09-Mar-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ଗତ ରବିବାର ଦିନ ଏକ ବହୁଳ ପ୍ରସାରିତ ଦୈନିକ ଖବରକାଗଜର ସ୍ବତନ୍ତ୍ର ପୃଷ୍ଠାରେ ଏକ ରୋଚକ ଗୁଗଲିଖବର 'ପ୍ରେମରେ ମସଗୁଲ ଜଙ୍ଗଲୀ ଅଫିସର' ପ୍ରକାଶିତ ହୋଇଛି ।  ଏହାକୁ ନେଇ ଏବେ ସହରରେ ଚର୍ଚ୍ଚା । ଏହି ଖବର ଅନୁଯାୟୀ, ଏହି କଥାରେ କେବଳ ବଲାଙ୍ଗୀର ଜିଲ୍ଲା ଉଠୁଛି ପଡୁଛି ନୁହେଁ, ସୋନପୁର, ବୌଦ୍ଧ , କଳାହାଣ୍ଡି, ନୂଆପଡା ଓ ବରଗଡ ଆଦି ଜିଲ୍ଲାରେ ମଧ୍ୟ ଚର୍ଚ୍ଚା । ଚା' ପାନ ଦୋକାନରେ ବି ଚର୍ଚ୍ଚା । କୁଆଡେ ଏହି ଜଙ୍ଗଲୀ ବିଭାଗର ବଡବଡିଆ ବାବୁ ଜଣକ ଆସିଲlବେଳେ ଚୋରା କାଠମାଫିଆଙ୍କୁ ସାବାଡ୍ କରିଦେବେ ଓ ବିଭାଗରେ କିଛି ସଂସ୍କାର ଆଣିବେ ବୋଲି ଆଶା କରାଯାଉଥିଲା । ହେଲେ ବାବୁ ଆସୁ ଆସୁ ତାଙ୍କର ଜଣେ ମହିଳା କର୍ମଚାରୀଙ୍କ ପ୍ରେମରେ ପଡି ଉବୁଟୁବୁ ହେଉଛନ୍ତି  ! ଏପରିକି ତାକୁ ସାଙ୍ଗରେ ନେଇ ଭୁବନେଶ୍ବର ଓ ରାଜ୍ୟବାହାରକୁ ବି ଟୁର୍ ରେ ଯାଉଛନ୍ତି  ?  ନିଜର ପତ୍ନୀ ଥିଲେ ବି । ଏଇକଥାକୁ ନେଇ କୁଆଡେ ଉଭୟ ପତିପତ୍ନୀଙ୍କ ମଧ୍ୟରେ ବାକ୍ ବିତଣ୍ଡା ହେଇ କଥା ବଢିଗଲା । ମାଡାମ୍ ବିଷ ଖାଇଦେଇ ହସ୍ପିଟାଲରେ ପଡିଲେ । ସେଠି କୁଆଡେ ଜିଲ୍ଲାମୁଖିଆ ଓ ଖାକୀମୁଖିଆ କଥାଟିକୁ ଦଫାରଫା କରିଦେଲେ  ! ତଥାପି ବାବୁ ସୁଧୁରି ନଯାଇ ପୁଣି ସେ ଅଫିସ୍ ବାଲୀ ସହ ନସରପସର ହେଉଛନ୍ତି  ! 

