09-Sep-2022

ବଲାଙ୍ଗୀର: ଓଡିଶାରେ ମୁଖ୍ୟମନ୍ତ୍ରୀ  ନବୀନ ପଟ୍ଟନାୟକଙ୍କ ଶାସନ କାଳରେ ମହିଳା ନିର୍ଯ୍ୟାତନା, ଶିଶୁ ନିଖୋଜ ଓ ମହିଳା ଅତ୍ୟାଚାର ପରି ଅସାମାଜିକ କାର୍ଯ୍ୟକଳାପ ବୃଦ୍ଧି ପାଇବାରେ ଲାଗିଛି । ମୁଖ୍ୟମନ୍ତ୍ରୀ ନିଜକୁ ଦେଶ ର ନମ୍ବର ୱାନ୍ ମୁଖ୍ୟମନ୍ତ୍ରୀ ବୋଲି ଘୋଷଣା କରୁଥିବା ବେଳେ ମହିଳା ମାନଙ୍କୁ ନିର୍ଯ୍ୟାତନା, ଧର୍ଷଣ , ଯୌତୁକଜନିତ ହତ୍ୟା, ନିର୍ଯ୍ୟାତନା ଆଦି ଘଟଣାରେ ଆମ ରାଜ୍ୟ ନମ୍ବର ୱାନ ସ୍ଥାନରେ ରହିଥିବା ବିଜେପି ପକ୍ଷରୁ ତାଛଲ୍ୟ କରି  କୁହାଯାଇଛି । ଗାଁ କୁ କାମ ଓ ମାଁ କୁ ସମ୍ମାନର ନାରା ଦେଉଥିବା ବିଜେଡି ସରକାର ଅମଳରେ ରାଜ୍ୟରେ ମହିଳ ନିଜକୁ ସୁରକ୍ଷିତ ମଣୁ ନାହାନ୍ତି ।  ମହିଳା ମାନଙ୍କୁୁ ସୁରକ୍ଷା ଦେବାରେ ବିଜେଡିର ଚରମ ଅବହେଳା କୁ ନିନ୍ଦା କରି ଆଜି ବିଜେପି ମହିଳା ମୋର୍ଚ୍ଚା ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯିବା ସହ ଏକ ଶୋଭାଯାତ୍ରା ସହର ପରିକ୍ରମା କରିଥିଲା । ବିଜେଡି ଅମଳରେ ରାଜ୍ୟର ମହିଳାଙ୍କ ପ୍ରତି ଅନ୍ୟାୟ ହୋଇଛି ବୋଲି ବିଜେପି ମହିଳା ମୋର୍ଚ୍ଚା ପକ୍ଷରୁ ଅଭିଯୋଗ କରାଯାଇଛି । ଶିଶୁ ନିଖୋଜ ଘଟଣାରେ ମଧ୍ୟ ଓଡ଼ିଶା ଆଗରେ ଥିବା ବେଳେ ଅପରାଧୀକୁ ଦଣ୍ଡ ଦେବାରେ ପୋଲିସ ପ୍ରଶାସନ ଏକ ପ୍ରକାର ସ୍ଥାଣୁ ପାଲଟି ଯାଇଛି । 
ବିଜେପି ମହିଳା ମୋର୍ଚ୍ଚା ବଲାଙ୍ଗୀର ଜିଲ୍ଲା ସଭାନେତ୍ରୀ ପଙ୍କଜିନୀ ପଣ୍ଡାଙ୍କ ନେତୃତ୍ୱରେ ଅନୁଷ୍ଠିତ ଆଜିର ଏହି ବିକ୍ଷୋଭ ସଭାରେ ମହିଳା ମୋର୍ଚ୍ଚାର ବହୁ ମହିଳା ଓ ବିଜେପି କର୍ମୀ ମାନେ ଯୋଗ ଦେଇ ନବୀନ ବିରୋଧି ସ୍ଲୋଗାନ ଦେଇ ଥିଲେ । ନବୀନ ସରକାର ପରି ଏକ ମହିଳା ବିରୋଧୀ ସରକାରକୁ ଓଡ଼ିଶ।।ର ଜନସାଧାରଣ ଆଗାମୀ ଦିନରେ ଉଚିତ ଜବାବ ଦେବେ ବୋଲି ବିଜେପି କର୍ମୀ ମାନେ କହିଛନ୍ତି ।