11-Jun-2022

ଖପ୍ରାଖୋଲ (ବେଦବର ଛତ୍ରିଆ) ଖପ୍ରାଖୋଲ ବ୍ଲକର ବିଭିନ୍ନ ପଞ୍ଚାୟତରେ କାଳବୈଶାଖୀର ତାଣ୍ଡବଲୀଳା ଦେଖିବାକୁ ମିଳିଛି। ପ୍ରବଳ ବେଗରେ ପବନ ବହିବା ସହିତ ବର୍ଷା ହେବା ଯୋଗୁଁ ଅଞ୍ଚଳରେ ବହୁ କ୍ଷୟକ୍ଷତି ହୋଇଥିବା ଜଣାପଡିଛି। ବିଭିନ୍ନ ଜାଗାରେ ବଡ଼ ବଡ଼ ଗଛ ସବୁ ଭାଙ୍ଗି ଯାଇଥିବା ବେଳେ ବିଦ୍ୟୁତ ତାର ସବୁ ଛିଣ୍ଡି ଏଣେ ତେଣେ ପଡି ରହିଛି। ଅଞ୍ଚଳରେ ଦିନ ୧୦ ଟା ପର୍ଯ୍ୟନ୍ତ ଝିପିଝିପି ବର୍ଷା ଲାଗି ରହିଥିଲା। ବିଦ୍ୟୁତ ତାର ଓ ଖୁଣ୍ଟ ସବୁ ଭାଙ୍ଗି ଓ ଛିଣ୍ଡି ଯିବାରୁ ବିଦ୍ୟୁତ ସରବରାହ ବନ୍ଦ ରହିଛି। ବିଦ୍ୟୁତ ବିଭାଗ କର୍ମଚାରୀ ମାନେ ଯୁଦ୍ଧକାଳୀନ ଭିତ୍ତିରେ ବିଦ୍ୟୁତ ସରବରାହ ଠିକ୍ କରିବା ରେ ଲାଗିଛନ୍ତି। ଅଞ୍ଚଳର ଲାଠୋର ପଞ୍ଚାୟତ,କରୁଁଆଝର ପଞ୍ଚାୟତ,ଟଙ୍କାପାଣି ଓ ରେଙ୍ଗାଲି ପଞ୍ଚାୟତରେ ବେଶି କ୍ଷୟକ୍ଷତି ହୋଇଥିବାର ସୂଚନା ମିଳିଛି। ସେହିପରି କରୁଁଆଝର ଗ୍ରାମ ପଂଚାୟତର ସାନ ଗୁର୍ଜିଭଟା ଗ୍ରାମରେ ଗୋଟିଏ ପରିବାର ର ଘର ଉପରେ ଗଛ ଭାଙ୍ଗି ପଡିଯିବାରୁ  ଅଳ୍ପକେ ବର୍ତ୍ତି ଯାଇଛନ୍ତି ପରିବାର ବର୍ଗ।ଗ୍ରାମର ବୈଷ୍ଣବ ଧରୁଆ ନାମକ ବ୍ୟକ୍ତିଙ୍କ ଘର  ଉପରେ ଗଛ ପଡି ଯିବାରୁ ଅଳ୍ପକେ ବର୍ତ୍ତୀଯାଇ ଥିଲେ ପରିବାର । ଉଜୁଡ଼ି ଯାଇଥିବା ଘରକୁ ଦେଖି ଘୋର ଚିନ୍ତା ଚିନ୍ତାରେ ପଡ଼ି ଯାଇଛନ୍ତି ବୈଷ୍ଣବ। ସେ ପ୍ରଶାସନ ଆଗରେ ଗୁହାରୀ କରିଛନ୍ତି ଯେ ତାଙ୍କୁ ସହଯୋଗର ହାତ ବଢ଼େଇଲେ ତାଙ୍କ ପରିବାର ଲୋକେ ଭଲରେ ରହିପାରିବେ। ତାଙ୍କୁ ଘର ବନେଇବା ପାଇଁ କିଛି ସରକାରୀ ସହାୟତା ଦେଲେ ଆଉ ଥରେ ଘରକୁ ତିଆରି କରି ପାରିବେ।