07-Jul-2022

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ଜିଲ୍ଲାରେ ଶିକ୍ଷାର ଉତ୍କର୍ଷତା ଲାଭ କରିଥିବା କୁହାଗଲା ଓ ଇଣ୍ଡିଆ ଟୁଡେ ପକ୍ଷରୁ ଏକ୍ସେନ୍ସ ଆୱାର୍ଡ ମଧ୍ୟ ଦିଆଯାଇଥିଲା । ହେଲେ ମାଟ୍ରୀକ ରେଜଲ୍ଟ ଜିଲ୍ଲାର ଶିକ୍ଷାବ୍ୟବସ୍ଥାର ପୋଲ ଖୋଲିଦେଇଛି । ମାଟ୍ରୀକରେଜଲ୍ଟ ଗତକାଲି ପ୍ରକାଶ ପାଇଛି ଓ ବଲାଙ୍ଗୀର ଜିଲ୍ଲାର ହାରାହାରୀ ପାସହାର ୮୬% ରହି ସମଗ୍ର ରାଜ୍ୟରେ ତଳଆଡୁ ୪ର୍ଥସ୍ଥାନରେ ରହିଛି । ରାଜ୍ୟର ମାକାନଗିରୀ ଜିଲ୍ଲା(୮୩%),ନଗରଙ୍ଗପୁର ଜିଲ୍ଲା ଓ ମୟୁରଭଞ୍ଜ ଜିଲ୍ଲାରେ ୮୫% ରହିଥିବା ବେଳେ ବଲାଙ୍ଗୀର ଜିଲ୍ଲା ୪ର୍ଥ ସ୍ଥାନରେ ରହିଛି । ବଲାଙ୍ଗୀର ଜିଲ୍ଲାରେ ୩୬୫ଟି ହାଇସ୍କୁଲରେ ମୋଟ ୨୬,୬୩୮ଜଣ ଛାତ୍ରଛାତ୍ରୀ ଫର୍ମଫିଲପ କରିଥିବା ବେଳେ ସେଥିରୁ ୩୧୪୫ଜଣ ପରୀକ୍ଷାର୍ଥି ପରୀକ୍ଷା ଦେଇପାରିନଥିଲେ । ସେଥିରୁ ୨୨,୯୧୭ଜଣ ପାସ କରିଛନ୍ତି । ତେବେ ୯୦%ରୁ ଅଧିକ ପ୍ରତିଶତ ମାର୍କ ରଖି ୧୧୪ଜଣ ଛାତ୍ରଛାତ୍ରୀ କୃତକାର୍ଯ୍ୟ ହୋଇଛନ୍ତି । ବଲାଙ୍ଗୀର କଦମପଡା ସରସ୍ୱତୀ ଶିଶୁମନ୍ଦିରର ଛାତ୍ର ସ୍ୱାଭିମାନ ନାୟକ ମୋଟ ୯୮.୫୦%(୫୯୧ମାର୍କ) ରଖି ଜିଲ୍ଲାରେ ଟପ୍ପର ହୋଇଛନ୍ତି । ତେବେ ସବୁଠୁ ଗୁରୁତ୍ୱପୂର୍ଣ୍ଣ ବିଷୟ ହେଲା ଜିଲ୍ଲାର ସରକାରୀ ସ୍କୁଲ ଅପେକ୍ଷା ଘରୋଇ ଶିକ୍ଷାନୁଷ୍ଠାନ ଯଥା ସରସ୍ୱତୀ ଶିଶୁମନ୍ଦିର ଓ ବିଶ୍ୱାତ୍ମାବିଦ୍ୟାମନ୍ଦିର ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ର ଭଳି ଅନୁଷ୍ଠାନର ଛାତ୍ରଛାତ୍ରୀ ଭଲ ପ୍ରଦର୍ଶନ କରିଛନ୍ତି । ଜିଲ୍ଲାର ମୋଟ ୧୧୪ଜଣ ଏ୧ ଗ୍ରେଡ ପାଇଥିବା ଛାତ୍ରଛାତ୍ରୀଙ୍କ ମଧ୍ୟରେ ୮୦% ଛାତ୍ରଛାତ୍ରୀ ଘରୋଇ ସ୍କୁଲର ରହିଛନ୍ତି । ଯାହାକି ସରକାରୀ ସ୍କୁଲର ଅସଲ ଚେହେରା ଖୋଲିଦେଇଛି । ସରକାରୀ ସ୍କୁଲମାନଙ୍କୁ ରୂପାନ୍ତରିତ କରି ସୁନ୍ଦର କରାଯାଇ ପାରିଛି । ହେଲେ ଲକ୍ଷାଧିକ ଟଙ୍କା ଦରମା ପାଉଥିବା ହାଇସ୍କୁଲର ଶିକ୍ଷକ/ଶିକ୍ଷୟ୍ରତ୍ରୀମାନଙ୍କ ଶିକ୍ଷାଦାନରେ ତୃଟି ରହୁଥିବା ଅଭିଯୋଗ ହୋଇଅସୁଛି । ମୁଖ୍ୟତଃ ଗ୍ରାମାଞ୍ଚଳର କିଛି ସରକାରୀ ସ୍କୁଲ ଭଲ ପ୍ରଦର୍ଶନ କରିଥିବା ବେଳେ ସଦରମହକୁମାରେ ପ୍ରଶାସନର ନାକତଳେ ଥିବା ହାଇସ୍କୁଲଗୁଡିକରେ ରେଜଲ୍ଟ ନୈରାଶ୍ୟଜନକ ରହିଛି ।