14-May-2022

ଟିଟିଲାଗଡ(ପ୍ରେରଣା ଖବର) , ସଦ୍ୟ ସମାପ୍ତ ହୋଇଥିବା ପୌରପରିଷଦ ନିର୍ବାଚନରେ ବିଜେପି ଦଳର ପ୍ରାଥିନୀ ମମତା ଦେବୀ ଜୈନ ପ୍ରତ୍ୟକ୍ଷ ଭାବରେ ପୌର ଅଧ୍ୟକ୍ଷା ଭାବେ ନିର୍ବାଚିତ ହୋଇଥିବା ବେଳେ ପରିଷଦର ୧୫ ଟି ୱାର୍ଡ ମଧ୍ୟରୁ  ୫ ଟି ୱାର୍ଡ ବିଜେପି ଓ ୧୦ ୱାର୍ଡ ରେ  ବିଜେଡିର କାଉନସିଲର ଜିତିଥିଲେ।ପୌର ଅଧ୍ୟକ୍ଷା ବିଜେପି ର ଥିବାବେଳେ ପୌର ଉପାଧକ୍ଷା ବିଜେଡି ଏବଂ ସ୍ଥାନୀୟ ବିଧାୟିକା ମଧ୍ୟ ବିଜେଡି ଦଳ ର ଥିବାବେଳେ ନୂତନ ପୌର ପରିଷଦ ଉଭୟ ଦଳ ସଦସ୍ୟ ଙ୍କ ମଧ୍ୟରେ ସମନ୍ଵୟ ରକ୍ଷା କରି ସୁରୁଖୁରୁରେ ଚାଲିବା ନେଇ ସହରବାସୀଙ୍କ ମନରେ ସନ୍ଦେହ ସୃଷ୍ଟି ହୋଇଥିଲା। ତେବେ ଦାୟିତ୍ଵ ଗ୍ରହଣ ପରେ ପୌର ଅଧ୍ୟକ୍ଷା ସମସ୍ତଙ୍କୁ ସାଙ୍ଗରେ ନେଇ ସମସ୍ତଙ୍କ ସହୋଯୋଗରେ ସହରର ବିକାଶକୁ ପ୍ରାଥମିକତା ଦେବାକୁ ପ୍ରକାଶ କରିଥିଲେ।  ସହରର ବିକାଶରେ ସ୍ଥାନୀୟ ବିଧାୟିକା ତଥା ମନ୍ତ୍ରୀଙ୍କ ଯଥେଷ୍ଟ ଅବଦାନ ମଧ୍ୟ ରହିଥିବା ବେଳେ ନୂତନ ପୌର ପରିଷଦ ଗଠନ ପରେ ସହରର ବିକାଶ କୁ ଆହୁରି ତ୍ଵରାନିତ କରିବା ସହ  ଉଭୟ ଦଳର ସଦସ୍ୟ ଦଳୀୟ ମନୋବୃତ୍ତି ଠୁ ଉର୍ଦ୍ଧରେ ଯାଇ ସହରବାସୀଙ୍କ ସ୍ବାର୍ଥକୁ ପ୍ରାଥମିକତା ଦେଇ ଆଗକୁ ବଢିବା ଶ୍ରେୟସ୍କର ଥିବାବେଳେ କେତେକାଂଶରେ ଏହାର ବ୍ୟତିକ୍ରମ ଦେଖିବାକୁ ମିଳୁଛି। ଗତକାଲି ପୌର ପରିଷଦ ପକ୍ଷରୁ ଆୟୋଜିତ ହୋଇଥିବା ଏକ ବୈଠକରେ ଏହାର କିଛି ଝଲକ ଦେଖିବାକୁ ମିଳିଥିଲା। ସ୍ଥାନୀୟ ବିଧାୟିକା ତଥା ମନ୍ତ୍ରୀ ଟୁକୁନି ସାହୁ,କାର୍ଯ୍ୟ ନିର୍ବାହୀ ଅଧିକାରୀ ତଥା ଉପଜିଲ୍ଲାପାଳ,ପୌର ଅଧ୍ୟକ୍ଷା ଏବଂ ସମସ୍ତ କାଉନସିଲର ଙ୍କ ଉପସ୍ଥିତି ରେ ବୈଠକ ଚାଲିଥିବା ବେଳେ ସହର ମଧ୍ୟରୁ ଧୂଳି ନିଷ୍କାସନ କରିବା ପାଇଁ ଉଚ୍ଚ କ୍ଷମତା ସମ୍ପନ୍ନ ଯାନ୍ତ୍ରିକ ଗାଡ଼ି ନିୟୋଜିତ କରିବାକୁ ନେଇ କଥା କଟାକଟି ଆରମ୍ଭ ହୋଇଥିଲା। ୱାର୍ଡ ନଂ ୫ ର କାଉନସିଲର ଟିଟିଲାଗଡ ବିଧାୟିକା ଙ୍କ ପ୍ରତି ଦେଇଥିବା ମନ୍ତବ୍ୟକୁ ନେଇ  ବୈଠକରେ ଅପ୍ରୀତିକର ପରିସ୍ଥିତି ସୃଷ୍ଟି ହେଉଥିବା ଦେଖି ଉପଜିଲ୍ଲାପାଳ ସଭା କକ୍ଷ ରୁ ବାହାରି ଯାଇଥିଲେ।ଏହାପରେ ମନ୍ତ୍ରୀ ଓ ସମସ୍ତ ବିଜେଡି କାଉନସିଲର ମଧ୍ୟ ସଭାଗୃହ ରୁ ବାହାରି ଯାଇଥିଲେ। ଏହାକୁ ନେଇ ପୌରାଧ୍ୟକ୍ଷା ବିଚଳିତ ହେବା ସହ ତାଙ୍କୁ ଲୋକେ ପ୍ରତ୍ୟକ୍ଷ ଭାବରେ ଭୋଟ ଦେଇ ନିର୍ବାଚିତ କରିଥିଲେ ମଧ୍ୟ ତାଙ୍କୁ ପୌର ପରିଷଦରେ ଶାସକ ଦଳ ସହଯୋଗ କରୁ ନଥିବା ଓ ସମସ୍ତ କାମ ରେ ବାଧା ସୃଷ୍ଟି କରୁଥିବା ନେଇ ଅଭିଯୋଗ ଉଠାଇଥିଲେ। ୱାର୍ଡ ନଂ୬ ର କାଉସିଲର ତାଙ୍କୁ ଆଙ୍ଗୁଳି ନିର୍ଦ୍ଦେଶ କରି ଦୁର୍ବ୍ୟବହାର କରିଥିବା ନେଇ କାନ୍ଦି କାନ୍ଦି ଗଣ ମାଧ୍ୟମ ପ୍ରତିନିଧିଙ୍କୁ ଜଣାଇଥିଲେ। ତେବେ ବିଭିନ୍ନ ସାମାଜିକ ଗଣମାଧ୍ୟମରେ ଏହି ଘଟଣାର ଭିଡିଓ ଭାଇରାଲ ହେବା ପରେ ଏହାକୁ ନେଇ ସହରବାସୀ ତଥା ବୁଦ୍ଧିଜୀବୀ ମହଲରେ ଅସନ୍ତୋଷ ଦେଖାଦେଇଛି।