27-Sep-2022

ସିନ୍ଧେକେଲା (ଅନୀଲ କୁମାର ତ୍ରିପାଠୀ) : ବଲାଙ୍ଗୀର ଜିଲ୍ଲା ସିନ୍ଧେକେଲା ଅଞ୍ଚଳର ଅଧିଷ୍ଠାତ୍ରୀ ଦେବୀ ମାଁ ଦ୍ବାରସେହ୍ନୀଙ୍କ ଷୋଡଶ ଦିନାତ୍ମକ ଦଶହରା ପୂଜା ମଧ୍ଯରୁ ଅନ୍ୟତମ ହେଉଛି ଡେଙ୍ଗସର୍ଗୀ ଯାତ୍ରା। ମୁଳାଷ୍ଟମୀ ଠାରୁ ଆରମ୍ଭ ହୋଇ ଅମାବାସ୍ୟା ପର୍ଯ୍ୟନ୍ତ ଶୁକ୍ଲ ପୁଜା ଉପଚାରରେ ମାଁ ପୂଜା ପାଉଥିବା ବେଳେ ପ୍ରତିପଦା ଠାରୁ ବିଜୟାଦଶମୀ ପର୍ଯ୍ୟନ୍ତ ରକ୍ତ ପୂଜା ଉପଚାର ରେ ପୂଜା ପାଇଥାନ୍ତି। ମହାଳୟା ତିଥିରେ ମହଖଣ୍ଡ ନିକଟସ୍ଥ ଛତରଙ୍ଗ ପାହାଡରୁ ଦେବୀ ଛତରବାଉତି ଙ୍କ ପାଇଁ ବାଉଁଶ ଆସିବାପରେ ଯଥାରୀତି ପୂଜାର୍ଚ୍ଚନା ପରେ ଛତର ତିଆରି ହୋଇଥାଏ। ତା ପରଦିନ ପ୍ରତିପଦା ତିଥିରେ ସିନ୍ଧେକେଲା ଝାପି ତଳରୁ ସେବାୟତ ମାନେ ଦିହାରୀ ଦେହରେ ବୁଢ଼ାରଜାଙ୍କୁ ବରବେଶରେ ନେବାପରେ ମନ୍ଦିରରୁ ଦିହାରୀଙ୍କୁ ପାଦରୁ ମୁଣ୍ଡ ପର୍ଯ୍ୟନ୍ତ ଧଳାଲୁଗା ବେଷ୍ଟନ କରି ଦିଆଯାଏ। ପରେ ରାଜା ଅରୁଣ ସିଂଦେଓ ଙ୍କୁ ତାଙ୍କ ସୈନ୍ଯ ସାମନ୍ତ ତରବାରି ଖେଳ ପ୍ରଦର୍ଶନ କରି ମନ୍ଦିର ପର୍ଯ୍ୟନ୍ତ ନେବାପରେ ସମସ୍ତ ସେବାୟତମାନଙ୍କ ସହ ମନ୍ଦିର ରୁ ଇଚଗାଁ ପର୍ଯ୍ୟନ୍ତ ୯ କିଲୋମିଟର ଧରି ବୁଢାରଜା ଚାଳିଚାଳି ଇଚଗାଁ ମନ୍ଦିର କୁ ପହଞ୍ଚିବା ପରେ ବିବାହ ଉତ୍ସବ ଆରମ୍ଭ ହୋଇ ସିନ୍ଧେକେଲା ରାଜପରିବାର ମୁଖ୍ଯ ଅରୁଣ ସିଂଦେଓ ବରପିତା ଓ ଇଚଗାଁର ମାଝୀ କନ୍ୟାପିତା ଭାବରେ ଦାୟୀତ୍ବ ତୁଲାଇବା ସହ ଯାନୀ ଯୌତୁକ ସହ ଝିଅ କୁ ବରପିତା ଙ୍କୁ ସମର୍ପିତ କରିଥାନ୍ତି। ବିବାହ ସମ୍ପନ୍ନ ହେବାପରେ ସେଠାରୁ ଦିହାରି (କାଳିସୀ) ଦେହରେ ମାଁ ଦ୍ବାରସେହ୍ନୀ ସବାର ହୋଇ

ସିନ୍ଧେକେଲା ପ୍ରତ୍ୟାବର୍ତ୍ତନ କରିଥାନ୍ତି। ଏହି ସମୟରେ ଲୋକେ ବିଭିନ୍ନ ପ୍ରକାର ଭାଷାରେ ସଖି ମାରୁ ଥିବା ଦେଖା ଯାଇଥିଲା ।  ଏ ପିଲେ ହୁଏ ହୁଏ ହୁଏ ହୁଏ ଦ୍ବାରସେହ୍ନୀ ମାଁ ହୁକୁମ ଦେଲା , ବଳ ଲଗେଇ କରି ଚାଳ ବଏଲା । ଏମିତି ଅନେକ ସଖି ମାରି ଲୋକେ ରାସ୍ତାରେ ଯାଉଥିଲେ । ଦେବୀ  ସିନ୍ଧେକେଲା ପହଞ୍ଚିବା ପରେ ଗାଁର ପ୍ରବେଶ ଦ୍ଵାର ବଡମଲ୍ଲିକ ଘର ନିକଟରେ ଦେବୀଙ୍କ ପାଦଧୁଆ ହେବାସହ ମାଳି ସେବାୟତ ମାନଙ୍କ ଦ୍ବାରା ଫୁଳପିନ୍ଧା ମଣ୍ଡପରେ ମନ୍ଦାରମାଳ, ଦହନାମାଳ , କଇଁଫୁଲ,ପଦ୍ମଫୁଲ ସହ ଅନେକ ପ୍ରକାର ଫୁଳମାଳ ରେ ସୁସଜ୍ଜିତ କରାଯାଇଥିଲା। ପରେ ଦେବୀ ମାଁ ଛତ୍ରବାଉତିଙ୍କ ମନ୍ଦିର ଓ ରାଜାଙ୍କ ବାସଭବନ ନିକଟରେ ପହଞ୍ଚି ସେ ଆସିଥିବା ସିଦ୍ଧ କରିବାକୁ ଶକ୍ତି ପ୍ରଦର୍ଶନ କରିବାକୁ ଯାଇ ଜିଭରେ ତରବାରୀ ବଙ୍କା କରି ଦେଖାଇଥିଲେ। ପରେ ପାଟପୂଜା ପାଇ ମନ୍ଦିରକୁ ପ୍ରତ୍ୟାବର୍ତ୍ତନ କରିଥିଲେ। ଏହି ଯାତ୍ରା କରୋନା ମହାମାରି ଯୋଗୁଁ ଦୁଇ ବର୍ଷ ହେଲା ବନ୍ଦ ଥିବାରୁ ଚଳିତ ବର୍ଷ ମାଁଙ୍କ ଦର୍ଶନ ପାଇଁ ସିନ୍ଧେକେଲା ମନ୍ଦିର ଠାରୁ ଇଚଗାଁ ମନ୍ଦିର ପର୍ଯ୍ୟନ୍ତ ୯ କିଲୋମିଟର ରାସ୍ତା ଜନସମୁଦ୍ର ପାଳଟି ଯାଇଥିଲା। ଇଚଗାଁ ଓ ପରାସରା ଅଞ୍ଚଳ ବାସିଙ୍କ

ତରଫରୁ ପରାସରା ଠାରେ ଘଣ୍ଟ , ଶଙ୍ଖ ଓ ବିଭିନ୍ନ ବାଦ୍ୟଯନ୍ତ୍ର ସହ ସ୍ବାଗତ କରା ଯାଇ ମନ୍ଦିର ପର୍ଯ୍ୟନ୍ତ ପାଛୋଟି ନେଇଥିଲେ। ଏଥିରେ ଅନ୍ୟମାନଙ୍କ ମଧ୍ଯରେ ଜଳସମ୍ପଦ ଓ ପରିବହନ ମନ୍ତ୍ରୀ ଟୁକୁନୀ ସାହୁ , କଣ୍ଟାବାଞ୍ଜି ବିଧାୟକ ସନ୍ତୋଷ ସିଂହ ସାଳୁଜା , ବଙ୍ଗୋମୁଣ୍ଡା ବ୍ଲକ ସାଂସଦ ପ୍ରତିନିଧି ଅନିଲ ନାଏକ, ଟିଟିଲାଗଡ ସରପଞ୍ଚ ସଂଘ ସଭାପତି ବିରବର ସାହୁ , ଯୁବନେତା ଯୁବରାଜ ବାଗ, ସମାଜ ସେବୀ ଅନିଲ କୁମାର ତ୍ରିପାଠୀଙ୍କ, ବଙ୍ଗୋମୁଣ୍ଡା ଗରିବ ସେନା ସଭାପତି ଦିନେଶ ତାଣ୍ଡି , ବଙ୍ଗୋମୁଣ୍ଡା ବ୍ଲକ ଅଧ୍ୟକ୍ଷା ଙ୍କ ପ୍ରତିନିଧି ଭୋଲାନାଥ ବେହେରା , ପଶ୍ଚିମ ଓଡିଶା ଯୁବାମଞ୍ଚ ଜିଲ୍ଲା ସୋସିଆଲ ମିଡିଆ ସଂଯୋଜକ ହେମନ୍ତ ସାହୁ , ଆଦିବାସୀ ଯୁବ ଗବେଷକ କଳାହାଣ୍ଡି ଅଜିତ ଭୋଇ, ସରୋଜ ରଞ୍ଜନ ସାହୁ , ପ୍ରକାଶ ସାହୁଙ୍କ ସହ ଅଞ୍ଚଳର ବହୁ ଜନପ୍ରତିନିଧି ଙ୍କ ସହ ବହୁ ସଂଖ୍ୟାରେ ଜନସମାଗମ ହୋଇଥିଲା।