09-Mar-2022

ବଲାଙ୍ଗୀର// ( ମଳୟ ମିଶ୍ରଙ୍କ ରିପୋର୍ଟ ) : ସଂପ୍ରତି ନିର୍ବାଚନଋତୁରେ ଅନ୍ୟସବୁ କାମଦାମ ପ୍ରତି ସରକାରଙ୍କର ସେତେଟା ନଜର ନାହିଁ । ଗ୍ରାମାଞ୍ଚଳରେ ପଞ୍ଚାୟତ ନିର୍ବାଚନ ପରେ ଏବେ ଲାଗ୍ ଲାଗ୍ ପୌର ନିର୍ବାଚନ ପ୍ରକ୍ରିୟା ଚାଲିଛି । ଲୋକଙ୍କର ବି ଏଇ କ୍ଷମତା ପ୍ରତିଯୋଗିତାରେ ଅନ୍ୟଆଡକୁ ଦୃଷ୍ଟି ବୁଲାଇବାକୁ ଫୁର୍ ସତ୍ ମିଳୁନାହିଁ ।  ତେଣୁ ଦୁଦୁର୍ନୀତିଗ୍ରସ୍ତ କର୍ମଚାରୀଙ୍କ ପାଇଁ ଇଏ ଏକ ସୁଯୋଗ । ଏଇ ସୁଯୋଗରେ ସେମାନେ ଅଧେ ଅଧେ କରି ମିଥ୍ୟାବିଲ୍ କରି ବେଶ୍ ହାତଚିକ୍କଣ କରିଚାଲିଛନ୍ତି । ଏଭଳି କିଛି କଥା ଏବେ ଗଣମାଧ୍ୟମ ଜରିଆରେ ଲୋକଲୋଚନକୁ ଆସିଛି ।  କିଛିଦିନତଳେ ଲାଠୋର ବନବିଭାଗ ରେଞ୍ଜ୍ ର ଭାଲୁକନା ଗାଁ'ର ଅଭିଯୋଗ ହେଉ ବା ଏବେ ସାମ୍ନାକୁ ଆସିଥିବା କଣ୍ଟାବାଞ୍ଜି ରେଞ୍ଜ୍ ର ଅଧେ ଶ୍ରମିକ ମଜୁରୀ ବାଟମାରଣା ଅଭିଯୋଗ ହେଉ  ! ଏହା ପୂର୍ବରୁ  ନୂଆଖାଇ ବେଳର ସେଇ ଲାଠୋର ରେଞ୍ଜ୍ ର କନ୍ଦାଗାଡ ନର୍ସରୀର ବାହାର ଶ୍ରମିକ ଆଣି କାହାକୁ ମେଞ୍ଚେ ଓ କାହାକୁ କେଞ୍ଚେ ମଜୁରୀ ଦିଆଯିବା ଅଭିଯୋଗରେ ରେଞ୍ଜର ଅଫିସ୍ କୁ ଗ୍ରାମବାସୀଙ୍କ ଧାଁ ଦଉଡ ଘଟଣା ହେଉ !  ବନବିଭାଗରେ ଏସବୁ ଅଭିଯୋଗ ପ୍ରତି ଉଚ୍ଚାଧିକାରୀ ଏତେଟା ସମ୍ବେଦନଶୀଳ ନୁହଁନ୍ତି ବୋଧେ । ସବୁ ଚପିଯାଏ  !

