19-Oct-2022

ବିନିକା(ହିମାଂଶୁ ଶେଖର ପୁଟେଲ) ଖେଳ..ଖେଳ...ଖେଳ । ଯେକୌଣସି ଖେଳ ମନୋରଞ୍ଜନ ପାଇଁ ହେଉ ଅବା ନିଜ ସ୍ୱାସ୍ଥ୍ୟର ଉନ୍ନତି ପାଇଁ ଖେଳାଯାଏ l ଯେଉଁଥିରୁ ଉଭୟ ଖେଳାଳି ଓ ଦର୍ଶକ ମଜା ଉଠାଇଥାନ୍ତି ।ଠିକ ସେହିପରି ପ୍ରତିଟି ଖେଳରେ ହାରଜିତ ଲାଗି ଥାଏ କୌଣସି ପକ୍ଷ ସବୁବେଳେ ହାରେନି କି ସବୁବେଳେ ଜିତେନି ।ମାତ୍ର ଏମିତି ଏକ ଖେଳ ରହିଛି ଯେଉଁଠି କେବଳ ଖେଳାଳୀର ଲସ ହିଁ ଲସ ହୋଇଥାଏ । ଥରେ ମାତ୍ର ଏହି ଖେଳ ପ୍ରତି ଆକର୍ଷିତ ହେଲେ,ସରିଲା । ପରେ ଚାହିଁଲେ ବି ଜଣେ ସହଜେ ଏଥିରୁ ଦୂରେଇ ପାରେନା। ଏପରି କି ଟଙ୍କା ଲୋଭରେ ଖେଳାଳି ଜଣକ କେତେବେଳେ ଭିକାରୀ ହୁଏ ଜାଣି ବି ପାରେନି ।ଏହି ସାଙ୍ଘାତିକ ଖେଳ ହେଉଛି ଜୁଆ ।କଳା,ସଂସ୍କୃତିର ଜିଲ୍ଲା ସୁବର୍ଣ୍ଣପୁରର ବିନିକା ସହର ସମେତ ସାରା ବ୍ଳକ ଅଞ୍ଚଳର ବିଭିନ୍ନ ଗ୍ରାମରେ କ୍ରିକେଟ,ଫୁଟବଲ ଖେଳ ପରି ଏହି ଜୁଆ ଖେଳର ବେଶ ଚାହିଦା ବୃଦ୍ଧି ପାଇଛି l

