16-Oct-2022

ସମ୍ବଲପୁର (ପ୍ରେରଣା ଖବର) ସମ୍ବଲପୁରର ଅଗ୍ରଣୀ ଶିକ୍ଷା ଓ ସାମାଜିକ ଅନୁଷ୍ଠାନ ସେତୁର ସ୍ୱନକ୍ଷତ୍ର ଦିବସ ଆଜି ସ୍ଥାନୀୟ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ସଂସ୍ଥାନ(ଡିଆଇଇଟି)ପରିସରରେ ଆୟୋଜିତ ହୋଇଯାଇଛି। ଅନୁଷ୍ଠାନର ସଭାପତି ଡ.ମୀନକେତନ ପାଠୀଙ୍କ ଅଧ୍ଯକ୍ଷତାରେ ଅନୁଷ୍ଠିତ ଏହି ସଭାରେ ମୁଖ୍ୟଅତିଥି ଭାବରେ ଯୋଗଦେଇ ଓଡିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଅର୍କ କୁମାର ଦାଶ ମହାପାତ୍ର ତାଙ୍କ ବକ୍ତବ୍ୟରେ କହିଥିଲେ ଯେ,ଜୀବନର ପ୍ରତିଟି ମୁହୂର୍ତ୍ତରେ ମଣିଷର କିଛି ନା କିଛି ଶିଖିବାର ରହିଥାଏ। ମଣିଷ ପାଇଁ ଶିକ୍ଷାର ଅନ୍ତ ନାହିଁ।ସମାଜରେ ଶୈକ୍ଷିକ ବାତାବରଣ ସୃଷ୍ଟି କରିବାରେ ସେତୁ ଭଳି ଅନୁଷ୍ଠାନର ବଳିଷ୍ଠ ଭୂମିକା ରହିଛି ବୋଲି ଦର୍ଶାଇ  ସେ ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ ପକ୍ଷରୁ କିପରି ସବୁ ବର୍ଗର ଶିକ୍ଷାର୍ଥୀମାନଙ୍କ ନିମନ୍ତେ ବିଭିନ୍ନ ପାଠ୍ୟକ୍ରମର ସୁବ୍ୟବସ୍ଥା ରହିଛି ତଥା ଆଗକୁ ଯେପରି ଅଧିକରୁ ଅଧିକ ଶିକ୍ଷାର୍ଥୀ ଏହାର ବିଭିନ୍ନ କାର୍ଯ୍ୟକ୍ରମ ଦ୍ୱାରା ଉପକୃତ ହୋଇପାରିବେ ସେ ସମ୍ପର୍କରେ ଆଲୋଚନା କରି ସେତୁ ଭଳି ଶୈକ୍ଷିକ ସଂସ୍ଥା ଭବିଷ୍ଯତରେ ଏତାଦୃଶ କାର୍ଯ୍ୟକ୍ରମରେ ସହଯୋଗ କରିପାରିବେ ବୋଲି ମତ ରଖିବା ସହ ୨୫ତମ ସ୍ୱନକ୍ଷତ୍ର ଦିବସ ଉପଲକ୍ଷେ ଅଭିନନ୍ଦନ ଜଣାଇ ଥିଲେ।

ଏହି ଅବସରରେ 'ସେତୁ ସାହିତ୍ଯ ପତ୍ରିକା’ର ଲୋକାର୍ପଣ କରାଯାଇଥିବା ବେଳେ ଗତ ମେଟ୍ରିକ ପରୀକ୍ଷାରେ ସର୍ବୋଚ୍ଚ ସଂଖ୍ୟା ରଖି ଉତ୍ତୀର୍ଣ ହୋଇଥିବା ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ଏଥରେ ଅବିଭକ୍ତ ସମ୍ବଲପୁର ଜିଲ୍ଲାରୁ ସର୍ବୋଚ୍ଚ ସଂଖ୍ୟା ରଖିଥିବା ସରସ୍ୱତୀ ଶିଶୁବି ଦ୍ୟାମନ୍ଦିର,ବରଗଡର ତେଜସ୍ୱୀ କୁମାର ସାହୁଙ୍କୁ ସ୍ୱାଧୀନତା ସଂଗ୍ରାମୀ ପଣ୍ଡିତ ଘନଶ୍ୟାମ ପାଣିଗ୍ରାହୀ ସ୍ମୃତି ପୁରସ୍କାର ତଥା ସମ୍ବଲପୁର ଜିଲ୍ଲାରୁ ଯୁଗ୍ମ ଭାବରେ ସର୍ବୋଚ୍ଚ ସଂଖ୍ୟା ରଖିଥିବା ଦିବ୍ୟାଂଶୁ ସାହୁ,ସରସ୍ୱତୀ ଶିଶୁ ବିଦ୍ୟାମନ୍ଦିର,ହୀରାକୁଦ ଓ ସରସ୍ୱତୀ ଶିଶୁ ବିଦ୍ୟାମନ୍ଦିର,ଗୋବିନ୍ଦପାଲିର ଗୀତିକା ପ୍ରଧାନଙ୍କୁ କ୍ଷୀରୋଦ ପ୍ରସାଦ ମିଶ୍ର ସ୍ମୃତି ପୁରସ୍କାର ପ୍ରଦାନ କରାଯାଇଥିଲା। ସଭାରେ ଆୟୋଜିତ ସାହିତ୍ଯ ଆସରରେ ଜୟକୃଷ୍ଣ ବେହେରା,ପ୍ର.ଗିରିଜା ଶଙ୍କର ଶର୍ମା,ସୁନୀତି ମିଶ୍ର,ଆର୍ତ୍ତତ୍ରାଣ ମିଶ୍ର,ପ୍ର.କାମଦେବ ସାହୁ,ପଦ୍ମାଳୟା ପଣ୍ଡା,ସୁଧୀର ମିଶ୍ର,ଡ. ସ୍ୱୟଂପ୍ରକାଶ ପଣ୍ଡା,ରୀତାରାଣୀ ମିଶ୍ର,ଧ୍ରୁବ ପ୍ରସାଦ ପଣ୍ଡା,ଅଶୋକ କୁମାର ଶତପଥୀ,ମାହେଶ୍ୱରୀ ପ୍ରସାଦ ପାଣିଗ୍ରାହୀ,ଡ. ସିଦ୍ଧାର୍ଥ ପଣ୍ଡା ପ୍ରମୁଖ ସ୍ୱରଚିତ କବିତା ଓ ଗଳ୍ପ ପାଠ କରିଥିଲେ ସମ୍ପାଦକ ସୁକାନ୍ତ କର ଏହି ସଭା ସଂଯୋଜନା କରିଥିବା ବେଳେ  ସଭା ପୂର୍ବରୁ ହୋଇଥିବା ଅନୁଷ୍ଠାନର ସାଧାରଣ ପରିଷଦ ବୈଠକରେ ବାର୍ଷିକ ବିବରଣୀ ପାଠ କରିଥିଲେ ଏବଂ  କୋଷାଧ୍ୟକ୍ଷ ରବିନାରାୟଣ ପ୍ରଧାନ ବାର୍ଷିକ ଆୟବ୍ୟୟର ହିସାବ ଉପସ୍ଥାପନ କରିଥିଲେ।ଶେଷରେ ସହସମ୍ପାଦକ ହରି ନାରାୟଣ ପଣ୍ଡା ଧନ୍ୟବାଦ ଅର୍ପଣ କରିଥିଲେ।