06-Jun-2022

ବରଗଡ(ନିରଂଜନ ତ୍ରିପାଠୀ)- ଜୁନ୍ ୬ ତାରିଖରେ ବିକାଶ ଗ୍ରୁପ୍ ଅଫ୍ ଇନ୍‌ଷ୍ଟିଚ୍ୟୁସନ୍ସ୍ ଦ୍ୱାରା ପ୍ରଯୋଜିତ “ବଡ଼ ମା” ଚଳଚ୍ଚିତ୍ର ପ୍ରସ୍ତୁତି ସମ୍ବନ୍ଧରେ ଏକ ପ୍ରେସ୍‌ମିଟ୍ ଆୟୋଜିତ ହୋଇଥିଲା । ସ୍ୱାଧିନତାର ୭୫ତମ ବର୍ଷ ଉପଲକ୍ଷେ ସମଗ୍ର ଭାରତବର୍ଷ ଆଜାଦୀ କା ଅମୃତ ମହୋତ୍ସବ ପାଳନ ଅବସରରେ ବିକାଶ ଗ୍ରୁପ୍ ଓ ପଂଚବଟୀ ପ୍ରଡକ୍ସନ୍‌ର ମିଳିତ ଆନୁକୂଲ୍ୟରେ “ବଡ଼ ମା” ଚଳଚ୍ଚିତ୍ର ପ୍ରସ୍ତୁତି ସମ୍ବନ୍ଧରେ ବିକାଶ ଗ୍ରୁପ୍‌ର ଡାଇରେକ୍ଟର ଡ.ସମରେନ୍ଦ୍ର ନାଥ ପଣ୍ଡା ପ୍ରାରମ୍ଭିକ ସୂଚନା ଦେଇଥିଲେ । ବିକାଶ ଗ୍ରୁପ୍‌ର ଚେୟାର୍‌ମେନ୍ ଶ୍ରୀ ଡି.ମୂରଲୀ କ୍ରୀଷ୍ଣା ପ୍ରେସ୍‌ମିଟ୍‌କୁ ସମ୍ବୋଧିତ କରି ଏହାର ଆଭିମୁଖ୍ୟ ସମ୍ପର୍କରେ ବିସ୍ତୃତ ବିବରଣୀ ପ୍ରଦାନ କରିଥିଲେ । ସେ କହିଥିଲେ, ଆଜାଦୀ କା ଅମୃତ ମହୋତ୍ସବ ପରିପ୍ରେକ୍ଷୀରେ ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶାନୁଯାୟୀ ଅନେକ ଜନକଲ୍ୟାଣ ଯୋଜନାର ଶୁଭାରମ୍ଭ କରାଯାଉଛି । ଏହି ଧାରାରେ ବିଭିନ୍ନ ସରକାରୀ ଓ ବେସରକାରୀ ସ୍ତରରେ ଅନେକ କାର୍ଯ୍ୟକ୍ରମ ମାଧ୍ୟମରେ ଜନସଚେତନତା ଓ ସ୍ୱାଧିନତାର ମହନୀୟ ସ୍ୱାଦକୁ ଅବାଳବୃଦ୍ଧବନିତାଙ୍କ ହୃଦୟପଟରେ ପ୍ରସ୍ଫୁଟିତ କରିବାର ଚେଷ୍ଟା ଚାଲିଅଛି । ସିବିଏସ୍‌ଇ, ଏଆଇସିଟିଇ, ୟୁଜିସି ଭଳି ଶିକ୍ଷାତ୍ମକ ଗୁଣବତ୍‌ତା କାର୍ଯ୍ୟକାରୀ ସଂସ୍ଥାମାନେ ନିଜ ନିଜର ଅନୁବଦ୍ଧିତ ବିଦ୍ୟାଳୟ, ମହାବିଦ୍ୟାଳୟ ଓ ବିଶ୍ୱବିଦ୍ୟାଳୟଙ୍କ ମାଧ୍ୟମରେ ଏହି ଆଜାଦୀର ଅମୃତ ମହୋତ୍ସବ ସ୍ରୋତରେ ସହଯୋଗର ହାତ ବଢାଇଛନ୍ତି । ଏହି ମହାନ କାର୍ଯ୍ୟରେ ସମତାଳରେ ବିକାଶ ଗ୍ରୃପ୍ ଅଫ୍ ଇନ୍‌ଷ୍ଟିଚ୍ୟୁସନ୍ ନିଜର ଯୋଗଦାନ ପୂର୍ବକ ପଶ୍ଚିମ ଓଡ଼ିଶାର କମ୍ ଆଲୋଚିତ ବହ୍ନିକନ୍ୟା