16-Sep-2022

ବରଗଡ:-ଆଉ ଶୁଭିବ ନାହିଁ ମୃଦଙ୍ଗର ବାଦ୍ୟ, ଆଉ ଶ୍ରୋତାଙ୍କୁ ଆନମନା କରିବ ନାହିଁ ତବଲାର ତରଙ୍ଗ । ନା କୃଷ୍ଣ ପ୍ରେମର ରସ ଝରିବ ନା ଆଉ ବାଜିବ ପାଦର ଘୁଙ୍ଗୁର । ଏସବୁ ଏବେ ଅତୀତ କାରଣ ଚିର ଦିନପାଇଁ ଆଖି ବୁଜି ଦେଇଛନ୍ତି କଳାର ସାଧକ ଆଦିତ୍ୟ ପଣ୍ଡା । ହୃଦଘାତର ଶିକାର ହୋଇ ବରଗଡ଼ର ଏକ ଘରୋଇ ହସ୍ପିଟାଲରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି ଏହି ମହାନ କଳାକାର । ଆଦିତ୍ୟ ପଣ୍ଡାଙ୍କ ବିୟୋଗରେ ତାଙ୍କ ଗାଁ ସମେତ ବରଗଡ଼ ଅଞ୍ଚଳରେ ଶୋକର ଛାୟା ଖେଳି ଯାଇଛି । ପୁଅ ରଞ୍ଜନ କୁମାର ପଣ୍ଡା ମୁଖାଗ୍ନି ଦେଇଥିବା ବେଳେ ଗାଁ ଶ୍ମଶାନରେ ଅନ୍ତିମ ସଂସ୍କାର ସମ୍ପନ୍ନ କରାଯାଇଥିଲା । ତାଙ୍କର ମୃତ୍ୟୁ ଖବର ପ୍ରଚାରିତ ହେବା ପରେ ବାସଭବନକୁ ବହୁ ସାଧାରଣ ଲୋକ ଓ କଳାକାରଙ୍କ ସୁଅ ଛୁଟି ଥିଲା lଗାଇସିଲଟ ବ୍ଲକ ଅଧ୍ୟକ୍ଷ ପ୍ରଣୟ କୁମାର ସାହୁ, ବିଡିଓ ମନୋଜ କୁମାର ଦେବତା, ଚାଷୀ ନେତା କିଶୋର ଦେବତା ପ୍ରମୁଖ ଅନ୍ତିମ ଦର୍ଶନ କରିବା ସହ ଶ୍ରଦ୍ଧାଞ୍ଜଳୀ ଜଣାଇଥିଲେ ।