ଏଇଟା ନୂଆଖବର ନୁହେଁ । କିଛିଦିନ ତଳେ କେତେକ ମିଡିଆରେ ବାହାରି ଚାଞ୍ଚଲ୍ଯ ସୃଷ୍ଟି କରିଥିଲା । ଖାଲି ଏତିକି ନୁହେଁ , ଏକ ଗୁରୁତ୍ୱପୂର୍ଣ୍ଣ ସ୍ଥାନରେ ଭିଜିଲାନ୍ସ ଅଭିଯୁକ୍ତ ଜଣେ  ଜଙ୍ଗଲବାବୁ ଓ ତାଙ୍କ କାଠମାଫିଆ ଅସାମାଜିକ ଯୁବକବନ୍ଧୁ ସନ୍ଦେହରେ କଣ୍ଟାବାଞ୍ଜି ଓ ବଲାଙ୍ଗୀରର କିଛି ସାମ୍ବାଦିକଙ୍କୁ ଧମକଚମକ ଦେଲେ । ମାଡାମ୍ ସେମାନଙ୍କ ବିରୋଧରେ ମାନହାନୀ କେସ୍ କରିବେ ବୋଲି  ପ୍ରଚାର କଲେ । ଡକାୟତିଅଭିଯୁକ୍ତ ଗୁଣ୍ଡା ଜଣକ ସମ୍ପୃକ୍ତ କଣ୍ଟାବାଞ୍ଜିର ସାମ୍ବାଦିକଙ୍କୁ ବଲାଙ୍ଗୀର ଆସିଲେ ଦେଖିନେବାକୁ ଏଠିକାର ଜଣେ ବରିଷ୍ଠ ସାମ୍ବାଦିକଙ୍କୁ ବି ଶୁଣାଇଦେଲେ । ବଡ ଜଙ୍ଗଲବାବୁ ତାଙ୍କ ରେସ୍ ରେ ସରକାରୀ ଅର୍ଥରେ ଗୋତି ଖଟୁଥିବା ଜଣେ ଦି'ଜଣ ଅସ୍ଥାୟୀ କର୍ମଚାରୀଙ୍କୁ ନିକାଲି ଦେଲେ । ସନ୍ଦେହରେ ଜଣେ ମହିଳାଅଧିକାରୀଙ୍କ ଅଫିସ୍ ର ଡାଟା ଅପରେଟରଙ୍କୁ ଅନ୍ୟତ୍ର ବଦଳି କରିଦେଲେ ।  ସେଠିକା ଅଧିକାରୀଙ୍କୁ ଲଗାଇ ଟଙ୍କାପଇସା ଲାଞ୍ଚ ଯାଚିଲେ । ଖାକୀବାବୁ ବି କୁଆଡେ ଥରେ କଣ୍ଟାବାଞ୍ଜି ଗସ୍ତବେଳେ ସେଠିକା ଛୋଟସାମ୍ବାଦିକଙ୍କୁ ମୃଦୁଧମକ ବି ଦେଇଥିଲେ  ! 

ତଥାପି ହସ୍ପିଟାଲରେ କାହିଁକି ବଡ ଜଙ୍ଗଲ ବାବୁଙ୍କ ମାଡାମ୍ ବିଷ କି ମାତ୍ରାଧିକ ପରିମାଣର ଔଷଧଖାଇ ଭର୍ତ୍ତି ହେଇଥିଲେ ଓ ତା'ପଛରେ ଜିଲ୍ଲାର ଜଣେ ବଡଅଧିକାରୀଙ୍କ ଅବୈଧ ଆଚରଣ ସମେତ ଜିଲ୍ଲାର ଅନ୍ୟ ଦୁଇଜଣ ମୁଖିଆ ଅଧିକାରୀଙ୍କର ସେହି ଘଟଣାକୁ ଚପାଇଦେବା ଚର୍ଚ୍ଚାର ବିଭାଗୀୟ ବା ସରକାରୀ ସ୍ତରରେ ତଦନ୍ତ ସୁଦ୍ଧା ହେଲାନାହିଁ  ! ଫଳରେ ଏବେ ପ୍ରକାଶିତ ଗୁଗଲିଖବର ଅନୁଯାୟୀ , ଉକ୍ତ ଜଙ୍ଗଲୀବାବୁ ପୁଣି ପୂର୍ବ ଲୀଳାରେ ମାତିଛନ୍ତି  !

ଏଣୁ ଏ ଖବରର ସତମିଛ କେତେ ସରକାର ସ୍ପଷ୍ଟ କରନ୍ତୁ ଓ ସେମାନେ ଯେତେବଡ ହେଲେ ବି ଦୋଷୀ ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଲୋକେ ଦାବି କରିଛନ୍ତି ।  ଏହି ଅନୈତିକ ଆଚରଣର ଅଭିଯୋଗର ଚର୍ଚ୍ଚାକୁ ତୁଣ୍ଡରେ ତୁଣ୍ଡି ବା ମାସ୍କ ନ ବାନ୍ଧି ଜିଲ୍ଲାର ସମସ୍ତ ମିତିଆ , ବୁଦ୍ଧିଜିବୀ ଓ ଲୋକପ୍ରତିନିଧି ମାନେ ଦୃଢଭାବେ ନିନ୍ଦା କରି ତଦନ୍ତ ପୂର୍ବକ କାର୍ଯ୍ୟାନୁଷ୍ଠାନ ଦାବି କରିବା ଆବଶ୍ୟକ  ବୋଲି ଜନସାଧାରଣ ଆଲୋଚନା କରୁଛନ୍ତି ।