11-Oct-2022

ବିନିକା(ହିମାଂଶୁ ଶେଖର ପୁଟେଲ) କଳା ଓ ସଂସ୍କୃତିର ଜିଲ୍ଲା ସୁବର୍ଣ୍ଣପୁରର ବିନିକା ଓ ଫୁଲମୁଠିରେ ପୃଥକ ପୃଥକ ଭାବରେ ଗୋକୁଲାଷ୍ଟମୀ ଯାତ୍ରା ମହୋତ୍ସବ ପାଳନ ନେଇ ପ୍ରସ୍ତୁତି ଆରମ୍ଭ ହୋଇଛି ।ପୌରାଣିକ ଐତିହାସିକ କିମ୍ବଦନ୍ତୀ ଉପରେ ଆଧାରିତ ଭଗବାନ ଶ୍ରୀକୃଷ୍ଣଙ୍କ ବାଲ୍ୟଲୀଳା ଠୁଁ ଆରମ୍ଭ ହୋଇ ପ୍ରଭୁଙ୍କ ଗୋ ଚାରଣ,ମଥୁରାର କଂସ ଦରବାର,ନିମନ୍ତ୍ରିତ ଅତିଥି ମାନଙ୍କୁ ସମ୍ମାନିତ ସହ ରାଜ୍ୟର ବିକାଶ ପାଇଁ ନିର୍ଦ୍ଦେଶ,ଦୈବବାଣୀରେ ବିଚଳିତ ତ୍ରିଭୁବନ ବିଜୟୀ କଂସ ଭଣଜା କୃଷ୍ଣଙ୍କ ନିଧନ ପାଇଁ   ଗୋପପୁରକୁ ରାକ୍ଷସ ପ୍ରେରଣ,କୃଷ୍ଣଙ୍କ ଦ୍ଵାରା ଦାନବ କୂଳ ନିହତ,କୃଷ୍ଣଙ୍କ ପରାକ୍ରମରେ ସାରା ଗୋପପୁର ବାସିଙ୍କ ତରଫରୁ ବିଜୟ ଉତ୍ସବ ପାଳିତ ହେବା ସହ କୃଷ୍ଣ ବଳରାମଙ୍କ ନଗର ପରିକ୍ରମା ଆଦି ଦୃଶ୍ୟ ନାଟ୍ୟାଭିନୟ କ୍ରମରେ ପ୍ରଦର୍ଶିତ ହୋଇଥାଏ ।ବିଗତ ଦୁଇ ବର୍ଷ ଧରି କରୋନା କଟକଣା ଯୋଗୁଁ ପୂଜା ବିଧିରେ ସୀମିତ ଥିବା ଏହି ଯାତ୍ରା ମହୋତ୍ସବ ଚଳିତ ବର୍ଷ ଉଭୟ ସ୍ଥାନରେ ବେଶ ଯାକଯମକରେ ପାଳନ କରିବା ନେଇ ପ୍ରସ୍ତୁତି ଆରମ୍ଭ ହୋଇଛି ।ଏହି ବ୍ଳକ ଅନ୍ତର୍ଗତ ଫୁଲମୁଠି ଉପରପଡ଼ା ପୂଜାମଣ୍ଡପ ଠାରେ ଅନୁଷ୍ଠିତ ବୈଠକରେ ବ୍ରଜବିହାରୀ ନାଟ୍ୟନୁଷ୍ଟାନର ସମସ୍ତ ସଦସ୍ୟଙ୍କ ସମେତ ଗ୍ରାମବାସୀ ଉପସ୍ଥିତ ରହି ଯାତ୍ରା ପରିଚାଳନା ନେଇ ଆଲୋଚନା କରିଥିଲେ ।ପରେ ଯାତ୍ରା ଉଦୋକ୍ତା ତଥା ପୂଜକ ଗଣେଶରାମ ଦାଶ ଯାତ୍ରା ମହୋତ୍ସବର ପୂଜା ଲଗ୍ମ ଓ ଯାତ୍ରା ତିଥି ନିର୍ଧାରଣ କରିଥିଲେ ।ନଭେମ୍ବର ୨୮ରୁ ଡିସେମ୍ବର ୫ତାରିଖ ପର୍ଯ୍ୟନ୍ତ ହେଉଥିବା ଏହି ଯାତ୍ରାର ବିଭିନ୍ନ ଦିବସରେ  କମିଟି ତରଫରୁ ପ୍ରଭୁଙ୍କ ପୂଜା,ଯାତ୍ରା ଶୁଭ,ଖୋଲାମଞ୍ଚରେ କଳାକାରଙ୍କ ଦ୍ଵାରା ନାଟ୍ୟଭିନୟ ଦୃଶ୍ୟ,କଂସଦରବାର,ବଚ୍ଛାସୁର,ବକାସୁର,ଅର୍ଘାସୁର ବଧ ଆଦି ଅନୁଷ୍ଟିତ ହେବ ।ସେହିପରି ୨୩୯ବର୍ଷରେ ପଦାର୍ପଣ କରିଥିବା ବିନିକା କଂସାରିପଡ଼ାର ସର୍ବ ପୁରାତନ ଗୋକୁଳାଷ୍ଟମୀ ମହୋତ୍ସବ ପାଳନ ନେଇ ବ୍ରଜ ବିହାରୀ ନୃତ୍ୟ କଳା ପରିଷଦ

ସଭାପତି ପ୍ରସନ୍ନ ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ କମିଟିର ସମସ୍ତ ସଦସ୍ୟ ଯୋଗଦେଇଥିଲେ ।ଆଲୋଚନା ପରେ ଏହି ଯାତ୍ରା ନଭେମ୍ବର ୧୩ତାରିଖରୁ ୨୦ତାରିଖ ପର୍ଯ୍ୟନ୍ତ ମହାଆଡମ୍ବର ପୂର୍ଣ୍ଣ ଭାବରେ ପାଳନ କରିବା ନେଇ ପ୍ରସ୍ତାବ ଗୃହୀତ ହୋଇଥିଲା । ତାହା ସହିତ ଯାତ୍ରାରେ ବିଶେଷ ଆକର୍ଷଣ କଂସ ଦରବାର,ହାତୀ ପିଠିରେ ବସି କଂସର ନଗର ପରିକ୍ରମା ସହ ବିଭିନ୍ନ ବ୍ୟକ୍ତିଙ୍କୁ ଅର୍ଥ ଦଣ୍ଡରେ ଦଣ୍ଡିତ,ମୀନା ବଜାର ଏବଂ ବିଭିନ୍ନ ପ୍ରକାରର ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ବୈଠକରେ କମିଟି ସମ୍ପାଦକ ସଞ୍ଜୟ ଦାସ,ଉପସଭାପତି ରାମଚନ୍ଦ୍ର ଦାସ,ସାଂସ୍କୃତିକ ସମ୍ପାଦକ ପଦ୍ମ ଲୋଚନ ଦାସ(କାହୁଁ) ପ୍ରମୁଖଙ୍କ ସମେତ ବହୁ ସଦସ୍ୟ ଉପସ୍ଥିତ ଥିଲେ ।