପୂର୍ବାହ୍ନ ୧୦ଟା ୨୦ ମିନିଟ୍ ସମୟରେ ପରଲୋକ ହୋଇଛି । ଅସୁସ୍ଥତା ଅନୁଭବ କରିବାରୁ ତାଙ୍କୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ହସ୍ପିଟାଲକୁ ନିଆଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଜଣେ ଛାତ୍ରବତ୍ସଳ, ନୀତିନିଷ୍ଠ ଏବଂ ଆଦର୍ଶ ଶିକ୍ଷକ ଭାବେ ସେ ପରିଚିତ ଥିଲେ । ୧୯୫୪ ମସିହା ୧୩ ସେପ୍େଟମ୍ବରରେ ବଲାଙ୍ଗୀର ନିକଟସ୍ଥ ମଲମଣ୍ଡା ବେସିକ୍ ପ୍ରାଇମେରୀ ସ୍କୁଲରେ ସେ ଶିକ୍ଷକତା ଆରମ୍ଭ କରିଥିଲେ । ବେଲପଡା ବାଳିକା ହାଇସ୍କୁଲ, ଟିଟିଲାଗଡ଼ ବାଳକ ହାଇସ୍କୁଲ, ବଲାଙ୍ଗୀର ବାଳକ ଏମ୍‌ଇ ସ୍କୁଲରେ ସେ ଦୀର୍ଘ ବର୍ଷ ଧରି ଶିକ୍ଷକତା କରିଥିଲେ । ସ୍କୁଲ ଏସଆଇ ଭାବେ ପଦୋନ୍ନତି ପାଇ ଶିକ୍ଷାର ପ୍ରସାର ଦିଗରେ ସେ ଦାୟିତ୍ୱର ସହ କାର୍ଯ୍ୟ କରିଥିଲେ । ଶିକ୍ଷକତା କ୍ଷେତ୍ରରେ ଉଲ୍ଳେଖନୀୟ ଅବଦାନ ପାଇଁ ୧୯୮୬ ମସିହା ଜାନୁଆରୀ ୨୬ ତାରିଖରେ ତତ୍କାଳୀନ ରାଜ୍ୟପାଳ ବିଶମ୍ଭରନାଥ ପାଣ୍ଡେଙ୍କ ଠାରୁ ସେ ରାଜ୍ୟପାଳ ପୁରସ୍କାର ଗ୍ରହଣ କରିଥିଲେ । ଚାକିରିରୁ ଅବସର ଗ୍ରହଣ କରିବା ସମୟ ହୋଇଯାଇଥିଲେ ମଧ୍ୟ ତାଙ୍କ ଶୈକ୍ଷକୀୟ ନିଷ୍ଠା ଓ ଆଦର୍ଶ ଯୋଗୁଁ ତାଙ୍କୁ ଅଧିକ ଦୁଇ ବର୍ଷ ଶିକ୍ଷକତା କରିବାକୁ ଅନୁମତି ଦିଆଯାଇଥିଲା । ୧୯୮୯ ମସିହାରେ ସେ ଚାକିରୀରୁ ଅବସର ଗ୍ରହଣ କରିଥିଲେ । ମୂଲ୍ୟବୋଧ ଭିତ୍ତିିକ ନୈତିକ ଶିକ୍ଷା ଉପରେ ସେ ଜୋର ଦେଇ ଆସୁଥିଲେ । ଜୀବନର ଶେଷ ପର୍ଯ୍ୟନ୍ତ ଜଣେ ଆଦର୍ଶ ଶିକ୍ଷକର ଜୀବନ ଜୀଇଁ ଛାତ୍ରୀଛାତ୍ର ଓ ଅଭିଭାବକଙ୍କୁ ପ୍ରେରଣା ଯୋଗାଇ ଆସିଥିଲେ । ତାଙ୍କ ବିୟୋଗ ଖବର ପ୍ରଚାରିତ ହେବା ପରେ ବହୁ ବିଶିଷ୍ଟ ବ୍ୟକ୍ତି, ଓକିଲ, ପ୍ରତିଷ୍ଠିତ ବ୍ୟବସାୟୀ, ଗଣମାଧ୍ୟମ ପ୍ରତିନିଧି ଓ ପୁରାତନ ଛାତ୍ର ତାଙ୍କ ତୁଳସୀନଗର ସ୍ଥିତ ବାସଭବନକୁ ଯାଇ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ତାଙ୍କ ବିୟୋଗ ସମୟରେ ସ୍ତ୍ରୀ କାନନବାଲା ମହାନ୍ତି, ୪ ପୁଅ ଜ୍ୟେଷ୍ଠପୁତ୍ର ଜ୍ଞାନେନ୍ଦ୍ର ମହାନ୍ତି, ଆଡଭୋକେଟ ଅମୀୟ ମହାନ୍ତି, ଅନୀଲ ମହାନ୍ତି ଓ ସାନପୁଅ ସାମ୍ବାଦିକ ସୁନୀଲ କୁମାର ମହାନ୍ତି, ବୋହୂ, ନାତିନାତୁଣୀ, ସମ୍ପର୍କୀୟ ଉପସ୍ଥିତ ଥିଲେ । ଦାହ ସଂସ୍କାର ପାଇଁ ସ୍ୱର୍ଗତ ମହାନ୍ତିଙ୍କ ମରଶରୀର ପୁରୀ ସ୍ୱର୍ଗଦ୍ୱାରକୁ ନିଆଯାଇଛି । ସେଠାରେ ଆଜି ତାଙ୍କ ଅନ୍ତ୍ୟେଷ୍ଠି କ୍ରିୟା ସମ୍ପନ୍ନ ହେବ ।
    ଆଦର୍ଶ ଶିକ୍ଷକ ମହାନ୍ତିଙ୍କ ବିୟୋଗରେ ବଲାଙ୍ଗୀର ବିଧାୟକ ନରସିଂହ ମିଶ୍ର, ପୌରାଧ୍ୟକ୍ଷା ଲିକା ସାହୁ, ଆଡଭୋକେଟ ଭାବନୀ ଶଙ୍କର ଶତପଥି, ପ୍ରିୟରଞ୍ଜନ ବହିଦାର, ରତନ ମହାରଣା, ସନ୍ତୋଷ ପାଢ଼ୀ, ଜିଲା କ୍ରୀଡା ସଂସଦ ସଭାପତି ହରି ନାରାୟଣ ପୂଜାରୀ, ଶିଳ୍ପଦ୍ୟୋଗୀ କିଶୋର ରଥ, ପ୍ରେସ କ୍ଳବ୍ ସଭାପତି ଅରୁଣ ମିଶ୍ର, ମନରଞ୍ଜନ ଯୋଷୀ, ବୀରେନ୍ଦ୍ର କୁମାର ଝାଙ୍କର, ଶିଶିର ଶତପଥି, ପୂର୍ଣ୍ଣଚନ୍ଦ୍ର ପଣ୍ଡା, ଶରତ ମିଶ୍ର, ବଳରାମ ମିଶ୍ର, ପ୍ରଦୀପ୍ତ ମିଶ୍ର, ଗୁପ୍ତେଶ୍ୱର ପୃଷ୍ଠି, ସଂଗ୍ରାମ ବହିଦାର, ଅଜିତ କୁମାର ମହାନ୍ତି, ପ୍ରଶାନ୍ତ ମହାକୁର, ବିଭୂ କଲ୍ୟାଣ ଗଡତ୍ୟା, ସନ୍ଦୀପ କୁମାର କୁଅଁର,  ତୁଳସୀନଗର ଦୁର୍ଗାପୂଜା କମିଟି ସଦସ୍ୟ ଓ ଅନ୍ୟମାନେ ଗଭୀର ଶୋକ ପ୍ରକାଶ କରିଛନ୍ତି ।ା