09-Mar-2022

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ବଲାଙ୍ଗୀରର ହୃଦସ୍ଥଳରେ ଅବସ୍ଥିତ ଐତିହାସିକ ସାସ୍କୃତିକ ଓ ସର୍ବସାଧାରଣ ସ୍ଥଳ କୋଶଳ କଳା ମଣ୍ଡଳ ପଡିଆର ପରିଷ୍କାର ପରିଚ୍ଛନ୍ନତା ଓ ଉପଯୁକ୍ତ ରକ୍ଷଣାବେକ୍ଷଣ କେବେ ସମ୍ଭବ ହେବ ବୋଲି ଲୋକେ ପ୍ରଶ୍ନ କରିଛନ୍ତି । ଚଳିତ ପୌରନିର୍ବାଚନ ବେଳେ ଏପରି ପ୍ରଶ୍ନର ଯଥେଷ୍ଟ ଗୁରୁତ୍ୱ ରହିଛି । ଜିଲ୍ଲା ପ୍ରଶାସନ , ବଲାଙ୍ଗୀର ପୌର ପରିଷଦ ଏବଂ ଜିଲ୍ଲା ସଂସ୍କୃତି ପରିଷଦ ତିନି ପଞ୍ଝାରେ ଫସିରହିଥିବା ଜିଲ୍ଲା ସଦରମହକୁମାର ଏହି ମର୍ଯ୍ୟାଦାଜନକ ଅନୁଷ୍ଠାନଟି ସମ୍ପର୍କରେ ଯୁଗାବଧି କେହି ଚିନ୍ତା କରୁଥିଲା ପରି ମନେହୁଏନାହିଁ ।

ସହରର ମଧ୍ୟସ୍ଥଳର ଏହି ପଡିଆଟି ବର୍ଷ ବର୍ଷ ଧରି ଖୋଲାମୁତ୍ରାଳୟ , ଖୋଲା ଝାଡାବସିବାର ଆଢୁଆଳ ଗୁହୁରିପଡିଆ , ଅସାମାଜିକଙ୍କର ମଦ୍ୟପାନର ସୁବିଧାଜନକ ଜାଗା ଓ ସେଇଠି ମଦବୋତଲ ଭାଙ୍ଗି କାଚ ଗଦେଇବାର ଅବାଧ ଡଷ୍ଟବିନ୍ ଏବଂ ସ୍ଥଳବିଶେଷରେ ଉନ୍ମୁକ୍ତ ବେଶ୍ୟବୃତ୍ତିରେ ବ୍ୟବହୃତ ହୋଇ ଆସୁଛି ।

ତଥାପି ଏହି ପଡିଆଟି ଜିଲ୍ଲାର ବିଭିନ୍ନ ମହାସମାରୋହ , ରାଜନୈତିକ ସଭାସମିତି , ପ୍ରଶାସନିକ ଅନୁମତିରେ ବଜାରବିପଣୀ , ପୁସ୍ତକମେଳା ବା ବହିହାଟ , ମଠଖାଇ ମହୋତ୍ସବ , ଲୋକଉତ୍ସବ , ମେଳା ମହୋତ୍ସବ , ନାଟତାମସା , ଧାର୍ମିକପ୍ରବଚନ ଓ ଅନ୍ୟାନ୍ୟ ବହୁବିଧ ଆୟୋଜନଗୁଡିକ ହୋଇଆସୁଛି । ମୁଖ୍ୟମନ୍ତ୍ରୀ , ମନ୍ତ୍ରୀ , ସାଂସଦ , ବିଧାୟକମାନେ , ବଡବଡ ଅମଲାଅଫିସର , କେବେ ପ୍ରଧାନମନ୍ତ୍ରୀ ତ କେବେ କେନ୍ଦ୍ର ଓ ରାଜ୍ୟର ବଡବଡ ଅତିଥି ଅଭ୍ୟାଗତମାନଙ୍କର ମଧ୍ୟ ଏଠାରେ ସମାବେଶ ଅନୁଷ୍ଠିତ ହୋଇଆସୁଛି । ବିଶିଷ୍ଟ କ୍ରୀଡାତାରକା କପିଳଦେବଙ୍କ ଠାରୁ ବିଖ୍ୟାତ ସିନେତାରକାଙ୍କ ପର୍ଯ୍ୟନ୍ତ ଏହିଠାରେ ସଭାର ଆୟୋଜନ କରାଯାଇଥିଲା । ତେବେ ଏହାର ସୁଉଚ୍ଚ ପ୍ରାଚୀର ବା ଅବରୁଦ୍ଧ ଅନୁପୂରବେଶ ରୋକିବାର ଗେଟ୍ , ଜଗୁଆଳୀ , ଅନୁମତି କଟକଣାଠାରୁ ପଡିଆରେ ଘାସଲଗାଯାଇ ବା ଷ୍ଟାଡିୟମ୍ କରାଯିବାର ବହୁ ଅଟକଳ , ଅର୍ଥବରାଦ ଓ ଯୋଜନା ସମ୍ପର୍କରେ ଅନେକ ପ୍ରତିଶ୍ରୁତି ଶୁଣାଯାଇ ଆସୁଥିଲେ ହେଁ , ଅଦ୍ୟାବଧି କିଛି ହୋଇପାରିନାହିଁ । ବରଞ୍ଚ ଜଣେ ପୂର୍ବ ସଂସ୍କୃତି ଅଧିକାରୀ ଏବେ ମଧ୍ୟ ସେଠାକାର ଅଫିସ୍ ଓ ଭବନକୁ ଯାଇ ରାତିରେ ମଦ୍ୟପାନର ଆସର ଜମାଉଛନ୍ତି । 

ଚଳିତ ବଲାଙ୍ଗୀର ମ୍ୟୁନିସିପାଲିଟି ନିର୍ବାଚନରେ ପୌର ପରିଷଦର ଅଧ୍ୟକ୍ଷା ପାଇଁ ପ୍ରତିଦ୍ବନ୍ଦିତା କରୁଥିବା କୌଣସି ପ୍ରମୁଖଦଳର ପ୍ରାର୍ଥିନୀ ଏଥର ତାଙ୍କର ନିର୍ବାଚନୀ ଏଜେଣ୍ଡାରେ ସହର ତଥା ଜିଲ୍ଲାର ଏହି ଐତିହାସିକ ପଡିଆଟିର ଉପଯୁକ୍ତ ରକ୍ଷଣାବେକ୍ଷଣ ପାଇଁ କୌଣସି ପ୍ରତିଶ୍ରୁତି ଦେବେ କି  ?- ବୋଲି ସହରବାସୀ ଅପେକ୍ଷାରତ ଅଛନ୍ତି ।