21-Sep-2022

ନୟାଗଡ଼, (ପ୍ରଦୀପ କୁମାର ପଣ୍ଡା)::ଗାଁ ମୁହାଁ ହେଲେ ନୟାଗଡ଼ ବିଧାୟକ ଡ଼ ଅରୁଣ କୁମାର ସାହୁ । ତ୍ରିସ୍ତରୀୟ ନିର୍ବାଚନ ପୂର୍ବରୁ ଯେଉଁ ଭଳି ଭାବେ ଗାଁ ଗାଁ ଯାଇ ଜନସାଧାରଣଙ୍କ ନିକଟତର ହୋଇଥିଲେ ଏବଂ ଆଲୋଚନା କରିଥିଲେ । ଏପରି ଗସ୍ତ ବଜାୟ ରହିବ ଓ ଉନ୍ନୟନ କାର୍ଯ୍ୟ ମାଧ୍ୟମରେ ଗାଁ ଗାଁରେ ବିକାଶ ଫୁଆରା ଫିଟିବାର ଯେଉଁ କଥା ଦେଇଥିଲେ, ସେହି କଥାକୁ ସତ୍ୟରେ ପରିଣତ କରିଛନ୍ତି ଡ଼ ସାହୁ । ଗାଁର ବିକାଶ ପାଇଁ ଆଜି ତ୍ରୀସ୍ତରୀୟ ପଞ୍ଚାୟତ ନିର୍ବାଚନରେ ନିର୍ବାଚିତ ହୋଇଥିବା ଜନପ୍ରତିନିଧି ମାନଙ୍କୁ ନେଇ ବିଭିନ୍ନ ଗାଁ ମୁହାଁ ହୋଇଥିଲେ । ଗାଁକୁ ଯାଇ ଘରକୁ ଘର ବୁଲି ଗାଁର ସୁବିଧା ଓ ଅସୁବିଧା ମହିଳାମାନଙ୍କ ଠାରୁ ପଚାରି ବୁଝିଥିଲେ।ଇତି ମଧ୍ୟରେ ନିର୍ବାଚିତ ହୋଇଥିବା ଜନପ୍ରତିନିଧି ମାନଙ୍କୁ ଡାକି ବିଭିନ୍ନ ସମୟରେ କେତେ ଲୋକଙ୍କ ନିକଟତର ହୋଇଛ ଏହାର ସମୀକ୍ଷା ଡ଼ ସାହୁ କରିଥିଲେ । 

ଯେଉଁ ଜନପ୍ରତିନିଧି ଜନତାଙ୍କ ସହିତ ଯେତେ ନିକଟତର ହେବ ଜନତା ସେମାନଙ୍କୁ ସବୁଦିନ ମନେରଖିବେ ବୋଲି ଅରୁଣ ପରାମର୍ଶ ଦେଇଥିଲେ । ଆଜି ନୟାଗଡ଼ ବ୍ଲକର କେସ୍ତପଡ଼ା, ତେନ୍ତୁଳିଆପଲ୍ଲୀ, ନନ୍ଦପୁର, ସାମନ୍ତରାପୁର, ନାଗପୁର, ନରସିଂହପ୍ରସାଦ, ଗୁପ୍ତପଲ୍ଲୀ, ବ୍ରଜବଲ୍ଲଭପୁର ଓ ନୂଆଘଡୁଆଳ ଗ୍ରାମ ଦାଣ୍ଡରେ ନୟାଗଡ଼ ବିଧାୟକ ପହଞ୍ଚି ଜନତାଙ୍କ ସମସ୍ୟା ବୁଝିଛନ୍ତି । ସାଧାରଣ ଜନତା ସେମାନଙ୍କର ଆପତ୍ତି ଅଭିଯୋଗ କହିବା ସହିତ ଜନପ୍ରତିନିଧି ମାନଙ୍କର କାର୍ଯ୍ୟଦକ୍ଷତା ମଧ୍ୟ ପ୍ରକାଶ କରିଛନ୍ତି । ଯାହାକୁ ନେଇ ଜନପ୍ରତିନିଧି ମାନଙ୍କ ମଧ୍ୟରେ ଭୟ ସୃଷ୍ଟି ହୋଇଛି । ବିଧାୟକଙ୍କ ଗାଁ ମୁହାଁ କାର୍ଯ୍ୟକ୍ରମରେ ନୟାଗଡ଼ ବ୍ଲକ ଅଧ୍ୟକ୍ଷ କିଶୋର ଚନ୍ଦ୍ର ସାହୁ, ଉପାଧ୍ୟକ୍ଷା ଲକ୍ଷ୍ମୀପ୍ରିୟା ସାହୁ, ଜିଲ୍ଲାପରିଷଦ ସରୋଜ କୁମାର ରଣସିଂ, କ୍ଷୀରୋଦ କୁମାର ମହାପାତ୍ର, ସୁବାସ ଚନ୍ଦ୍ର କଅଁର ଓ ପ୍ରତ୍ୟେକ ପଞ୍ଚାୟତର ସରପଞ୍ଚ, ସମିତି ସଭ୍ୟ ସଭ୍ୟା ଓ ସ୍ଥାନୀୟ ନେତୃବୃନ୍ଦ ଯୋଗଦେଇଥିଲେ । ପ୍ରତ୍ୟେକ ଗାଁର ସାଧାରଣ ଜନତା ସେମାନଙ୍କର ବିକାଶ ମୁଳକ କାର୍ଯ୍ୟଠାରୁ ସମସ୍ତ ତଥ୍ୟ ଡ଼ ସାହୁଙ୍କ ସମ୍ମୁଖରେ ପ୍ରକାଶ କରିଥିଲେ ।