17-Nov-2020

ବଲାଙ୍ଗିର(ପ୍ରେରଣା ଖବର)-ଆଜି ପୂର୍ବାହ୍ନରେ ବଲାଙ୍ଗୀର ସହରସ୍ଥ ଭାଗିରଥୀ ଛକ  ନିକଟରେ ଥିବା ରିଲାଏନ୍ସ ସ୍ମାର୍ଟ ସମ୍ମୁଖରେ ଏକ ଅସ୍ଥାୟୀ କୋଭିଡ କିଓକ୍ସ ଉଦ୍‌ଘାଟିତ ହୋଇଯାଇଛି । ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା, ଓଡ଼ିଶା ଜୀବିକା ମିଶନ, ମିଶନ ଶକ୍ତି, ଓର୍‌ମାସ୍ ଏବଂ ଜିଲ୍ଲା ପ୍ରଶାସନର ସହାୟତାରେ ଖୋଲା ଯାଇଥିବା ଏହି ଅସ୍ଥାୟୀ କୋଭିଡ କିଓକ୍ସକୁ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଡ. ମହେଶ୍ୱର ସ୍ୱାଇଁ ଉଦ୍‌ଘାଟନ କରିଥିଲେ । ଏହି କୋଭିଡ କିଓକ୍ସ ଆଶୁତୋଷ ସ୍ୱୟଂ ସହାୟକ ଗୋଷ୍ଠୀ, ରାଜୀବ ନଗର, ବଲାଙ୍ଗୀରଙ୍କ ଦ୍ୱାରା ଦୀର୍ଘ ଏକ ମାସ ଅର୍ଥାତ ନଭେମ୍ବର ର ୧୭ ତାରିଖରୁ ଡିସେମ୍ବର ୧୭ ତାରିଖ ପର୍ଯ୍ୟନ୍ତ ପରିଚାଳିତ ହେବ ।

କୋଭିଡ କିଓକ୍ସରେ କୋଭିଡ ସମ୍ବନ୍ଧୀୟ ସାମଗ୍ରୀ ଯଥା- ମାସ୍କ, ହ୍ୟାଣ୍ଡ ୱାସ୍‌, ଫେସ୍ ସିଲ୍‌, ସାନିଟାଇଜର, ହେଣ୍ଡ ଗ୍ଲୋଭ, କାଢ଼ା ପ୍ରସ୍ତୁତି କଂଚା ମାଲ ଏବଂ ଅନ୍ୟାନ୍ୟ କୋଭିଡ ସାମଗ୍ରୀ ସୁଲଭ ମୂଲ୍ୟରେ ଗୋଟିଏ ସ୍ଥାନରୁ ଜନସାଧାରଣ ପାଇପାରିବେ । କୋଭିଡ କିଓକ୍ସ ଉଦ୍‌ଘାଟନୀ କାର୍ଯ୍ୟକ୍ରମରେ ଓରମାସ୍ ର ଯୁଗ୍ମ କାର୍ଯ୍ୟନିର୍ବାହୀ ଅଧିକାରୀ ତଥା ଜିଲ୍ଲା ପ୍ରକଳ୍ପ ସଂଯୋଜକ, ଓଡ଼ିଶା ଜୀବିକା ମିଶନ କମଳେନ୍ଦୁ ପଲ, ନାବାର୍ଡର ଡିଡିଏମ୍ ଲକ୍ଷ୍ମଣ ସାଏ, ଜିଲ୍ଲା ସୂଚନା ଓ ଲୋକ ସଂପର୍କ ଅଧିକାରୀ ଜୟଦେବ ପାଣିଗ୍ରାହୀ, ମିଶନ ଶକ୍ତି ପ୍ରକଳ୍ପ ସଂଯୋଜକ ସୁମନ ଦ୍ୱିବେଦୀ ପ୍ରମୁଖ ଉପସ୍ଥିତ ଥିଲେ ।