01-Jun-2022

ବଲାଙ୍ଗିର/ତୁରେକେଲା(ପୂର୍ଣ୍ଣ ଶଶୀ ଶେଖର ରାଓ) କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ମିଳିତ ଉଦ୍ୟମରେ ଗରିବ ଖଟିଖିଆ ମଜୁରିଆଙ୍କ ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ କରୁଥିବା ଦେଖାଯାଏ। ଏହି କାର୍ଯ୍ୟକ୍ରମ ଗୁଡିକ କେତେ ଦୂର ଯେ ସଫଳ ହୁଏ ତାର ଆକଳନ କରିବାକୁ କୌଣସି ସରକାରୀ ବ୍ୟବସ୍ଥାରେ ତିଳେ ମାତ୍ର ଜାଗା ନାହିଁ। ପଶ୍ଚିମ ଓଡ଼ିଶାର ଦାଦନ ପ୍ରବଣ ଜିଲ୍ଲା ମଧ୍ୟରେ ବଲାଙ୍ଗିର, କଲାହାଣ୍ଡି,ବରଗଡ଼, ସୋନପୁର, ନୂଆପଡ଼ା, ରାୟଗଡ଼ା, ଜିଲ୍ଲାରୁ ହଜାର ହଜାର ଗରିବ ଶ୍ରେଣୀର ଲୋକେ ବାହାର ରାଜ୍ୟକୁ ଦାଦନ ଖଟିବାକୁ ଯାଇଥାନ୍ତି, ହେଲେ କେନ୍ଦ୍ର ଓ ରାଜ୍ୟ ସରକାର ଡିଣ୍ଡିମ ପିଟୁଛି ଯେ ମନରେଗା ମାଧ୍ୟମରେ ଗରିବ ମାନଙ୍କୁ  ୧୦୦ ଦିନ ର କର୍ମ ନିଯୁକ୍ତି ୯୦ ଦିନ ର ଭତ୍ତା ଯୋଗାଇ ଦେବା ପାଇଁ ପ୍ରଣୟ ନେଇଛି। ଗ୍ରାଉଣ୍ଡ ଜିରୋ ରେ ପହଞ୍ଚିଲା ବେଳକୁ ଏହି ସବୁ ଘଟଣା ଜଳ ଜଳ ଦେଖିବାକୁ ମିଳେ। ବଲାଙ୍ଗିର ଜିଲ୍ଲା ତୁରେକେଲା ବ୍ଲକ ତୁରେକେଲା ପଞ୍ଚାୟତର ବୁଢୀବାହାଲ ଗ୍ରାମ ରେ ୫ ବର୍ଷ ପୁରୁଣା ମନରେଗା ରାସ୍ତା (ପି, ଡବ୍ଳୁ, ଡି ରୋଡ଼ ରୁ ମହନୀଲହ ରାସ୍ତା ଓ ବୁଢୀବାହାଲ ବସ୍ତିରୁ ଗଞ୍ଜାଉଡାର ରାସ୍ତା)ମାଟି କାମ ସମ୍ପୂର୍ଣ୍ଣ ହୋଇଥିବାବେଳେ ଗ୍ରାମର ଶ୍ରମିକ ଶ୍ରେଣୀ ଯେତେ ମାଟି ବୋହି ଥିଲେ ମଧ୍ୟ ୨୦୦୦ ଟଙ୍କା ଲେଖାଏଁ ପାଉଣା ପାଇଥିବା କହିଛନ୍ତି। ୪୦ ବାଡି ମାଟି ବୋହି ଥିବା ବେଳେ ୨୦୦୦ ଟଙ୍କା,୩୫ ବାଡ଼ି ବୋହି ଥିଲେ ମଧ୍ୟ ୨୦୦୦ ଟଙ୍କା,୩୦ ବାଡ଼ି ବୋହି ଥିଲେ ମଧ୍ୟ ୨୦୦୦ ଟଙ୍କା,୨୫ ବାଡ଼ି ବୋହି ଥିଲେ ମଧ୍ୟ ୨୦୦୦ ଟଙ୍କା । ବକେୟା ଟଙ୍କା ନକଲି ଶ୍ରମିକ ମାନଙ୍କ ଖାତାରେ ଜମା କରି ହଡ଼ପ କରିଥିବା ଶ୍ରମିକ ଶ୍ରେଣୀ ଅଭିଯୋଗ ଆଣିଛନ୍ତି । ଏହି ଘଟଣା ବିଷୟରେ ଶ୍ରମିକ ମାନେ ବ୍ଳକ କୁ ଯାଇ ବୁଝିଥିଲେ ଯେ ନୂତନ ସରପଞ୍ଚ ବସିବା ପରେ ତୁମ ଖାତାରେ ଟଙ୍କା ଗୁଡିକ ପଡିଯିବ ବୋଲି ଜଣାଇଥିଲେ। ବ୍ଳକ ର ଏହି ଆଶ୍ଵସନାରେ ଶ୍ରମିକ ଶ୍ରେଣୀ ଚାତକ ପକ୍ଷୀ ପରି ଟଙ୍କା ପଡ଼ିବାର ବାଟକୁ ଚାହିଁ ବସିଛନ୍ତି ।   ଆଗାମୀ ୧୫ ଦିନ ମଧ୍ୟରେ ଏହି ଯୋଜନାର ପାଉଣା ଶ୍ରମିକ ମାନଙ୍କର ଖାତାରେ ଯଦି ନପଡେ ବୁଢୀବାହାଲ ଗ୍ରାମର ଶ୍ରମିକ ମାନେ ବ୍ଳକ କାର୍ଯ୍ୟାଳୟ ଓ ଜିଲ୍ଲାପାଳ କାର୍ଯ୍ୟାଳୟ ସାମ୍ନାରେ ଧାରଣା ଦେବା ପାଇଁ ଚେତାବନୀ ଦେଇଛନ୍ତି।