ସେଥିପାଇଁ ସମ୍ପ୍ରତି ବିନିକାକୁ ଜୁଆର ନଗରୀ ବୋଲି କହିଲେ ଅତ୍ୟୁକ୍ତି ହେବ ନାହିଁ । ପୌରାଣିକ ଯୁଗରୁ ଚାଲି ଆସିଥିବା ଏହି ଭୟାନକ ଖେଳର ଅନେକ ଭୟାବହତା ନଜରକୁ ଆସିଛି ।ହେଲେ ଅର୍ଥ ଲୋଭି ମଣିଷ ତଥାପି ଏଥିରୁ ନିଜକୁ ଦୂରେଇ ପାରୁନି । ସୋନପୁର ଜିଲ୍ଲା ବିନିକା ଅଞ୍ଚଳରେ ଏବେ ଜୁଆପାଲି ଦିନକୁ ଦିନ ବଢିବଢି ଚାଲିଛି । ଲୋପ ପାଇବ କ'ଣ ଓଲଟା ଡବଲ୍ ଟିବଲ ଚାଲିଛି । ସନ୍ଧ୍ୟା ହେବାମାତ୍ରେ ଜୁଆଡୀଙ୍କ ରାଜ ଚାଲୁଛି ।ଗୋଟିଏ ସ୍ଥାନରେ ପଡ଼ିଲେ ତାର କିଛିଦିନ ପରେ ପୁଣି ପ୍ରତିଯୋଗିତା ମୂଳକ ଭାବେ ଅନ୍ୟ ସ୍ଥାନରେ ଘୁଡୁଘୁଡୁ ପଟ୍ଟି ର ଖେଳ ଜୋରଦାର ହେଉଛି । ସୂଚନାଯୋଗ୍ୟ ଯେ ପଶ୍ଚିମ ଓଡ଼ିଶାର ପ୍ରାଣ କେନ୍ଦ୍ର ସମ୍ବଲପୁର ଓ ବରଗଡ଼ ଜିଲ୍ଲାରେ ଏହି ବେଆଇନ ଖେଳକୁ ରୋକ ଲଗାଯାଇଥିବା ବେଳେ ସୁବର୍ଣ୍ଣପୁର ଜିଲ୍ଲାରେ ଖୁଲମଖୁଲା ଚାଲିଛି ।ଖର୍ଚ୍ଚାନ୍ତ ଯୋଗୁଁ ଦିନକୁ ଦିନ ଲୁଚି ଯାଉଥିବା କ୍ରିକେଟ, କବାଡି, ଖୋକୋ, ଫୁଟବଲ ଆଦି ଖେଳକୁ ମୁହିଁ ମୋଡୁଥିବା ଆଜିର ଯୁବ ପିଡି ଏହି ବେଆଇନ ଜୁଆ ଖେଳ ପ୍ରତି ଆକର୍ଷିତ ହେଉଥିବାରୁ ଏହାର ପ୍ରାଧାନ୍ୟ ବଡିବାରେ ଲାଗିଛି ।ମଝିରେ ମଝିରେ ଏହି ଖେଳ ପ୍ରତି ରୋକ ଲଗାଇବା ପାଇଁ ଖବର ପ୍ରକାଶ ପାଉଥିଲେ ମଧ୍ୟ ନା ଖେଳାଳି ନା ଜୁଆ ମାଫିଆଙ୍କ ଠାରେ ପ୍ରଭାବ ପଡୁଛି । ସ୍ଥାନୀୟ  ପୋଲିସ ବି ଏମାନଙ୍କ ପାଇଁ ସତରେ ଆଖି ବୁଜି ଦେଇଛି ବୋଲି ସଚେତନ ନାଗରିକ ମହଲରେ ଆଲୋଚନା ହେଉଛି ।ସାପ୍ତାହିକ ବଜାର, ଯାନିଯାତ୍ରା ନାମରେ ଏହି ଖେଳ ଜୋରସୋର ଭାବରେ ଚାଲୁଥିବା ଜଣାପଡିଛି । ଜୁଆରେ ଛୋଟ ବାଳକଙ୍କ ଠୁଁ ଆରମ୍ଭ କରି ବୁଡ଼ା ପର୍ଯ୍ୟନ୍ତ ସମସ୍ତେ ବାଇଆ ।ମାତ୍ର ଥରେ ଦୁଇଥର କିଛି ଟଙ୍କା ପାଇ ଅଧିକାଂଶ ଥର ହାରୁଥିବା ନଜିର ରହିଛି । ଜୁଆ ଯୋଗୁଁ ଚୋରି ହାରି ମଧ୍ୟ

ବୃଦ୍ଧି ପାଉଛି । ଅଧିକ ଲୋଭରେ କେତେକ ଘରୁ ହେଉ କି ଅନ୍ୟଠୁଁ ଚୋରି କରି ଜୁଆ(ଘୁଡୁଘୁଡୁ ପଟ୍ଟି) ଖେଳ ଖେଳୁଛନ୍ତି ।ଏହା ଯୋଗୁଁ ଅଶାନ୍ତି ମଧ୍ୟ ସୃଷ୍ଟି ହେଉଛି ।ସମାଜସେବୀ,ବୁଦ୍ଧିଜୀବୀ ତଥା ଅଞ୍ଚଳର ସଚେତନ ନାଗରିକ ଏଭଲି ଖେଳରୁ ଦୂରେଇ ରହିବାକୁ ଯେତେ ବୁଝାଇଲେ ମଧ୍ୟ ଜୁଆଡି ଉପରେ ଏହାର କୌଣସି ପ୍ରଭାବ ପଡ଼ୁନାହିଁ । ପୋଲିସ ଚାହିଁଲେ ଏହି ଖେଳ ଉପରେ ରୋକ ଲାଗନ୍ତା ହେଲେ ଟଙ୍କା ମୋହ ପାଇଁ ପୋଲିସ ପ୍ରଶାସନ କି ପ୍ରଶାସନିକ ସ୍ତରରେ କେହିବି ଗୁରୁତ୍ତ୍ଵ ଦେଉ ନଥିବା ସାଧାରଣରେ ଚର୍ଚା ହେଉଛି ।