19-Mar-2022

ନୟାଗଡ, (ପ୍ରଦୀପ କୁମାର ପଣ୍ଡା: )ଗତ ୭ ତାରିଖ ବିଳମ୍ବିତ ରାତିରେ ଏକ ମର୍ମନ୍ତୁଦ ସଡକ ଦୁର୍ଘଟଣାରେ ଦୁଇ ସାଙ୍ଗ (ହାପି ଏବଂ ରଶ୍ମି)ଙ୍କର ମୃତ୍ୟୁ ଓଡ଼ଗାଁ ଅଞ୍ଚଳବାସୀଙ୍କୁ ସ୍ତବ୍ଧ କରିଦେଇଥିଲା ।ଉଭୟ ସାଙ୍ଗଙ୍କର ସ୍ମୃତି ରକ୍ଷା ଉଦ୍ଦେଶ୍ୟରେ ଆଜି ଓଡ଼ଗାଁ ଯୁବକମାନଙ୍କ ଦ୍ୱାରା ସ୍ଥାନୀୟ ଇନଡୋର ଷ୍ଟାଡିୟମଠାରେ ଓଡିଶା ମୋ ପରିବାର ଆନୁକୂଲ୍ୟରେ ଏକ ସ୍ବେଚ୍ଛାକୃତ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଅଛି ।ଆଜିର ଶିବିରରେ ସମୁଦାୟ ୫୧ ୟୁନିଟ ରକ୍ତ ସଂଗୃହୀତ ହୋଇଥିଲା । ଦୁର୍ଘଟଣା ଜନିତ ମୃତ୍ୟୁ ବିଶେଷ କରି ରକ୍ତଅଭାବ ରୁ ହେଉଥିବା ର ଦୃଷ୍ଟିରୁ ଆଜିର ଏହି ରକ୍ତଦାନ ଶିବିର ପାଇଁ ବୁଦ୍ଧିଜୀବୀ ମାନେ ଭୁରି ପ୍ରଶଂସା କରିଛନ୍ତି | ବ୍ଲକ ଅଧ୍ୟକ୍ଷ ଲୋକନାଥ ସାହୁଙ୍କ ତତ୍ତ୍ୱାବଧାନରେ ଅନୁଷ୍ଠିତ ଏହି ଶିବିରକୁ ପୂର୍ବତନ ଜିଲ୍ଲା ପରିଷଦ ସଭ୍ୟ ବିଭୁପ୍ରସାଦ ସାହୁ ଉଦଘାଟନ କରିଥିଲେ।ସମାଜସେବୀ ଦାମୋଦର ସାହୁ ଉପସ୍ଥିତ ରହି ରକ୍ତଦାତାଙ୍କୁ ଉତ୍ସାହିତ କରିଥିଲେ।ରକ୍ତଦାତାମାନେ ଦୁଇ ସାଙ୍ଗଙ୍କ ଅମର ଆତ୍ମାର ସଦ୍ଗତି କାମନା କରିବା ସହ ଦ୍ରୁତ ଗତିରେ ଗାଡିଚାଳନାରୁ ନିବୃତ୍ତ ରହିବା ପାଇଁ ଯୁବବର୍ଗଙ୍କୁ ନିବେଦନ କରିଥିଲେ।ରାଜେଶ ସ୍ୱାଇଁ, ଅମ୍ରିତ ପ୍ରିୟଦର୍ଶନ ପଣ୍ଡା,ସୁଦର୍ଶନ ସାହୁ,ଭାଗ୍ୟବାନ ସାହୁ ଓ କାହ୍ନା ସାହୁ ପ୍ରମୁଖ ଶିବିର ପରିଚାଳନା କରିଥିଲେ। ରକ୍ତଦାନ ପରି ମହତ୍ କାର୍ଯ୍ୟକୁ ଦିବଙ୍ଗତ ରଶ୍ମି ରଞ୍ଜନ ଦୋରା ଓ ବିକାଶ ମହାପାତ୍ରଙ୍କ ସ୍ମୃତି ଉଦ୍ଦେଶ୍ୟରେ ଉତ୍ସର୍ଗ କରାଯାଇଥିଲା ।