09-Jun-2022

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ରାଜନୀତିର ପାଣିପାଗ ବଦଳିବ କି ? ଏଭଳି ଚର୍ଚ୍ଚା କିଛିଦିନ ହେଲା ବଲାଙ୍ଗୀରରେ ଯୋରଦାର ଚାଲିଛି । ଶରତ ପିସିସି ସଭାପତି ହେବାପରେ ନରସିଂହ ଗୋଷ୍ଠୀ ନାଖୁସ ଥିବାର ଅନୁମାନ କରାଯାଉଥିବା ଓ ଶାସକଦଳ ପଟକୁ ତାଙ୍କ ପରିବାର ଢଳୁଥିବା ଆଲୋଚନା ଚାଲିଛି । ନରସିଂହ ମିଶ୍ର ନିଜେ ବିଜେଡି ଦଳକୁ ନଗଲେ ମଧ୍ୟ ତାଙ୍କ ପୁଅମାନଙ୍କୁ ଶାସକଦଳ ହାତରେ ଟେକିଦେବେ ବୋଲି ରାଜନୈତିକ ମହଲରେ ଆଲୋଚନା ହେଉଛି । ମମିତା ମେହେର ହତ୍ୟାକାଣ୍ଡ ଘଟଣାରେ ନରସିଂହଙ୍କ ପୁଅ ସରକାରୀ ଓକିଲ ହେବା ଘଟଣାକୁ ଅନେକ ଲୋକ ସମାଲୋଚନା କରିଥିଲେ । ଏପରିକି ନରସିଂହ ଶାସକଦଳ ସହିତ ଭିତିରି ବୁଝାମଣା ରଖିଥିବା କଂଗ୍ରେସ ଦଳରେ ଅଭିଯୋଗ ଉଠିଥିଲା । ସେହି ଆଲୋଚନା ନଥମୁଣୁ ଏବେ ବିଜେଡି  ସୁପ୍ରିମୋ ନବୀନ ପଟ୍ଟନାୟକଙ୍କ ସହିତ ନରସିଂହ ମିଶ୍ରଙ୍କ ହୋଡିଂକୁ ନେଇ ଚର୍ଚ୍ଚା ଯୋର ଧରିଛି । ମେଡିକାଲ କଲେଜ ଫଟୋଥାଇ ନବୀନ ପଟ୍ଟନାୟକ ଓ ନରସିଂହ ମିଶ୍ରଙ୍କ ଫଟୋଥିବା ହୋଡିଂ ବଲାଙ୍ଗୀରର ବିଭିନ୍ନ ସ୍ଥାନରେ ଲାଗିଛି । ଯାହାକୁ ନେଇ ବଲାଙ୍ଗୀରରେ ଖୁବ ଚର୍ଚ୍ଚା ହେଉଛି । ବିଜେଡି ଆଡକୁ ନରସିଂହ ଢଳୁଥିବା କିମ୍ବା ତାଙ୍କ ପରିବାର ସଦସ୍ୟ ବିଜେଡିରେ ମିଶିବାର ଆଶଂକା କରାଯାଉଛି । ତେବେ ଏହି ଘଟଣାକୁ ନେଇ ବିଜେଡି ଦଳର ଜିଲ୍ଲ୍‌l କାର୍ଯ୍ୟକାରୀ ସଭାପତି ଅଶୋକ ମହାନ୍ତି କହିଛନ୍ତି ଯେ, ରାଜ୍ୟରେ ବିଜେଡିର ଲୋକପ୍ରୀୟତା ବଢିଛି । ଏବେ ବିଧାୟକ ନରସିଂହ ମିଶ୍ରଙ୍କ ଲୋକପ୍ରୀୟତା କମୁଥିବାରୁ ଲୋକଙ୍କୁ ଭ୍ରମିତ କରିବାକୁ ବିଧାୟକ ଏଭଳି ଚାଲ କରିଥାଇପାରନ୍ତି ବୋଲି କହିଛନ୍ତି । ସେପଟେ ଏହାର ଜବାବ ରଖିଛନ୍ତି ବଲାଙ୍ଗୀର ବିଧାୟକ ତଥା କଂଗ୍ରେସ ବିଧାୟକ ଦଳର ନେତା ନରସିଂହ ମିଶ୍ର । ସେ ଗଣମାଧ୍ୟମକୁ କହିଛନ୍ତି ଯେ,ଏହି ହୋଡିଂ କିଏ ଲଗାଇଛି ସେ  ଏ ବିଷୟରେ ଜାଣନ୍ତି ନାହିଁ । ସେ କଂଗ୍ରେସରେ ରହିଛନ୍ତି ଓ ରହିବେ ମଧ୍ୟ । ତେବେ ବଲାଙ୍ଗୀର ମେଡିକାଲ କଲେଜ ତାଙ୍କର ଉଦ୍ୟମ ଓ ନବୀନ ପଟ୍ଟନାୟକଙ୍କ ସହଯୋଗରେ କରାଯାଇଛି  ଏହା ସମସ୍ତେ ଜାଣନ୍ତି ବୋଲି ଶ୍ରୀ ମିଶ୍ର କହିଛନ୍ତି । ସେପଟେ କଂଗ୍ରେସ ଦଳର କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜା ମଧ୍ୟ ପ୍ରତିକ୍ରୀୟା ରଖି କହିଛନ୍ତି ଯେ, ଶାସକ ଦଳର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବିରୋଧି କଂଗ୍ରେସଦଳର ବିଧାୟକଦଳର ନେତା ନରସିଂହ ମିଶ୍ରଙ୍କ ଫଟୋଥିବା ହୋଡିଂ ଲାଗିବା ନିହାତି ଆଶ୍ଚର୍ଯ୍ୟର କଥା । ନରସିଂହ ବାବୁ କିମ୍ବା ତାଙ୍କର କେହି ଏଭଳି ପୋଷ୍ଟର ଲଗାଇନଥିବେ । ବରଂ କେହି ଅପପ୍ରଚାର ପାଇଁ ଏଭଳି କରିଥାଏ ପାରେ । ତଥାପି ଏଭଳି ଅବେଳରେ କିଏ କାହିଁକି ଓ କଣପାଇଁ ନବୀନ ଓ ନରସିଂହଙ୍କ ଫଟୋଥିବା ହୋଡିଂ ଲଗାଇଲା ତାହାର ତଦନ୍ତ ହେବାର ଆବଶ୍ୟକତା ରହିଛି ବୋଲି ଶ୍ରୀ ସାଲୁଜା କହିଛନ୍ତି । ମେଡିକାଲ କଲେଜ ରାଜନୀତି ଆଜିର ନୁହଁ । ଏହାର ଶୀଳାନ୍ୟାସଠୁ ଆରମ୍ଭ କରି ଉଦଘାଟନ ପର୍ଯ୍ୟନ୍ତ ନରସିଂହ ମିଶ୍ର ଏଥିରୁ ଭରପୁର ଫାଇଦା ନେବାକୁ ଚେଷ୍ଟା କରିଛନ୍ତି । ମେଡିକାଲ କଲେଜ ଉଦଘାଟନ ବେଳେ କଚେରୀ ଛକରୁ ଆରମ୍ଭ କରି ମେଡିକାଲ କଲେଜ ପର୍ଯ୍ୟନ୍ତ ନରସିଂହଙ୍କ ହୋଡିଂ ଦେଖିବାକୁ ମିଳିଥିଲା । ସେ ସମୟରେ ହୋଡିଂରେ କେବଳ ନରସିଂହଙ୍କ ଫଟୋ ରହିଥିଲା । ଏବେ ବିଜେଡି ରାଜନୀତିରେ ରାଜପରିବାରର ପତିଆରା କମୁଥିବା ବେଳେ ଏହାର ସୁଯୋଗ ନେଇ ବିଜେଡି ସୁପ୍ରୀମୋଙ୍କୁ ଖୁସି କରିବାକୁ ନରସିଂହ ଗୋଷ୍ଠୀର ଏହା ଏକ ଚାଲ ନୁହେଁତ ବୋଲି ଆଲୋଚନା ହେଉଛି ।