ପାର୍ବତୀ ଗିରିଙ୍କ ଅବଦାନକୁ ଲୋକଲୋଚନକୁ ଆଣିବା ଉଦ୍ଦେଶ୍ୟରେ “ବଡ଼ ମା” ଚଳଚିତ୍ର ପ୍ରସ୍ତୁତ କରିବାକୁ ଯାଉଛି । ଏହି ଚଳଚ୍ଚିତ୍ରକୁ ଆର୍ôଥକ ସହାୟତା ଓ ଅନ୍ୟାନ୍ୟ ସହଯୋଗ ଯୋଗାଇଦେବ ବିକାଶ ଗ୍ରୃପ୍ । ସାମାଜିକ ଉତ୍‌ତରଦାୟୀତ୍ୱ ଓ ସଂସ୍କାର ପାଇଁ ଚିରଚେଷ୍ଟିତ ବିକାଶ ଗ୍ରୃପ୍ ଜଣେ ମହିୟସୀ ମହିଳା ପାର୍ବତୀ ଗିରିଙ୍କ ଜୀବନଶୈଳୀ ଓ ଅବଦାନକୁ ଉପସ୍ଥାପନ କରି ଦେଶବ୍ୟାପି ଜନସାଧାରଣଙ୍କ ମଧ୍ୟରେ କମ୍ ଆଲୋଚିତ ସ୍ୱାଧୀନତା ସଂଗ୍ରାମୀମାନଙ୍କର ଏକ ଭିନ୍ନ ପରିଚୟ ସୃଷ୍ଟି କରିବା ପାଇଁଁ ଚେଷ୍ଟିତ ବୋଲି ସେ ମତବ୍ୟକ୍ତ କରିଥିଲେ । ବରଗଡ଼ ଜିଲ୍ଲାର ବିଜେପୁର ବ୍ଲକ୍ ସମଲେଇପଦର ଗ୍ରାମରେ ଜନ୍ମଗ୍ରହଣ କରିଥିବା ଏହି ମହିୟସୀ ମହିଳାଜଣଙ୍କ ସ୍ୱାଧୀନତା ସଂଗ୍ରାମରେ ସକ୍ରିୟ ଅଂଶ ଗ୍ରହଣ ଓ କଳା କ୍ଷେତ୍ରରେ ଅନନ୍ୟ ପ୍ରତିଭାସମ୍ପନ୍ନ ଥିବାସତ୍ୱେ ଆଜିବି କମ୍ ଅଲୋଚିତ । ଏହି ଚଳଚ୍ଚିତ୍ର ସମ୍ବନ୍ଧରେ ସେ ସାମ୍ବାଦିକମାନଙ୍କ ବିଭିନ୍ନ ପ୍ରଶ୍ନର ଉତ୍‌ତର ମଧ୍ୟ ରଖିଥିଲେ । ଚଳଚ୍ଚିତ୍ର ନିର୍ଦ୍ଦେଶକ ଶ୍ରୀ ଲିଟୁ ମହାନ୍ତି ସାମ୍ବାଦିକମାନଙ୍କୁ ଏହି ଚଳଚ୍ଚିତ୍ରର ପ୍ରସ୍ତୁତି ସମ୍ପର୍କୀୟ ବିଷୟବସ୍ତୁ, ସୁଟିଂ ସ୍ଥାନ ଓ ଚଳଚ୍ଚିତ୍ରର ଦୃଷ୍ଟିକୋଣକୁ ଉପସ୍ଥାପନା କରିଥିଲେ । ବିକାଶ ଗ୍ରୃପର ମ୍ୟାନେଜିଂ ଡାଇରେକ୍ଟର ଶ୍ରୀ ଜି. ଭାସ୍କର ରାଓ, ଏକ୍‌ଜିକ୍ୟୁଟିଭ୍ ଡାଇରେକ୍ଟର ଶ୍ରୀ ଡି. ନାଗେଶ୍ୱର ରାଓ ଚଳଚ୍ଚିତ୍ରଟିକୁ ସମାଜର ସମସ୍ତ ପିଢ଼ୀ ପାଇଁ ଏହା କିପରି ଉପଯୋଗୀ ହୋଇପାରିବ, ସେ ନେଇ ସାମ୍ବାଦିକମାନଙ୍କ ମତାମତ ନେବା ସହ ସମସ୍ତଙ୍କ ସହଯୋଗ କାମନା କରିଥିଲେ । ଏହି ପ୍ରେସ୍‌ମିଟ୍‌ରେ ବରଗଡ଼ ସ୍ଥିତ ବିକାଶ ଶିକ୍ଷାନୁଷ୍ଠାନମାନଙ୍କର ସମସ୍ତ ଅଧ୍ୟକ୍ଷ-ଉପାଧ୍ୟକ୍ଷମାନେ ଉପସ୍ଥିତ ଥିଲେ ।