09-May-2022

ବଲାଙ୍ଗିର/ପାଟଣାଗଡ଼(ପୂର୍ଣ ଶଶୀ ଶେଖର ରାଓ)::ସରକାର ଗରିବ ନିରିହ ଲୋକଙ୍କ ରହିବା ନିମନ୍ତେ ଅନେକ ଯୋଜନା କାର୍ଯ୍ୟକାରୀ ଯାହାକି ଇନ୍ଦିରା ଆବାସ ଯୋଜନା,ବିଜୁ ପକ୍କା ଘର ଯୋଜନା, ପ୍ରଧାନମନ୍ତ୍ରୀ ଆବାସ ଯୋଜନା ହେଲେ ତାହା କେତେ ଯେ କାର୍ଯ୍ୟକାରୀ ହେଉଛି ତାହା ଆକଳନ କଲେ ଜାଣିପାରିବେ। ପ୍ରଶାସନିକ ଅଧିକାରୀ ଓ ରାଜନେତା ମାନଙ୍କର ଅବହେଳା ଯୋଗୁଁ ଅନେକ ଲୋକ ସୁବିଧା ପାଇବାରୁ ବଞ୍ଚିତ। ବିଶେଷ କରି ପଶ୍ଚିମାଞ୍ଚଳର ଲୋକେ ଭଙ୍ଗା କୁଡିଆ ଘରେ ଜୀବନଯାପନ କରୁଥିବା ଦେଖିବାକୁ ମିଳେ। କେହି କେହି ତ ଘର ନଥିବାରୁ ପାଇଖାନା ରେ ରହୁଥିବା ଦେଖିବାକୁ ମିଳିଥାଏ। ଜଣେ ଜଣେ ଗାଁ ଦାଣ୍ଡରେ ସରକାରୀ କାର୍ଯ୍ୟାଳୟ ବାରଣ୍ଡାରେ ଶୋଇ ଶୋଇ ଦିନ କାଟୁଛନ୍ତି। କେହି କେହି ପଲିଥିନ ତଳେ ଜୀବନ ଯାପନ କରୁଥିବା ଦେଖିବାକୁ ମିଳୁଛି। ଏଭଳି ଏକ ଦୁଃଖଦ ଘଟଣା ଦେଖିବାକୁ ମିଳିଛି ବଲାଙ୍ଗିର ଜିଲ୍ଲା ଦେଓଗାଁ ବ୍ଲକ ଉପରଝର ପଞ୍ଚାୟତ ରେଙ୍ଗାଲି ଗାଁ ରେ ଏଠାରେ ରୁହନ୍ତି ସାହେବ ସୁନା (୭୦) ଓ ତାଙ୍କ ଝିଅ ଏବଂ ଦୁଇ ନାତି ଓ ନାତି ବୋହୂ।ତାଙ୍କ ଝିଅ ମଧ୍ୟ ବିକଳାଙ୍ଗ ସେ ବି ବର୍ତ୍ତମାନ ବୃଦ୍ଧ ହୋଇ ଗଲେଣି ବେଶୀ କଠିନ କାମ କରିପାରନ୍ତି ନାହିଁ।ତାଙ୍କ ଗୋଟିଏ ନାତି ବାହାର ରାଜ୍ୟକୁ ଦାଦନ ଖଟିବାକୁ ଯାଇ କିଛି ଅର୍ଥ

ଉପାର୍ଜନ କରିଆଣିଲେ ପରିବାର ଚଳନ୍ତି।ତାଙ୍କ ଜମିବାଡ଼ି କିଛି ନାହିଁ ସେମାନେ ୫ ପ୍ରାଣୀ କୁଟୁମ୍ବ ଏକ ଭଙ୍ଗା କୁଡିଆ ରେ ପଲିଥିନ ତଳେ ଜୀବନ ବିତାଉଛନ୍ତି। ନାଁ ସିନା ସାହେବ ହେଲେ ସେ ପ୍ରକୃତରେ ଦୁଃଖର ସାହେବ କହିଲେ ଅତ୍ୟୁକ୍ତି ହେବ ନାହିଁ।ଏ ବିଷୟରେ ଖବର ପାଇ ସମାଜସେବୀ ଶଙ୍କର୍ଷଣ ମହାପାତ୍ର ତାଙ୍କ ଘରକୁ ଯାଇକରି କିଛି ଆର୍ଥିକ ସହାୟତା ଦେବା ସହ ବ୍ଳକ ପ୍ରଶାସନ କୁ ଅବଗତ କରାଇଥିଲେ ମଧ୍ୟ ଆଜି ପର୍ଯ୍ୟନ୍ତ କୌଣସି ସୁଫଳ ମିଳିନାହିଁ।ତାଙ୍କ ଘର ଗତବର୍ଷ ନିଆଁ ଲାଗିଯିବାରୁ ନଷ୍ଟ ହୋଇଯାଇଥିବା ବେଳେ ଆଜି ପର୍ଯ୍ୟନ୍ତ କୌଣସି ଆର୍ଥିକ ସହାୟତା ମିଳିପାରିନଥିଲା। ଏହାକୁ ରାଜସ୍ବ ନୀରିକ୍ଷକ ମଧ୍ୟ ରିପୋର୍ଟ ନେଇଥିଲେ ସୁଦ୍ଧା କିଛି ଫଳାଫଳ ହେଲାନାହିଁ। ଏଥିପ୍ରତି ପଞ୍ଚାୟତ କିମ୍ବା ବ୍ଳକ ପ୍ରଶାସନ ର କୌଣସି ଦୃଷ୍ଟି ପଡୁନାହିଁ ବୋଲି ଗ୍ରାମବାସୀ ଙ୍କ ଠାରୁ ଶୁଣିବାକୁ ମିଳୁଛି। ଏଥିପ୍ରତି ଜିଲ୍ଲା ପ୍ରଶାସନ ଧ୍ୟାନ ଦେଇ ଉଚିତ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରିଛନ୍ତି।