01-Dec-2020

 ବଲାଙ୍ଗୀର,(ସନ୍ତୋଷ କୁମାର ଠାକୁର)- ଗତ ସେପ୍ଟେମ୍ବର ୨୪ ତାରିଖରେ ସେନାବାହିନୀ ଦିଲ୍ଲୀ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ସେନାର ଜବାନ ସୁମନ୍ତ ପ୍ରଧାନଙ୍କ ଅକାଳ ବିୟୋଗ ହୋଇଥିଲା । ସେନା ପକ୍ଷରୁ ତାଙ୍କ ମରଶରୀରକୁ ଲୋଇସିଂହା ବ୍ଲକର ତେନ୍ତୁଲି ଗ୍ରାମକୁ ଅଣାଯାଇ ହଜାର ହଜାର ଗ୍ରାମବାସୀଙ୍କ ସମାଗମରେ ଶେଷକୃତ୍ୟ ସମାପନ କରାଯାଇଥିଲା । ସେନା ମୁଖ୍ୟାଳୟ ପକ୍ଷରୁ ଦିଲ୍ଲୀରୁ ରସାନନ୍ଦ ଭୋଇ ନାମକ ଜଣେ ଜବାନ ସ୍ୱର୍ଗତ ସୁମନ୍ତ ପ୍ରଧାନଙ୍କ ପତ୍ନୀଙ୍କ ପେନ୍‌ସନ୍ ସକାଶେ କାଗଜପତ୍ର ନେଇ ପହଞ୍ଚି ଥିଲେ । ସେହି ଜବାନ ବଲାଙ୍ଗୀର ପୂର୍ବତନ ସୈନିକ ସଂଘର ସଂପାଦକ ପ୍ରତାପ ଚନ୍ଦ୍ର ରଥଙ୍କ ସହାୟତାରେ ସମସ୍ତ କାଗଜପତ୍ର ପ୍ରସ୍ତୁତ କରି ସ୍ୱର୍ଗତ ପ୍ରଧାନଙ୍କ ପତ୍ନୀଙ୍କୁ ହସ୍ତାନ୍ତର କରିଥିଲେ । ଆସନ୍ତା ଜାନୁୟାରୀ ମସରୁ ସ୍ୱର୍ଗତ ପ୍ରଧାନଙ୍କ ପତ୍ନୀ ସମସ୍ତ ପ୍ରାପ୍ୟ ପାଇବେ ବୋଲି ସଂଘର ସଂପାଦକ ଶ୍ରୀ ରଥ ତଥା ସଦସ୍ୟ ଘାସିରାମ ବେହେରା ଓ ନରହରି ବେହେରା ସୂଚନା ଦେଇଛନ୍ତି । ସଂଘ ସବୁବେଳେ ସୈନିକ ପରିବାର ସହ ରହିଛି ଓ ରହିଥିବ ବୋଲି ପୂର୍ବତନ ସୈନିକ ସଂଘର ସଂପାଦକ ପ୍ରତାପ ଚନ୍ଦ୍ର ପ୍ରକାଶ କରିଛନ୍ତି ।