29-May-2022

ସୁବର୍ଣ୍ଣପୁର - ସମ୍ପ୍ରତି ସମଗ୍ର ପଶ୍ଚିମ ଓଡିଶା ପ୍ରଚଣ୍ଡ ରୌଦ୍ର ତାପ ରେ ଭାରତରେ ଏକ ନମ୍ବର ସ୍ଥାନରେ ରହି  ଜଳିପୋଡି ଯାଉ ଥିବା ବେଳେ ସାବିତ୍ରୀ ଅମାବାସ୍ୟା ଉତ୍ସବ ପାଇଁ ସୁବର୍ଣ୍ଣପୁର ସହର ଚଳଚଞ୍ଚଳ ହୋଇ ଉଠିଛି l ସେପଟେ ସାବିତ୍ରୀ ମାନଙ୍କ ପୂଜା ଓ ଲୁଗା ସାମଗ୍ରୀ ସଂଗ୍ରହ, ବିଶେଷ କରି ସାବିତ୍ରୀ ମାନଙ୍କ ତାତି ରେ ବିଚରା ସତ୍ୟବାନ ମାନେ ବେହାଲ ହୋଇ ପଡିଛନ୍ତି l 47 ଡିଗ୍ରୀ ଖରା ଓ ଗୁଳୁଗୁଳିରେ 108 ପ୍ରକାର ଫଳମୂଳ ସଂଗ୍ରହ ଓ ଲୁଗା ସାମଗ୍ରୀ ସଂଗ୍ରହରେ ଗୁଣ୍ଡିଚା ମନ୍ଦିରରୁ ଗ୍ରୀଡ଼କୋ କଲୋନୀ ମାର୍କେଟ ଯାଏ ଦମ୍ପତି ମାନେ ଦୋକାନ ଦୋକାନ ବୁଲି ମୁଲଚାଲ କରିବା ବେଳେ 108 ଆମ୍ବୁଲାନ୍ସ ବି ଖୋଜା ପଡୁଛି l ଫଳ ମୂଳ ବେପାରୀ  ମାନେ  ଦିବା ରାତ୍ର  ପସରା ମେଲାଇ ଦେଇଛନ୍ତି l ଏଣେ ବେପାରୀ ଭାଇ ମାନଙ୍କ ପୁଷ ମାସ ପରି ସବୁ ଜିନିଷର ମୂଲ୍ୟର ଡାହାଣ ପଟେ ମାତ୍ର ଗୋଟାଏ ଗୋଟାଏ ଶୂନ ବସାଇ ସାବିତ୍ରୀ ବଜାରକୁ ଦଖଲ କରି ନେଇଛନ୍ତି l ଏଣେ ଅଣନିଶ୍ୱାସୀ ସତ୍ୟବାନ ମାନେ ସାବିତ୍ରୀ ମାନଙ୍କ ଇଚ୍ଛା ପୂରଣ ପାଇଁ ମୁହଁ ରେ ଚଷମା ମୁଣ୍ଡରେ ଗାମୁଛା ଭିଡି ଅଂଶୁଘାତକୁ ଖାତିରି ନ କରି କିଣାବିକାରେ ପୁରା ପୁରି ଫୁଲ ଦମରେ ଲାଗି ପଡିଛନ୍ତି l ଏଠି ପ୍ରଶ୍ନ ଉଠେ ଯେ

ସେଇ ପୁରାଣ ଯୁଗର ସାବିତ୍ରୀ ମାନେ କଣ ସତ୍ୟବାନଙ୍କୁ ଏତେ ଚାପ ଏତେ କଷ୍ଟ ଦେଇଥିବେ ? ତାଙ୍କରି ନିଷ୍ଠା, ତ୍ୟାଗ, ସତୀତ୍ୱ, ସର୍ବୋପରି ସମର୍ପିତ ମନୋଭାବ ହିଁ ସତ୍ୟବାନଙ୍କୁ ଯମରାଜଙ୍କ ମୁହଁ ରୁ ଫେରାଇ ଆଣିପାରିଥିଲା l ଏଣୁ ବର୍ତ୍ତମାନର ସାବିତ୍ରୀ ମାନେ ସେହି ଆଦର୍ଶ ରେ ଅନୁପ୍ରାଣିତ ହୋଇ ଚାକଚକ୍ୟ ଓ ଔପଚାରିକତା ରୁ ଦୁରେଇ ରହିଲେ ଭାରତର ସେହି ମହାନ ନାରୀ ସଂସ୍କୃତି ଉଦ୍ଜୀବିତ କରି ହେବ ଏବଂ ବେପାରୀ ଭାଇ ମାନଙ୍କ ଦୌରାତ୍ମ୍ୟ  ବି କମିଯିବ, ଅଶାନ୍ତି ଦୂର ହେବ ଓ ନାରୀ ମାନଙ୍କ ସେଇ ପୂର୍ବ ମର୍ଯ୍ୟାଦା ପ୍ରତିଷ୍ଠା ହେବ l