ତେବେ ବନବିଭାଗ ହେଉ ବା ବ୍ଲକ୍ ବିଭାଗ , ଜିଲ୍ଲାର ପ୍ରାୟ ସମସ୍ତ ସରକାରୀ ବିଭାଗର ଶ୍ରମଭିତ୍ତିକ ଯୋଜନାରେ ମିଥ୍ୟା ଜବ୍ କାର୍ଡ ବା ଫେକ୍ ଶ୍ରମିକଙ୍କ ନାଁ'ରେ ସ୍ଥାନୀୟ ବ୍ୟାଙ୍କ୍ ମାନଙ୍କରେ ବା ବିଶେଷତଃ  ବିଭିନ୍ନ ବ୍ୟାଙ୍କ୍ ଲିଙ୍କ୍ ହୋଇଥିବା ଗ୍ରାହକ ସେବା କେନ୍ଦ୍ର ବା କିଓସ୍କ ବ୍ୟାଙ୍କଶାଖାରେ ଆକାଉଣ୍ଟ୍ ଖୋଲି ଏ ଧରଣର ଜାଲିଆତି କରାଯାଉଥିବା କୁହାଯାଉଛି । ଅଭିଯୋଗ ଅନୁଯାୟୀ , କୌଣସି ଶ୍ରମଭିତ୍ତିକ ଯୋଜନାରେ କେତେକ ଶ୍ରମିକଙ୍କୁ ପଟାଇ ସେମାନେ କାମ ନକଲେ ମଧ୍ୟ ସେମାନଙ୍କ ନାଁ'ରେ ଆକାଉଣ୍ଟ୍ ଖଲିଦିଆଯାଏ ଓ ସେଥିରେ ମଜୁରୀଟଙ୍କା ପକାଇ ସେମାନଙ୍କ ସହାୟତାରେ ଉଠାଇନିଆଯାଏ । ଏଥିପାଇଁ ସେମାନେ ବିନାକାମରେ କିଛି କମିଶନ ପାଆନ୍ତି ଓ ଏଇ ଆଶାରେ ଜବ୍ କାର୍ଡ କୁ ସାମୟିକ ବନ୍ଧକ ପକେଇ ଭଡା ନିଅନ୍ତି । ଏହା ତଳୁ ଉପରସ୍ତର ପର୍ଯ୍ୟନ୍ତ ସମସ୍ତେ ଜାଣନ୍ତି । କଣ୍ଟାବାଞ୍ଜି ବନବିଭାଗ ରେଞ୍ଜ୍ ର ତୁରେକେଲା ଅଞ୍ଚଳରେ ଏପରି ଏକ ଅଭିଯୋଗ ପ୍ରକାଶ ପାଇଛି ଓ ଏଥିରେ ଖୋଦ୍ ଜଣେ ପାରା କର୍ମଚାରୀ ଅଭିଯୋଗ କରିଥିବା ପ୍ରକାଶ । ତେବେ ଉକ୍ତ ଅସ୍ଥାୟୀ କର୍ମଚାରୀ ଜଣକ କେତେକ ଶ୍ରମିକଙ୍କ ସହ ସଲାସୁତୁରାରେ ଫେକ୍ ଶ୍ରମିକ ନିୟୋଜିତ କରି ପରେ ରେଞ୍ଜରଙ୍କ ହାତରେ ଧରାପଡିଥିବା ଓ  ଓଲଟା ରେଞ୍ଜରଙ୍କ ମୁଣ୍ଡରେ ଅଠା ବୋଳୁଥିବା ଜଣାଯାଇଛି ।  ତେବେ ଅନ୍ୟ ସ୍ଥାନରେ ନିଜେ ରେଞ୍ଜର ମଧ୍ୟ ଏଭଳି କାରବାରରେ ଜଡିତ ରହିଆସୁଛନ୍ତି ବୋଲି କୁହାଯାଉଛି । ଏପରିକି ପଅରିଦିନ ଡିଏଫଓ କଣ୍ଟାବାଞ୍ଜି ଗସ୍ତ କରିଥିବାବେଳେ ଏ ସମ୍ପର୍କରେ ଅବଗତ ଥିବା ପ୍ରକାଶ । ତଥାପି ସେ ଏ ଘଟଣାରେ ଅଦ୍ୟାବଧି କାହା ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିଥିବା ଜଣାଯାଇନାହିଁ । ସରକାରୀ ଯୋଜନାର ଏହି ଠକେଇ ଅଭିଯୋଗ ମାମଲା ଦଫାରଫା ହେଇଗଲା କି  ? ' ବୋଲି ଲୋକେ ସନ୍ଦେହ କରିବା ସ୍ବାଭାବିକ ।  ତେଣୁ ଏଭଳି ଶ୍ରମଭିତ୍ତିକ ଯୋଜନାର ଠକେଇରେ ତଳୁ ଉପରସ୍ତର ପର୍ଯ୍ୟନ୍ତ ସାମିଲ୍ ରହିଆସିଥିବା ଜଣାଯାଏ । କିଛିଦିନତଳେ ଲାଠୋର ରେଞ୍ଜ୍ ର ଜଣେ ସଦ୍ୟ ଭିଜିଲାନ୍ସଅଭିଯୁକ୍ତା ମହିଳା ଫରେଷ୍ଟରଙ୍କ ବିରୁଦ୍ଧରେ ହୋଇଥିବା ଏଭଳି ଏକ ଅଭିଯୋଗ ପ୍ରକାଶ ପାଇଥିଲା ଓ ତାହା ମଧ୍ୟ ଚପିଗଲା  !

ତେବେ  ଏହି ଗୋଟିଏ ଦୁଇଟି ଅଭିଯୋଗ ବି କେବଳ ବନବିଭାଗର ଘଟଣା ନୁହେଁ ;  ବ୍ଲକ୍ , ପଞ୍ଚାୟତ ଓ ଅନ୍ୟାନ୍ୟ ବିଭାଗର ମନରେଗା ପରି ଜାତୀୟ ଯୋଜନା ବା ବିଭିନ୍ନ ଶ୍ରମଭିତ୍ତିକ ଯୋଜନାରେ ଏପରି ଉପାୟରେ ବର୍ଷ ବର୍ଷ ଧରି ବ୍ୟାପକ ଫେକ୍ ଶ୍ରମିକ , ଫେକ୍ ଶ୍ରମଦିବସ ଓ ମିଥ୍ୟାବିଲ୍ କରାଯାଇ କୋଟି କୋଟି ଟଙ୍କାର ହଡପ ଓ ବାଟମାରଣା ଅବ୍ୟାହତ ରହିଛି । ଅଥଚ ସରକାର ବା କ୍ଷମତାସୀନ ଦଳ ନିଜ କ୍ଷମତା ବଞ୍ଚାଇବାର କୌଶଳରେ ତତ୍ପର ରହିଆସୁଛନ୍ତି ବୋଲି ଲୋକେ ସମାଲୋଚନା ପ୍ରକାଶ କରିଛନ୍ତି ।