31-Oct-2022

ଅଖଣ୍ଡ ଭାରତର  ବିନ୍ଧାଣୀ ,ଏକତା,ଦୃଢ଼ତା, ଆତ୍ମ ନିର୍ଭରଶୀଳ ଏବଂ  ଅଦମ୍ୟ ସାହସର  ପ୍ରତିମୂର୍ତ୍ତି ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜୟନ୍ତୀ ଅବସରରେ ବଲାଙ୍ଗିର ଜ଼ିଲ୍ଲା ପୁଇଁତଲା ବ୍ଲକ ଅନ୍ତର୍ଗତ ଛତାପିପଲ ଗ୍ରାମରେ ଭାରତ ସରକାରଙ୍କ ସୂଚନା ଏବଂ ପ୍ରସାରଣ ମନ୍ତ୍ରଣାଳୟ  ଅନ୍ତର୍ଗତ କେନ୍ଦ୍ରୀୟ ସଂଚାର ବ୍ୟୁରୋ , ଭବାନୀପାଟଣା ଦ୍ୱାରା ରାଷ୍ଟ୍ରୀୟ ଏକତା ଦିବସ ଏବଂ ଆଜାଦୀ କା ଅମୃତ ମହୋତ୍ସବ ଶୀର୍ଷକ ଦୁଇ ଦିନିଆ କାର‌୍ୟ୍ୟକ୍ରମ ଆୟୋଜିତ ହୋଇଯାଇଛି । ଏହି ଅବସରରେ ଆୟୋଜିତ ହୋଇଥିବା ଏକତା ଦୌଡରେ  ଲୋଇସିଂଘା ବିଧାୟକ ଡ଼. ମୁକେଶ ମହାଲିଙ୍ଗଙ୍କ ସହ   ଶହେରୁ ଊର୍ଧ୍ୱ ଲୋକ ଅଂଶ ଗ୍ରହଣ କରିଥିଲେ । ବିଭାଗ ଦ୍ୱାରା ଆୟୋଜିତ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜୀବନୀ, ସଂଘର୍ଷ, ତଥା ଭାରତର ସ୍ଵାଧୀନରେ ଅଂଶ ଗ୍ରହଣ କରିଥିବା ମହାନ ସଂଗ୍ରାମୀଙ୍କ  ଉପରେ  ଆଧାରିତ ଏକ  ଫଟୋ ଚିତ୍ର ପ୍ରଦର୍ଶିନୀ କୁ ମଧ୍ୟ  ବିଧାୟକ ଶ୍ରୀ  ମହାଲିଙ୍ଗ ଉଦ୍ଘାଟନ କରିଥିଲେ।   ପରେ ଏକ ସ୍ୱତନ୍ତ୍ର ଆଲୋଚନା ଚକ୍ରରେ ମୁଖ୍ୟ ଅତିଥି ଭାବେ ଅଂଶ ଗ୍ରହଣ କରି  ବିଧାୟକ ଶ୍ରୀ ମହାଲିଙ୍ଗ ଉପସ୍ଥିତ ଜନତାଙ୍କୁ ଦେଶପ୍ରତି ନିଜର ସର୍ବୋଚ୍ଚ ଅବଦାନ ଦେବାସହ ଏକ ବଳିଷ୍ଠ ରାଷ୍ଟ୍ର ନିର୍ମାଣ କରିବାପାଇଁ ଆହ୍ୱାନ ଦେଇଥିଲେ ।   ଅନ୍ୟତମ ଅତିଥି ଭାବେ ଅଂଶ ଗ୍ରହଣ କରି   ଅବସରପ୍ରାପ୍ତ ପ୍ରାଧ୍ୟାପକ ଡ଼.ଶିବ ପ୍ରସାଦ ନନ୍ଦ, ବଲାଙ୍ଗିର ସ୍ଥିତ ବିନାୟକ ପବ୍ଲିକ ସ୍କୁଲର ଅଧ୍ୟକ୍ଷା ତଥା ପରିଚାଳନା ନିର୍ଦେଶିକା ଶ୍ରୀମତୀ ସରସ୍ଵତୀ  ନନ୍ଦ, ଭାରତୀୟ

ବାୟୁ ସେନାର ଅବସରପ୍ରାପ୍ତ ସର୍ଜଣ୍ଟ ଶ୍ରୀ ବିଭୁତି ଭୂଷଣ ପାଣିଗ୍ରାହୀ, ସ୍ଥାନୀୟ ସରପଞ୍ଚ ଶ୍ରୀମତୀ ଶୈଳେନ୍ଦ୍ରି ପାତ୍ର, ଲୌହ ପୁରୁଷ ସର୍ଦ୍ଦାର ପଟେଲଙ୍କ ଭାରତର ଏକତ୍ରୀକରଣରେ ଉଲ୍ଲେଖନୀୟ ଅବଦାନ, ତାଙ୍କ ଜିବନୀ ତଥା ଭାରତର ସ୍ୱାଧୀନତା ରେ ଅଂଶ ଗ୍ରହଣ କରିଥିବା ସଂଗ୍ରାମୀ ଏବଂ ଅପରିଚିତ ଯୋଦ୍ଧାଙ୍କ ବଳିଷ୍ଠ ଅବଦାନ, ତ୍ୟାଗ ସମ୍ପର୍କରେ ଉପସ୍ଥିତ ଜନତାଙ୍କୁ ଅନୁପ୍ରାଣିତ କରିଥିଲେ । ପରେ ପଂଚାୟତର ବିଭିନ୍ନ ଗ୍ରାମରୁ ଆସିଥିବା ମହିଳାଙ୍କ ମଧ୍ୟରେ ଚୌକି ବସା ଏବଂ ହୁଳୁ ହୁଳି ପ୍ରତିଯୋଗିତା ମଧ୍ୟ ଆୟୋଜନ ହୋଇଥିଲା ।   
କାର‌୍ୟ୍ୟକ୍ରମର ଶେଷ ଭାଗରେ ବିଭାଗର ପଂଜିକୃତ କଳାକାରଙ୍କ ଦ୍ୱାରା ସୂଚନା ଧର୍ମୀ ସାଂସ୍କୃତିକ କାର‌୍ୟ୍ୟକ୍ରମ ପରିବେଷଣ କରାଯାଇଥିଲା ।  ଏହି କାର‌୍ୟ୍ୟକ୍ରମକୁ କେନ୍ଦ୍ରୀୟ ସଂଚାର  ବ୍ୟୁରୋ, ଭବାନୀପାଟଣାର   କ୍ଷେତ୍ର ପ୍ରଚାର ଅଧିକାରୀ ଶ୍ରୀ ବିଷ୍ଣୁ ଚରଣ ସାହୁ ସଫଳ ରୂପେ ପରିଚାଳନା କରିଥିବା ବେଳେ, ସମାଜ ସେବୀ ଶ୍ରୀ ଦେବୀ ମିଶ୍ର, ଶ୍ରୀ ସରୋଜ ମହାକୁଡ଼, ଶ୍ରୀ ଲକ୍ଷ୍ମୀଧର ପାତ୍ର ବିଶେଷ ସହଯୋଗ କରିଥିଲେ । କାର‌୍ୟ୍ୟକ୍ରମରେ ପଂଚାୟତର ବିଭିନ୍ନ ଭାଗରୁ ୧ହଜାରରୁ ଉର୍ଦ୍ଧ୍ବ ଲୋକ ଅଂଶ ଗ୍ରହଣ କରିଥିଲେ।