26-Oct-2022

ବିନିକା(ହିମାଂଶୁ ଶେଖର ପୁଟେଲ) ୨୨ତାରିଖ ବିଳମ୍ବିତ ରାତ୍ରୀରେ ବିନିକା ଅଞ୍ଚଳର ପ୍ରସିଦ୍ଧ ଶୈବପୀଠ ଚରଦା ସ୍ଥିତ ବାବା କପିଳେଶ୍ୱର ମନ୍ଦିରର ୩ଟି ଦାନବାକ୍ସରେ ଶ୍ରଦ୍ଧାଳୁ ଭକ୍ତ ଦାନ କରିଥିବା ପ୍ରାୟ ୨୫ହଜାର ଟଙ୍କାକୁ କେତେକ ମୁଖା ପିନ୍ଧା ଦୁର୍ବୃତ୍ତ ଚୋରି କରିନେଇଥିବା ଟ୍ରଷ୍ଟ ବୋର୍ଡ ସଭାପତି ଅଶୋକ କୁମାର ପୃଷ୍ଟି ଥାନାରେ ଅଭିଯୋଗ କରିଥିଲେ ।ପୋଲିସ ଅନୁସନ୍ଧାନ କୁକୁର ସହ ଏବଂ ଗତକାଲି ବଲାଙ୍ଗୀର  ସାଇନ୍ତିଫିକ ଟିମ ଦ୍ଵାରା ତଦନ୍ତ ଜାରି ରଖିଥିଲା ।ପ୍ରାୟ ଦୁଇଦିନ ଧରି ପୋଲିସ ତରଫରୁ ତଦନ୍ତ ଚାଲି ରହିଥିଲେ ହେଁ ଗତକାଲି ଏହି ଚୋରିରେ ସଂପୃକ୍ତ ଥିବା ସନ୍ଦେହରେ ଦୁଇ ଜଣ ଯୁବକକୁ ପୋଲିସ ଗିରଫ କରି ଥାନାରେ ଅଟକ ରଖି ଟିକିନିଖି ଭାବେ ପଚରାଉଚୁରା କରୁଥିବା ଥାନା ଅଧିକାରୀ ପବିତ୍ର ସାହୁ ସୂଚନା ଦେଇଛନ୍ତି ।ସୂଚନା ଯୋଗ୍ୟ ଯେ ଆଜି ସକାଳେ କିଛି ମହିଳା  ନିକଟସ୍ଥ ଶନିଶ୍ଚର୍ ମନ୍ଦିର ଆଡ଼େ ଯାଇଥିବା ବେଳେ ଏକ ଦାନବାକ୍ସ ଓ ଲାଲ ରଙ୍ଗର ପତାକା ପଡ଼ିଥିବା ଦେଖିବାକୁ ପାଇଥିଲେ। ପରେ ପୋଲିସକୁ ଖବର ଦେବାପରେ ତତକ୍ଷଣାତ୍ ପୋଲିସ ଘଟଣା ସ୍ଥଳରେ ପହଞ୍ଚି ସାମଗ୍ରୀ ଜବତ କରିଥିଲା।  ଏହି ଚୋରି ଘଟଣାରେ ଆହୁରି କେତେକ ବ୍ୟକ୍ତି ସାମିଲ ଅଛନ୍ତି ବୋଲି ସାଧାରଣରେ ଆଲୋଚନା ହେଉଛି । ।ଅନ୍ୟ ପକ୍ଷରେ ଗତ ୨୦୧୧ମସିହାରେ ଏହି ମନ୍ଦିରରୁ ଚୋରି ହୋଇ ଥିବା ସୁନା ଅଳଙ୍କାର ସାମଗ୍ରୀ ଅଦ୍ୟାବଧି ମିଳି ନଥିବା ବେଳେ ଚୋର ମଧ୍ୟ ଧରାପଡିନାହନ୍ତି। ତେଣୁ ପୋଲିସ ପାଇଁ ଏହି ଘଟଣା ଏକ ପ୍ରକାର ଚ୍ୟାଲେଞ୍ଜ ସୃଷ୍ଟି କରିଥିବା ବେଳେ ଚୋରି ଘଟଣାର ପର୍ଦ୍ଦାଫାଶ କେବେ ହେବ ଓ ଚୋରି ସାମଗ୍ରୀ କେବେ ମିଳିବ ସମୟ ହିଁ କହିବ ।