17-Sep-2022

ଚାଷକାର୍ଯ୍ୟ ହେଉ ଅବା ଅନ୍ୟାନ୍ୟ ଅଙ୍କୁର ବିଧି, ସବୁଥିରେ ମାଟି ଅବା ବାଲି ସହ ଜଳର ସମ୍ମିଶ୍ରଣରେ ଗଜା ହେଉଥିବା କଥା  ଶୁଣିଥିବେ, କିନ୍ତୁ ରାୟଗଡ଼ା ସହରରେ ଦୈବିକୃପା ବଳରେ ବିନାଜଳରେ ଏକି କାର୍ଯ୍ୟ ସମ୍ଭବ ସମ୍ଭବ ହେଉଅଛି । ଆମେ କହୁଛୁ ରାୟଗଡ଼ାର ଅଧିଷ୍ଠାତ୍ରୀ ଦେବୀ ମାଁ ମଝିଘରିଆଣୀଙ୍କ ବାଲିଯାତ୍ରା କଥା । ନଅଟି ଗୁଲିରେ ଦ୍ୱାଦଶୀ ଦିନଠାରୁ କୋଷ୍ଠିକାଟି ଅସ୍ଥାୟୀ ମଣ୍ତପରେ ପୂଜା କରାଯାଏ ଯେଉଁଥିରେ ନଅ ପ୍ରକାରର ବିଭିନ୍ନ ଶସ୍ୟ ଯଥା ଧାନ,କାନ୍ଦୁଲ, କୋଳଥ, ବିରି, ମକା ଆଦିଙ୍କୁ ଅଙ୍କୁରାରୋପଣ ନିମନ୍ତେ ସ୍ଥାପନା କରାଯାଏ । ମନ୍ଦିର ତରଫରୁ ଏକ ପାଟ ପୂଜାରୀଙ୍କୁ ନିମନ୍ତ୍ରଣ କରାଯାଇଥାଏ । ସେମାନେ ବେଲକଣ୍ଟା ଦ୍ୱାରା ଅବୃତ୍ତ ଦୋଳିରେ ବସନ୍ତି ତଥା ମାଁ ଙ୍କ କୃପାବଳରେ ଲୋକଙ୍କ ଅଭିସାର ମାନଙ୍କର ସମାଧାନ କରନ୍ତି । ସେଥିରେ ସେମାନଙ୍କ ଶରୀରର କୌଣସି କ୍ଷତି ହୁଏ ନାହିଁ । ମାଆଙ୍କ ଚଳନ୍ତି ପ୍ରତିମା ସ୍ୱଋପ ଖଣ୍ତାଙ୍କୁ ଆମନ୍ତ୍ରଣ କରି ଅଣାଯାଏ । ସେଠି ପ୍ରୋକ୍ଷଣର ପରମ୍ପରା ମଧ୍ୟ ରହିଅଛି । ଚଳନ୍ତି ପ୍ରତିମାଙ୍କୁ ଗ୍ରାମ୍ୟ ପରିକ୍ରମାର ବିଧି ଥିଲେହେଁ କୋଭିଡ଼୍ କଟକଣା ଯୋଗୁଁ ସେୟା ସ୍ଥଗିତ ରଖାଯାଇଅଛି । ଅଗ୍ନିକୁମାରୀଙ୍କୁ ମଧ୍ୟ ଏହି ଉପଲକ୍ଷେ ଆବାହନା କରାଯାଏ । ପ୍ରତ୍ୟହ୍ଯ ଏହି ଉପଲକ୍ଷେ ସ୍ୱତନ୍ତ୍ର ପୂଜାର ଆୟୋଜନ ହୁଏ । ସେହି ଅଙ୍କୁରିତ ଶସ୍ୟଙ୍କୁ ଲୋକେ ସନ୍ତକ ଭାବେ ଘରକୁ ନେଇ ସାଇତା କରନ୍ତି । ଭାଦ୍ରବ ମାସ ଦ୍ୱାଦଶୀ ତିଥିରେ ଆବାହନ କରାଯାଇଥିବା ମାଁ ମଝିଘରିଆଣୀଙ୍କ ନଅ ଦିନ ବ୍ୟାପି ବାଲିଯାତ୍ରା ପର୍ବ ନିକଟରେ ଉଜ୍ଜାପନ ହେଇଯାଇଅଛି । ଅଞ୍ଚଳରେ କୃଷିର ଉନ୍ନତି ନିମନ୍ତେ ଏହି ପର୍ବ ପାଳନର ଏକ ମହତ୍ତ୍ୱପୂର୍ଣ୍ଣ ଭୂମିକା ରହିଥିବାର ବିଶ୍ୱାସ ରହିଅଛି ।