25-Jul-2022

ବଲାଙ୍ଗୀର, ବଲାଙ୍ଗୀର ମୁନିସିପାଲିଟି ଅନ୍ତର୍ଗତ ୬ ନମ୍ବର ୱାର୍ଡର ଏହି ବସ୍ତିକୁ ଦେଖନ୍ତୁ । ମୁନସିପାଲିଟି ଅଧିନ ରେ ଥାଇ ବି ଏହି ଅଂଚଳର ଅବସ୍ଥା କୌଣସି ଅପନ୍ତରା ଅଂଚଳର ଅବସ୍ଥାରୁ କୌଣସି ଗୁଣରେ କମ ନାହିଁ । ବରପାଲି ପଡା ପଂଚଶଖା ଗଳି ର ଏହି ଅଂଚଳକୁ ନା ଅଛି ଚାଲିବା ପାଇଁ ଭଲ ରାସ୍ତା ନା ଅଛି ଡ୍ରେନେଜର ବ୍ୟବସ୍ଥା, ନା ଅଛି ଷ୍ଟ୍ରିଟ୍ ଲାଇଟ୍ ର ସୁବିଧା ।  ବରପାଲି ପଡା, ଆମ ପଡା, ମେଘନାଦ ପଡା ଓ ଚିମନିଭାଟି ଅଂଚଳକୁ ନେଇ ଗଠିତ ୬ ନମ୍ବର ୱାର୍ଡର ଅଧିବାସୀ ସରକାରଙ୍କ ଅନେକ ମୌଳିକ ସୁବିଧାରୁ ବଂଚିତ ହୋଇଛନ୍ତି । ଡ୍ରେନ ସବୁ ରାସ୍ତାରେ ମିଶିଗଲାଣି ଓ ନାଳନର୍ଦ୍ଦମାର ପାଣି ରାସ୍ତାରେ  ବୋହୁଛି । ବର୍ଷା ହେଲେ ଏଠାରେ ଘର ଭିତରକୁ ପାଣି ପଶିବା ଏକ ସାଧାରଣ କଥା ହୋଇଗଲାଣି । ମୁନିସିପାଲିଟି ନିର୍ବାଚନ ପରେ ଏଠାକାର ଅଧିବାସୀମାନେ ଏହି  ୱାର୍ଡର କାଉନସିଲରଙ୍କୁ ଦେଖନଥିବା କହିଛନ୍ତି । ଏଠାରେ ଅଛି ଚନ୍ଦ୍ରସେନୀ ମନ୍ଦିର । ଏହି ମନ୍ଦିର ନିକଟରେ ପଡିଛି କୁଢ଼ କୁଢ଼ ମଇଳା । ନିୟମିତ ବ୍ୟବଧାନରେ ଏହି ଆବର୍ଜନାକୁ ସଫା କରିବା ଦିଗରେ ମୁନିସିପାଲିଟି କୌଣସି ତତ୍ପରତା ପ୍ରକାଶ କରିନଥିବା ପଡାବାସୀ ଅଭିଯୋଗ କରିଛନ୍ତି । ତେବେ ୬ ନମ୍ବର ୱାର୍ଡର ବିଜେଡି କାଉନସିଲର ପିଙ୍କି କବାଟଙ୍କୁ ଅନେକ ଥର ଅଭିଯୋଗ କରିଥିଲେ ମଧ୍ୟ ସେ ଅଭିଯୋଗକୁ କର୍ଣ୍ଣପାତ କରିନଥିବା ଅଭିଯୋଗ ହୋଇଛି । ତେଣୁ ଆଗାମୀ ଦିନରେ ଏହି ଅଂଚଳରେ ରାସ୍ତା ଓ ଡ୍ରେନେଜର ସୁବିଧା କରାନଗଲେ ପଡାବାସୀ ଜିଲ୍ଲାପାଳଙ୍କ ଅଫିସ ଆଗରେ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି ।