20-Nov-2020

ମୁମ୍ବାଇ, (ପ୍ରେରଣା ଖବର) - କରୋନା ସଂକ୍ରମଣ ହ୍ରାସ ପାଉଥିବାରୁ ଆସନ୍ତା ୨୩ ତାରିଖ ଅର୍ଥାତ ସୋମବାର ଠାରୁ ମୁମ୍ବାଇରେ ଥିବା ସ୍କୁଲ ଗୁଡ଼ିକ ଖୋଲିବାର ଥିଲା। ତେବେ ଶୀତ ପଡ଼ିବା କ୍ଷଣି କରୋନା ସଂକ୍ରମଣ ବୃଦ୍ଧି ପାଇବାରୁ  ବାଧ୍ୟ ହୋଇ ମୁମ୍ବାଇ ପୌରପାଳିକା(ବିଏମସି) ନିଜ ନିଷ୍ପତ୍ତି ବଦଳାଇଛି ! କହିଛି ଯେ ସୋମବାର କୌଣସି ପ୍ରକାରର ସ୍କୁଲ ଖୋଲିବ ନାହିଁ। ଆସନ୍ତା ଡିସେମ୍ବର ୩୧ ଯାଏ ମୁମ୍ବାଇର ସମସ୍ତ ସ୍କୁଲ ବନ୍ଦ ରହିବ। ମୁମ୍ବାଇ ମେୟର କିଶୋର ପେଡେନକର କହିଛନ୍ତି, କୋଭିଡି-୧୯ ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି। ବର୍ତ୍ତମାନ କରୋନାର ଦ୍ୱିତୀୟ ଲହରୀ ଫେରିବାର ସମ୍ଭାବନା ରହିଛି। ତେଣୁ ଡିସେମ୍ବର ୩୧ ଯାଏ ମୁମ୍ବାଇର ସମସ୍ତ ସ୍କୁଲକୁ ଛୁଟି ଘୋଷଣା କରାଯାଉଛି ବୋଲି ସେ କହିଛନ୍ତି!!ଗୁରୁବାର ମୁମ୍ବାଇରେ ଆଉ ୯୨୪ ଜଣଙ୍କ କରୋନା ଟେଷ୍ଟ ରିପୋର୍ଟ ପଜିଟିଭ ଆସିଛି। ଏହାକୁ ମିଶାଇ ସହରରେ ଏଯାଏ ୨,୭୨,୪୪୯ ଜଣ କରୋନାରେ ଆକ୍ରାନ୍ତ ହୋଇଛନ୍ତି। ଚଳିତ ସପ୍ତାହରେ ଗୋଟିଏ ଦିନରେ ଏତେ ସଂଖ୍ୟକ କରୋନା ରୋଗୀ ଚିହ୍ନଟ ହେବା ପ୍ରଥମ ଘଟଣା। ସେହିପରି ମୁମ୍ବାଇରେ ଆଉ ୧୨ ଜଣଙ୍କ ମୁଣ୍ଡ ନେଇଛି କରୋନା। ଫଳରେ ମୁମ୍ବାଇରେ କରୋନା ଜନିତ ମୃତ୍ୟୁସଂଖ୍ୟା ୧୦,୬୨୪ରେ ପହଞ୍ଚିଛି!!