15-Jun-2022

ପାଟଣାଗଡ - ପାଟଣାଗଡ଼ ବ୍ଲକ ଗେର୍ଡା ପଞ୍ଚାୟତ ବର୍ହାମୁଣ୍ଡା ଗ୍ରାମରେ ଜୁନ୍ ତା୧୦/୬ ରୁ ୧୨/୬ ପର୍ଯ୍ୟନ୍ତ ତିନି ଦିନ ଧରି ବିରାଟ ପର୍ବ ପାଳିତ ହୋଇଥିଲା । ପ୍ରାରମ୍ଭରେ ଜଳପୂର୍ଣ୍ଣ କଳସ ଆଣି ପୂଜା ମଣ୍ଡପରେ ସ୍ଥାପନ ସହ ପୂଜାର୍ଚ୍ଚନା କରାଯାଇଥିଲା । ଏଥିରେ ଯଜ୍ଞ କର୍ତ୍ତା ଭାବେ ଘନଶ୍ୟାମ ବରିହା ତାଙ୍କ ଧର୍ମପତ୍ନୀ ଧନମତୀ ବରିହା କାର୍ଯ୍ୟ ନିର୍ବାହ କରିଥିବା ବେଳେ ଚଙ୍ଗରିଆ ଗ୍ରାମର ପୂଜକ ଭାବେ ପଣ୍ଡିତ ବିପିନ ରଥ ପୂଜାର୍ଚ୍ଚନା କରିଥିଲେ । ବ୍ୟାସ ଭାବେ ସୁନାମଧନ୍ୟ ବାନ୍ଦୁପାଲିର ପାରାୟଣ ଗାୟୀକା ଆରତୀ ପଣ୍ଡା ଯୋଗଦେଇ ମହାଭାରତ ଗ୍ରନ୍ଥର ବିରାଟ ପର୍ବ ପାରାୟଣ ପଠନ କରିଥିଲେ । ତାଙ୍କର ସୁମଧୁର କଣ୍ଠସ୍ଵର ସମସ୍ତ ଶ୍ରଦ୍ଧାଳୁମାନଙ୍କୁ ବାନ୍ଧି ପାରିଥିଲେ । ଦୀର୍ଘ ଦୁଇ ବର୍ଷ ଧରି କରୋନା ମହାମାରୀ କଟକଣା ଯୋଗୁଁ ଗ୍ରାମରେ ବିରାଟ ପର୍ବ ପାଳନ ବନ୍ଦ ରହିଥିଲା । ଚଳିତ ବର୍ଷ ଗ୍ରାମବାସୀଙ୍କ ଉଦ୍ୟମରେ ତଥା ଏକତ୍ରିତ ହୋଇ ତିନି ଦିନ ଧରି ଆୟୋଜିତ ବିରାଟ ପର୍ବରେ ଶ୍ରଦ୍ଧାଳୁମାନେ ବେଶ ଉତ୍ସାହିତ ଥିବା ବେଳେ ଭକ୍ତି ଭାବପୂର୍ଣ୍ଣ ବାତାବରଣ ସୃଷ୍ଟି ହୋଇଥିଲା । ପ୍ରତ୍ୟେକ ଦିନ ସନ୍ଧ୍ୟାରେ ଖଞ୍ଜଣି ଭଜନ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏହି ଅବସରରେ ପଶ୍ଚିମ ଓଡ଼ିଶା ଲୋକକଳା ପୁନଃଉଦ୍ଧାର ପରିଷଦ ପକ୍ଷରୁ ଏକ ସଭା ଆୟୋଜନ କରାଯାଇଥିଲା। ଏଥିରେ ପରିଷଦର ସଂପାଦକ ମିନକେତନ ପ୍ରଧାନ ମୁଖ୍ୟ ଅତିଥି ଭାବେ ଯୋଗଦେଇଥିଲେ । ବନ୍ଦେ ଉତ୍କଳ ଲୋକକଳା ଲୋକ ସଂସ୍କୃତି ମହାସଂଘ ପକ୍ଷରୁ ପୁରୀ ଠାରେ ଆସନ୍ତା ତା ୨୮./୮/୨୦୨୨ ପ୍ରତିଭା ସମ୍ମାନ ଉତ୍ସବ ଅନୁଷ୍ଠିତ ହେବ। ଯେଉଁ କଳାକାରମାନେ ଏଥିରେ ଯୋଗଦେବା ପାଇଁ ଇଚ୍ଛୁକ ସେମାନେ ଜିଲ୍ଲା ସଭାପତି ଓ ସଂପାଦକଙ୍କ ଠାରୁ ସୁପାରିଶ ପାଇବା ଆବଶ୍ୟକ ବୋଲି ଶ୍ରୀ ପ୍ରଧାନ ସୂଚନା ଦେଇଥିଲେ ।

ଏହି କାର୍ଯ୍ୟକ୍ରମରେ ବହୁ ସଂଖ୍ୟାରେ କଳାକାର ଯୋଗଦାନ କରିବାକୁ ନିବେଦନ କରିଥିଲେ । ଏଥିରେ ଆଖପାଖ ଅଂଚଳରୁ ବହୁ ଭକ୍ତ ଶ୍ରଦ୍ଧାଳୁମାନେ ଯୋଗଦେଇ ଭଗବାନଙ୍କ ସାନ୍ନିଧ୍ୟ ଲାଭ କରିଥିଲେ। ପୂଜା ପରିଚାଳନା କମିଟିର ଦ୍ରୋଣ ବରିହା, ସଦାନନ୍ଦ ବରିହା, ଦୁଖିଶ୍ୟାମ ବରିହା, ମନବୋଧ ବରିହା, ଗୋବିନ୍ଦ ବରିହା, ରଣଜିତ ବରିହା, ଈଶ୍ଵର ହାତୀ,ଭୋଦେବ ହାତୀ, କୌବଲ୍ୟ ବାଗ ପ୍ରମୁଖଙ୍କ ସହ ଓ ଗଣେଶ ପୂଜା କମିଟିର ଯୁବକ ଗୋଷ୍ଠୀ ସମେତ ଗ୍ରାମବାସୀ ସହଯୋଗ କରିଥିବା ବେଳେ ସମସ୍ତ ଭକ୍ତମାନଙ୍କ ପାଇଁ ଅନ୍ନ ପ୍ରସାଦ ସେବନ ବ୍ୟବସ୍ଥା କରାଯାଇଥିଲା ।