19-Sep-2022

ବିନିକା(ହିମାଂଶୁ ଶେଖର ପୁଟେଲ) ବିନିକା-ଚଡେଇପଙ୍କ ମହାନଦୀ ସେତୁ(ବ୍ରିଜ) ରାସ୍ତାକୁ ଝିକମିକ ଆଲୋକରେ ସୌନ୍ଦର୍ଯ୍ୟକରଣ କରିବା ଉଦ୍ଦେଶ୍ୟରେ ୨୧ଲକ୍ଷ ଟଙ୍କା ବ୍ୟୟରେ ବ୍ରିଜର ଉଭୟ ପାର୍ଶ୍ଵରେ ଲାଗିଥିବା ରୋପ (ଲିଚୁ) ଲାଇଟ ଗୁଡ଼ିକୁ କେତେକ ଦୁର୍ବୃତ୍ତ ଚୋରି କରିନେଇଥିବା ବିନିକା ଥାନାରେ ଅଭିଯୋଗ ହୋଇଛି । ଖମ୍ବ ମାନଙ୍କରୁ ଲିଚୁ ଲାଇଟ ଦୁର୍ବୃତ୍ତ ମାନେ ଚୋରି କରି ନେଇଥିବାରୁ ଆଲୋକମୟରେ ଝଲସି ଉଠୁଥିବା ଏହି ରାସ୍ତାର ଆକର୍ଷଣ  ବର୍ତମାନ ସମସ୍ତଙ୍କ ପାଇଁ ନିରାଶ କରିଛି ।ସୂଚନା ଯୋଗ୍ୟ ଯେ ଚଳିତ ସ୍ବାଧିନତା ଦିବସ ଦିନ ବିନିକା ନଗରପାଲ ସୁବାସ ଚନ୍ଦ୍ର ଭୋଇଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ମାନ୍ୟବର ବୀରମହାରାଜପୁର ବିଧାୟକ ପଦ୍ମନାଭ ବେହେରାଙ୍କ ଦ୍ଵାରା ଏହି ଲାଇଟର ଶୁଭାରମ୍ଭ ହୋଇଥିଲା ।ସେହିଦିନ ଠାରୁ ବେଶ କିଛିଦିନ ଧରି ସନ୍ଧ୍ୟା ସମୟରୁ ସକାଳ ପାଇବା ପର୍ଯ୍ୟନ୍ତ ଲାଇଟ ଗୁଡ଼ିକ ରାସ୍ତାରେ ଝଲସୁ ଥିବାରୁ ଯିବା ଆସିବା କରୁଥିବା ଲୋକଙ୍କ ପାଇଁ ଆକର୍ଷଣର କେନ୍ଦ୍ର ବିନ୍ଦୁ ସାଜିଥିଲା ।ଦେଖିବା ପାଇଁ ସନ୍ଧ୍ୟାରେ ସହର ବାସୀଙ୍କ ଠାରୁ ଆରମ୍ଭ କରି ବିଭିନ୍ନ ଗ୍ରାମର ଲୋକଙ୍କ ମଧ୍ୟ ବ୍ରିଜ ରାସ୍ତାରେ ଭିଡ଼ ଜମୁଥିଲା ।ଅନ୍ୟ ପଟରେ ମହାନଦୀ ମଧ୍ୟମ ସ୍ଥଳରେ ଥିବା ବାଇକାନୀ ଦେବୀଙ୍କ ଦର୍ଶନ ମଧ୍ୟ ଭକ୍ତ କରିବାର ସୁଯୋଗ ପାଇଥିଲେ ।ସେହିପରି ରାସ୍ତା ଆଲୋକମୟ ଯୋଗୁଁ ଲୋକେ ନିରାପଦରେ ଯିବା ଆସିବା ସହ ପୂର୍ବରୁ ଘଟୁଥିବା ଦୁର୍ଘଟଣା ମଧ୍ୟ ଏକ ପ୍ରକାର କମି ଯାଇଛି ।ଲାଇଟ ଚୋରିରେ ସଂପୃକ୍ତ ଆସାମୀ ମାନଙ୍କୁ ତୁରନ୍ତ ଗିରଫ କରିବାକୁ ବିଭିନ୍ନ ମହଲରେ ଦାବି ହେଉଥିବା ବେଳେ ଉକ୍ତ ସମସ୍ୟା ନେଇ ବିନିକା ବିଜ୍ଞାପିତ ଅଞ୍ଚଳ ପରିଷଦର କାର୍ଯ୍ୟନିର୍ବାହୀ ଅଧିକାରୀ ଶ୍ରୀକୁମାର ରଥ ବିନିକା ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ତରଫରୁ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଛି ।